بۇگىن الماتىدا Digital Almaty 2024 فورۋمى باستالادى
بۇل ءداستۇرلى فورۋم الماتى ۇسىنعان حالىقارالىق تالقى جانە كورمە الاڭى. وندا سيفرلىق ترانسفورماسيانىڭ جاڭا باعىتى تالقىلانادى، سيفرلىق تەحنولوگيالار سالاسىنداعى جارىققا شىققان تىڭ دۇنيەلەر كورمەگە قويىلادى. كەزەكتى اۋقىمدى شارا اتاكەنتتە 1-3 اقپان كۇندەرى وتكەلى تۇر.
شارا نەسىمەن قىزىق؟ الەمدە سيفرلىق تەحنولوگيانىڭ جاڭا تابىسى دەرلىك كۇن سايىن جارىق كورەدى. ولار ءبىزدىڭ ءومىرىمىزدى قىسقا ۋاقىت ىشىندە وزگەرتۋ ۇستىندە. ءتىپتى، بولاشاق ادامزات قوعامنىڭ جالپى بەينەسى قازىرگى جاڭا جانە سيفرلىق تەحنولوگيالاردىڭ دامۋىنا قاراي قالىپتانىپ كەلەدى. ەگەر سىزگە ادامزات بولاشاعى قىزىق بولسا، وندا الدا كۇندەرى اتاكەنتتە وتەتىن اتالمىش فورۋم دا قىزىق بولارى ءسوزسسىز.
ەڭ باستىسى فورۋمنىڭ كورمە الاڭىندا الەمنىڭ ءار تۇكپىرىندەگى جاڭا سيفرلىق تەحنولوگيا ونىمدەرى، وسى سالاداعى جاڭا ونەر تابىستارى كورسەتىلەدى. كەزەكتى فورۋم اياسىندا قاراپايىم ادامدار ءۇشىن دە قىزىقتى ءبىرقاتار شارالار قامتىلعان. ايتالىق، قاراپايىم ادامنىڭ قازىرگىدەي سيفرلى الەمدە جەكە باسىنا تيەسىلى اقپاراتتاردى قالاي قورعاۋعا بولاتىنىن تۇسىندىرەتىن پانەلدىك سەسسيا، سونىمەن بىرگە قازاقستاندا 3D باسپالارىن قالاي قۇرۋعا بولاتىنى تۋرالى جوبالار تانىستىرىلاتىن بولادى.
وتكىر تاقىرىپتار الاڭىندا: Digital Almaty 2024 فورۋى الاڭىندا اسا قىزىقتى تاقلى وتىرىستارى كۇتىپ تۇر. وندا سيفرلى بولاشاقتا قانداي مامانداردى دايىنداۋ كەرەكتىگىنەن تارتىپ، ونەركاسىپتى، ۇكىمەت جۇمىسىن، الەۋمەتتىك قىزمەت كورسەتۋ سالالارىن سيفرلاندىرۋدىڭ وتاندىق جانە شەتەلدىك تاجىريبەلەرى، ستراتەگيالارى ءسوز بولادى. شىعارماشىلىق ونىمدەردى، ايتالىق ادەبيەت پەن ونەر تۋىندىلارىن سيفرلى الەمدە ناسيحاتتاۋدىڭ، قوعامدىق قۇندىلىقتار مەن سيفرلىق جۇيەلەردىڭ ۇيلەسىمدىلىگىنە قاتىستى جەكەلەگەن پانەلدىك وتىرىستار وتپەك.
الماتى ورتا ازيا كوشباسشىسى رەتىندە: ينوۆاسيالىق تەحنولوگيالار ءبىزدىڭ تاڭداۋىمىز. ودان باس تارتا المايمىز. بارلىق ەلدەر ءومىر ءسۇرۋ ساپاسىن ارتتىرىپ، ءوندىرىستى، تۇرمىستى جەڭىلدەتەتىن جاڭا تەحنولوگيالاردى، سيفرلىق تەحنولوگيالاردى جۇيەلى دامىتۋدى قولعا الدى. بۇل الەمدىك بايگە دەسە دە بولادى. الماتى ورتا ازيا ايماعىندا اتالعان سالاداعى كوشباسشىلىق ورىنىن قازىردەن باستاپ تىكتەۋى كەرەك. سيفرلىق ترانسفورماسيالارعا ارنالعان Digital Almaty حالىقارالىق فورۋمى وسىنىڭ ايقىن قادامى. جوبا ۇدايى ءارى جوعارى دەڭگەيدە جالعاسىن تاپسا، بۇل شاھاردى الىپ گەوساياسي ايماقتاعى جاڭا تەحنولوگيالار بازاسىنا اينالدىرا الادى.