ديماش بەرليندە العاش رەت جەكە كونسەرت وتكىزدى: «Stranger» الەمدىك تۋرى گەرمانيادا جالعاستى، دەپ حابارلايدى Aqshamnews.kz ءتىلشىسى.
14 قاراشادا گەرمانيا استاناسى بەرليندە ديماش قۇدايبەرگەننىڭ جەكە كونسەرتى ءوتتى. بۇل – قازاقستاندىق ءانشىنىڭ بەرليندەگى العاشقى ونەر كورسەتۋى. بۇعان دەيىن ول 2022 جانە 2024 جىلدارى ديۋسسەلدورفتا كونسەرت بەرگەن.
Max-Schmeling-Halle ارەناسىندا ديماش 20-دان استام كومپوزيسيا ورىندادى. ولاردىڭ ىشىندە ون اۆتورلىق ءانى دە بولدى. كەشتىڭ باستى شىعارمالارىنىڭ ءبىرى رەتىندە ءاردايىم ايتىلاتىن «ۇمىتىلماس كۇن» تاعى دا كورەرمەننىڭ ەرەكشە ىقىلاسىنا بولەندى. بۇل ءان 2016 جىلعى العاشقى تۋرىنىڭ اتاۋىنا اينالعان جانە سودان بەرى ءار كونسەرتتىڭ اجىراماس بولىگى بولىپ كەلەدى.
ون جىل ىشىندە الەمنىڭ تۇكپىر-تۇكپىرىندەگى تىڭدارماندارى «ۇمىتىلماس كۇندى» جاتقا مەڭگەرىپ، ءار كونسەرتتە ديماشپەن بىرگە جۇرەكتەن شىعارىپ ورىندايدى. ءار ءانشىنىڭ كونسەرتى تىڭدارمان ءۇشىن ءدال سول «ۇمىتىلماس كۇنگە» اينالادى.
ءان ورىندالعان ساتتە كورەرمەندەر مىڭداعان شام ىسپەتتى جارىقتاردى كوتەرىپ، زالدى ەرەكشە اتموسفەراعا بولەدى. «ماحاببات شامدارى» دەپ اتالعان بۇل اسەرلى اكسيانى Dimash Fanclub Deutschland ۇيىمىنىڭ جانكۇيەرلەرى ۇيىمداستىرىپ، التى مىڭعا جۋىق جارىقشامدى كورەرمەندەرگە تاراتقان.
كەش ونەر، ەموسيا جانە ەرەكشە ەنەرگەتيكاعا تولى بولدى.