جاڭا قازاقستان ءۇشىن ەل بىرلىگى مەن مەملەكەتشىلدىك – ماڭىزدى ىرگەتاس.
ناۋرىز ايىنداعى جولداۋىندا پرەزيدەنت مەملەكەتتىك مۇددە جولىندا ەتنوستاردىڭ ۇيىسۋىن «اۋقىمدى وزگەرىستەردىڭ ءجۇرۋىن تەزدەتەتىن» فاكتور رەتىندە بايىپتادى، دەدى قازاقستان حالقى اسسامبلەياسىنىڭ «ەل بىرلىگى – جاڭارعان قازاقستاننىڭ تىرەگى» اتتى ءحححى سەسسياسىندا ەۋرازيا ۇلتتىق ۋنيۆەرسيتەتىنىڭ پرورەكتورى، عالىم ديحان قامزابەك ۇلى، دەپ حابارلايدى Almaty-akshamy.kz.
عالىمنىڭ پىكىرىنشە، جاڭا قازاقستان ءۇشىن ەل بىرلىگى مەن مەملەكەتشىلدىك – ماڭىزدى ىرگەتاس. جاڭا قازاقستاننىڭ ءمانى ايقىندالدى: ول، بىرىنشىدەن، ەلدىك قاۋىپسىزدىكتى قاناعاتتاندىراتىن، ەكىنشىدەن، ازاماتتاردىڭ الەۋمەتتىك باستامالارىن قولدايتىن كەشەندى رەكونسترۋكسيا، قايتا قۇرىلىمداۋ.
حالقىمىزدىڭ «جاۋدى جەڭگەن – جارتى باتىر، ءوزىن جەڭگەن – شىن باتىر» دەگەن مىڭ جىلدىق اتا ءسوزى بار. بۇل «ەلىڭ ءۇشىن، ءوزىڭ ءۇشىن، ۇرپاعىڭ ءۇشىن تۇزەل، ارەكەت ەت» دەگەندى بىلدىرەدى.
قازاق ەلىنىڭ ءداستۇرلى بەرەكە-ىنتىماعى مەن تاعدىر قوسقان ەتنوس وكىلدەرىنىڭ پاراساتى ماقتانىش تۇتارلىق، ءبىراق قازىرگى سىن-قاتەرلەر بۇل بەرەكە مەن پاراساتتى تولىقتىرۋدى، بايسالدى، باياندى ەتۋدى تالاپ ەتەدى. وسى رەتتە مەملەكەت باسشىسى ۇسىنعان ۇلتتىق قۇرىلتايدا تاريحي تاجىريبە مەن قازىرگى سىندارلى ىزدەنىستەردىڭ ساراپتالۋىنا سەنىم ءبىلدىردى عالىم.
«ءبىر ۇستانىمىمىز: سان عاسىرلىق مەملەكەتشىلدىك ارقاۋىمىز، ەكىنشى ۇستانىمىمىز: ءارقاشان ەلدى ۇيىستىرۋعا سەبەپشى ءتىل مەن ءداستۇردىڭ التىن قازىعى – قازاق ۇلتىنىڭ دانالىعى دەسەك، بۇل تەزيس تە الەمدىك ۇيلەسىمدىلىككە سايكەس كەلەدى»، – دەدى ديحان قامزابەك ۇلى.