س.ج. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىندە وتكەن كەزدەسۋدە قازۇمۋ رەكتورى مارات شورانوۆ ديماش قۇدايبەرگەنگە مادەنيەتتى دامىتۋعا، جاستاردىڭ رۋحاني تاربيەسىنە قوسقان ۇلەسى جانە قازاقستاننىڭ حالىقارالىق ءيميدجىن ىلگەرىلەتۋدەگى ەڭبەگى ءۇشىن قازۇمۋ-دىڭ قۇرمەتتى پروفەسسورى اتاعىن تابىستادى، دەپ حابارلايدى aqshamnews.kz
موتيۆاسيالىق كەزدەسۋدە ديماش قۇدايبەرگەن ءوزىنىڭ ومىرلىك جانە شىعارماشىلىق جولى تۋرالى وي ءبولىستى. ول ۇلتتىق مادەنيەتپەن بايلانىسىن ۇزبەي، تۋعان تامىرىن ساقتاي وتىرىپ، الەمدىك ساحنالارعا قالاي جەتكەنىن باياندادى. ونەر يەسى ادامنىڭ جەكە بولمىسىنا قاتىستى قۇندىلىقتارعا ەرەكشە توقتالدى:
«مەن ادامدى ەڭ الدىمەن رۋحاني بايلىعىمەن باعالايمىن. تالانت پەن كاسىبي قابىلەت ودان كەيىنگى نارسە. ەگەر ىشكى نەگىز بولماسا، قانداي جەتىستىككە جەتسەڭ دە، ونىڭ سالماعى سەزىلمەيدى»، – دەدى ديماش.
قازۇمۋ ستۋدەنتتەرىنە ارناعان سوزىندە ديماش قۇدايبەرگەن مەديسينا ماماندىعىنىڭ كۇردەلىلىگى مەن جاۋاپكەرشىلىگىن اتاپ ءوتتى:
«سىزدەر وتە قيىن ءارى جاۋاپتى جولدى تاڭدادىڭىزدار. مەديسينا – قاتەلىكتى كەشىرمەيتىن سالا. بۇل ۇزدىكسىز ىزدەنىستى، وز-وزىڭە تالاپ قويا ءبىلۋدى قاجەت ەتەدى. مەنىڭشە، ناعىز جۇلدىزدار - دارىگەرلەر. ولار كۇن سايىن ادام ءومىرىن ساقتاپ قالادى»، – دەدى ديماش.
سونداي-اق ونەر يەسى ستۋدەنتتەرگە الداعى ەمتيحان سەسسياسىن ءساتتى تاپسىرۋعا تىلەكتەستىگىن ءبىلدىردى.
كەزدەسۋدىڭ ەڭ اسەرلى ساتتەرىنىڭ ءبىرى - ديماش قۇدايبەرگەننىڭ قازۇمۋ ستۋدەنتتەرىنەن قۇرالعان «دالا سازى» ۇلتتىق اسپاپتار انسامبلىمەن بىرلەسىپ ونەر كورسەتۋى بولدى. ورتاق ورىنداۋدا «اداي» كۇيى شىرقالىپ، ساحنا مەن كورەرمەن زالىن ءبىر ارناعا توعىستىردى.