ءماجىلىس دەپۋتاتى ەرجان بەيسەنبايەۆ پرەمەر-مينيستردىڭ ءبىرىنشى ورىنباسارى رومان سكليارعا جولداعان ساۋالىندا 4 پايىزبەن اۆتونەسيە بەرۋدى جالعاستىرۋعا قاتىستى ساۋال جولدادى، دەپ حابارلايدى Almaty-akshamy.kz.
قازىرگى ۋاقىتتا «وپەراتور روپ» ج ش س تۇرىندەگى وليگوپوليا قاتىسۋشىلارىنا قاتىستى رەزونانستى سوت پروسەسى ءجۇرىپ جاتقانى بارشاعا ايان. بۇگىنگى تاڭدا روپ فۋنكسيالارى «جاسىل دامۋ» اق-عا بەرىلگەنىمەن ماسەلە جويىلعان جوق، - دەيدى دەپۋتات.
«اق جول» دەمپارتياسىنا كاسىپكەرلەر حابارلاسىپ، ەكولوگيا دەپارتامەنتتەرى 2019-2021 جىلدارعا ارنالعان ۋتيليزاسيا تولەمدەرىن تولەمەگەنى ءۇشىن اكىمشىلىك ايىپپۇل سالعانىن ايتىپ، شاعىمدانىپ جاتقان كورىنەدى، دەپ جازدى BAQ.كz.
مۇنداي ءوندىرىپ الۋ زاڭسىز، ويتكەنى «جاسىل دامۋ» اق-نىڭ رەكۆيزيتتەرى ولارعا تەك 2023 جىلى عانا بەرىلگەن، ال ۋتيليزاسيا تولەمدەرى تالاپ ارىزدار قويىلعانعا دەيىن تولەنىپ قويعان. وعان قوسا، ولار پرەزيدەنتتىڭ تەكسەرۋلەر جۇرگىزۋگە موراتوريي ەنگىزۋ تۋرالى جارلىعىن بۇزىپ وتىر. بۇگىنگى كۇنى وسى نەگىز بويىنشا 690-نان استام كاسىپكەرلىك سۋبەكتىسى جاۋاپكەرشىلىككە تارتىلعان دەگەن اقپارات بار، - دەپ اتاپ ءوتتى ەرجان بەيسەنبايەۆ.
ايتۋىنشا، روپ اياسىنداعى تەحنيكانى ۋتيليزاسيالاۋعا ارنالعان «RecyclingCompany» ج ش س زاۋىتى ەكىنشى جىل جۇمىس ىستەمەي تۇر، سەبەبى، «وپەراتور روپ» ج ش س قاتىستى قىلمىستىق ءىس اياسىندا كاسىپورىنعا تىيىم سالىنعان.
الايدا ۋتيليزاسيا جۇرگىزىلىپ جاتپاعانىمەن «جاسىل دامۋ» ازاماتتار مەن بيزنەستەن ۋتيلالىم الۋدى جالعاستىرىپ كەلەدى. سونداي-اق كاسىپكەرلەردىڭ مالىمەتىنشە، قازىرگى وپەراتور كاسىپورىن جۇمىسىنىڭ توقتاۋى مەن تەرگەۋدىڭ ءجۇرىپ جاتقانىن سىلتاۋ ەتىپ، 4 اي بويى وندىرۋشىلەرگە تۇسكەن قارجىنى ۇلەستىرمەگەن، الايدا، بۇل ونىڭ وزىنە جوق ۋتيلالىمدى جيناۋىنا ەش كەدەرگى كەلتىرمەي وتىر. سوندىقتان اتىشۋلى ۋتيلالىمنان ءتۇسىپ جاتقان ميللياردتاعان قارجى تاعى قايدا كەتىپ جاتىر دەگەن ساۋال تۋىندايدى؟ – دەدى ماجىلىسمەن.
دەپۋتات اتاپ وتكەندەي، يندۋستريا مينيسترلىگى جەڭىلدەتىلگەن اۆتونەسيەلەردى 4 پايىزبەن قارجىلاندىرۋدى توقتاتۋ تۋرالى شەشىم قابىلدادى.
ۋتيلالىم جۇيەسى قازاقستاندىق كولىكتەردىڭ ءوندىرىسى مەن قولجەتىمدىلىگىن قامتاماسىز ەتۋ ماقساتىندا ەنگىزىلگەنى بەلگىلى. ءبىراق شەنەۋنىكتەر مۇنى ۇمىتىپ كەتكەن سياقتى، - دەپ ايتتى بەيسەنبايەۆ ماجىلىستە.
«اق جول» دەپۋتاتتىق فراكسياسى ۇكىمەتكە مىناداي تالاپتار قويدى:
1) اكiمشiلiك قۇقىق بۇزۋشىلىق فاكتiسi انىقتالعانعا دەيiن ۋتيلالىم تولەمiن تولەگەن كاسiپكەرلەردi اكiمشiلiك قۋدالاۋدى توقتاتۋ، ولارعا قولدانىلعان سانكسيالاردى، ونىڭ iشiندە ەسكەرتۋلەردi جويۋ؛
2) «RecyclingCompany» ج ش س قىزمەتى توقتاتىلعان كەزەڭدە اۆتوكولىكتەر مەن تەحنيكالاردى ۋتيليزاسيالاۋ ءۇشىن جينالعان قاراجاتتىڭ پايدالانىلۋى تۋرالى اقپاراتتى جاريالاپ، اتالعان زاۋىتتىڭ قىزمەتىن قالپىنا كەلتىرۋ مەرزىمدەرى تۋرالى اقپارات بەرۋ؛
3) 4% مولشەرلەمەسىمەن اۆتونەسيە بەرۋدى جالعاستىرىپ، وسى ماقساتتارعا ۋتيلالىمنىڭ پايدالانىلماعان قاراجاتتارىن قوسىمشا ءبولۋ؛
4) ءتىپتى، بولماسا، كولىكتەردى ۋتيليزاسيالاۋ زاۋىتىنىڭ توقتاپ تۇرعان كەزەڭىندە ۋتيلالىم تولەمىن توقتاتۋدى قاراستىرۋ.