سىبايلاس جەمقورلىققا قارسى قىزمەتتىڭ ءتوراعاسى اسحات جۇماعالي حالىق ارتىسىمەن كەزدەستى.
قازاقستانداعى جەمقورلىقپەن كۇرەسۋگە ەندى ايگىلى ءانشى ديماش قۇدايبەرگەن دە كومەكتەسەتىن بولادى، دەپ حابارلايدى aqshamnews.kz
انتيكور باسشىسى مەن ونەر يەسىنىڭ كەزدەسۋى ءجاي اڭگىمە فورماتىندا عانا وتكەن جوق، ولار ونەردىڭ جەمقورلىققا توسقاۋىل قويۋعا قالاي ىقپال ەتە الاتىنىن تالقىلادى.
اگەنتتىك ءتوراعاسى ونەر جۇلدىزىنا جەمقورلىقتىڭ الدىن الۋ بويىنشا جاسالىپ جاتقان جۇمىستار جانە ونىمەن كۇرەسۋدە قانداي زامانۋي ادىستەر قولدانىلاتىنى جايلى تۇسىندىرگەن. سونداي-اق انتيكور ءتوراعاسى جەمقورلىقپەن كۇرەس ماسەلەسىندە ونەر سالاسى وڭ سەپتىگىن تيگىزەدى دەپ سانايدى.
«تاراپتار سىبايلاس جەمقورلىق دەڭگەيىن تومەندەتۋگە، مادەني جانە ءبىلىم بەرۋ باستامالارى ارقىلى پاراساتتىلىق قاعيداتتارىن ناسيحاتتاۋعا باعىتتالعان قوعامداعى زاڭدىلىق پەن ءتارتىپ قاعيداتتارىن ىلگەرىلەتۋ شەڭبەرىندەگى بىرلەسكەن جوبالاردى تالقىلادى»،– دەلىنگەن انتيكور حابارلاماسىندا.
ديماش قۇدايبەرگەن دە اتقارىلىپ جاتقان جۇمىستارعا جانە بولاشاقتىڭ يگىلىگى ءۇشىن سىبايلاس جەمقورلىققا قارسى ءىس-قيمىل ىسىنە قولداۋ بىلدىرۋگە قارسى ەمەستىگىن جەتكىزدى.