ق ر ءىىم-نىڭ ۇيىمداسقان قىلمىسقا قارسى كۇرەس دەپارتامەنتى باس پروكۋراتۋرانىڭ ۇيلەستىرۋىمەن جەتەكشىسى «قاڭتار وقيعاسىنا» بەلسەندى قاتىسقان ارمان جۇماگەلدييەۆ ۇيىمداسقان قىلمىستىق توبىن اشكەرەلەۋگە جانە جويۋعا باعىتتالعان ءىس-شارالار كەشەنىن جۇرگىزۋدە، دەپ حابارلايدى Almaty-akshamy.kz Polisia.kz-كە سىلتەمە جاساپ.
«ۇيىمداسقان قىلمىستىق توپتىڭ جەتەكشىسى مەن نەگىزگى قاتىسۋشىلارى قاماۋعا الىنعانىنا قاراماستان، ونىڭ باسقا مۇشەلەرى ادۆوكاتتاردىڭ قىزمەتتەرىن قارجىلاندىرا وتىرىپ، قۇقىققا قارسى قىزمەتپەن اينالىسۋىن جالعاستىرۋدا. تەرگەۋ پروسەسىنىڭ قاتىسۋشىلارىنا بۇقارالىق اقپارات قۇرالدارى جانە ينتەرنەت جەلىسى ارقىلى قىسىم كورسەتىپ جاتىر»، - دەلىنگەن حابارلامادا.
ازىرلەنگەن جوسپارعا سايكەس اتالعان توپتىڭ قىلمىستىق ارەكەتىنىڭ جولىن كەسۋ ءۇش كەزەڭدە جۇرگىزىلدى. ءبىرىنشى كەزەڭ حالىقارالىق ىزدەۋدە جۇرگەن، قىلمىستىق ورتادا «نويس» دەگەن لاقاپ اتىمەن بەلگىلى جۇماگەلدييەۆتىڭ «وڭ قولى» باسقاراتىن ۇيىمداسقان قىلمىستىق توپتىڭ نەگىزگى كريمينالدىق بۋىنىن جويۋعا باعىتتالدى.
ماسەلەن، 19 ساۋىردە الماتى قالاسىنىڭ، الماتى، تۇركىستان، شىعىس قازاقستان جانە پاۆلودار وبلىستارىنىڭ اۋماعىندا اۋىر قىلمىستاردى جاساۋعا، ونىڭ ىشىندە 2018 جىلى الماتىدا بولعان ادام ولتىرۋگە وقتالۋعا قاتىسى بار ۇيىمداسقان قىلمىستىق توپتىڭ 12 مۇشەسى ۇستالدى.
«ەكىنشى كەزەڭدە كريمينالدىق ورتادا «كاراس» لاقاپ اتىمەن بەلگىلى «ديكيي ارماننىڭ» تاعى ءبىر كومەكشىسى باقىلايتىن ۇيىمداسقان قىلمىستىق توپتى قارجىلاندىرۋ ارناسى جويىلدى. 25-26 ءساۋىر ارالىعىندا الماتى، شىمكەنت قالالارىندا جانە تۇركىستان وبلىسىندا 130-دان استام ءتىنتۋ جۇرگىزىلىپ، زاڭسىز ويىن بيزنەسىنە جانە اتالعان ۇيىمداسقان قىلمىستىق توپتى قارجىلاندىرۋعا قاتىسى بار 53 فيگۋرانت ۇستالدى. وسى جەدەل-تەرگەۋ ءىس-شارالارىنىڭ ناتيجەسىندە ۇيىمداسقان قىلمىستىق توپ قۇرعانى جانە ونى باسقارعانى ءۇشىن قىلمىستىق كودەكستىڭ 262-بابى بويىنشا ەكى قىلمىستىق ءىس تىركەلدى. مامىر ايىندا قىلمىستىق توپتىڭ قىزمەتىن قارجىلاندىرۋ فاكتىسى بويىنشا قىلمىستىق كودەكستىڭ 266-بابىمەن قوسىمشا سوتقا دەيىنگى تەرگەپ-تەكسەرۋ باستالدى»، - دەيدى ءىىم وكىلدەرى.
12 شىلدەدە ءىىم ۇيىمداسقان قىلمىسقا قارسى كۇرەس دەپارتامەنتى باس پروكۋراتۋرانىڭ ۆەدومستۆوارالىق جەدەل-تەرگەۋ توبىمەن بىرلەسە وتىرىپ، وپەراسيانىڭ ءۇشىنشى كەزەڭىن ىسكە اسىردى. سونىمەن قاتار استانا، الماتى، شىمكەنت، اقتوبە، قوستاناي جانە تۇركىستان قالالارىندا «قاڭتار وقيعاسى» كەزىندە الماتى قالاسىنداعى جاپپاي تارتىپسىزدىككە بەلسەندى قاتىسقان 18 فيگۋرانتتى ۇستادى. 36 ءتىنتۋ ءىس-شاراسى جۇرگىزىلىپ، بىرنەشە شولاق قارۋ، تاپانشالار، پىشاقتار، كاستەت، ءدىني ادەبيەت، سونداي-اق تارتىپسىزدىككە قاتىسقان كۇدىكتىلەردىڭ كيىمدەرى تاركىلەندى.
«وسى باعىتتاعى جەدەل ءىس-شارالار جالعاسۋدا. وزگە مالىمەتتەر تەرگەۋ مۇددەسىندە جاريالاۋعا جاتپايدى»، – دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.