ديماش قۇدايبەرگەن ارمەنياداعى جانكۇيەرلەرىمەن كەزدەستى

1 مامىردا قازاقستاندىق ءانشى ديماش قۇدايبەرگەن ەريەۆانداعى كونسەرتىنەن كەيىن جانكۇيەرلەرىمەن كەزدەسۋ وتكىزىپ، ولاردىڭ سۇراقتارىنا جاۋاپ بەردى.

ەسكە سالا كەتسەك، 28 ساۋىردە ديماش قۇدايبەرگەن ارمەنيا استاناسى ەريەۆانعا ۇشىپ بارىپ، اۋەجايدان ۆيدەو جاريالاعان ەدى. كەيىن جانكۇيەرلەرىمەن بىرگە تۇسكەن سۋرەتتەرىمەن دە بولىسكەن، دەپ حابارلايدى Almaty-akshamy.kz قازاقپاراتقا سىلتەمە جاساپ..  

كونسەرتتەن كەيىن جانكۇيەرلەر ديماش ورىنداعان «سارەري وۆين مەرنەم» ارميان ءانىن YouTube ارناعا جاريالاۋدى وتىنگەن.

فان-كەزدەسۋدە ديماشقا بىرنەشە سۇراق قويىلدى. سونىڭ ءبىرى ءانشى ءدامىن تاتىپ ۇلگەرگەن ارميان تاعامدارى تۋرالى بولدى.

«ارميان كاۋاپتارىنا ءسوز جوق. وتە ءدامدى. ماعان قاتتى ۇنادى»، - دەدى ديماش.

ونىڭ ايتۋىنشا، ارمياندار - «وزىمىزگە»، ياعني قازاقتارعا ۇقساعان وتە قوناقجاي حالىق.

وسى ورايدا، ول ۇشاقتا ارميان ازاماتىمەن بولعان قىزىق وقيعا تۋرالى ايتىپ بەردى. 

«ۇشاقتا ارميان ازاماتىمەن سويلەسىپ قالدىم. ول كەشكە نە ىستەيتىنىمدى، جۇمىسىم قاشان اياقتالاتىن سۇرادى. مەن بىلمەيمىن دەپ جاۋاپ بەردىم. سوسىن ول ءوز تەلەفون ءنومىرىن جازىپ بەرىپ، «كەز-كەلگەن ۋاقىتتا حابارلاسىڭىز، داستارحان جايىپ قويامىز» دەدى. ارميانداردىڭ قازاقتار سياقتى قوناقجاي ەكەنىن سوندا ءتۇسىندىم»، - دەپ تۇيىندەدى ءانشى.