كونستيتۋسيالىق رەفورما اياسىندا قابىلدانىپ جاتقان ءاربىر نورما بولاشاق ۇرپاقتىڭ ەركىن دە ادىلەتتى قوعامدا ءومىر سۇرۋىنە تىكەلەي اسەر ەتەدى. بۇل پىكىردى پارلامەنت ءماجىلىسىنىڭ دەپۋتاتى، «اۋىل» پارتياسى فراكسياسىنىڭ جەتەكشىسى سەرىك ەگىزبايەۆ كونستيتۋسيالىق رەفورما كوميسسياسىنىڭ ءۇشىنشى وتىرىسىندا ايتتى.
دەپۋتات كونستيتۋسيالىق رەفورما ارقىلى «حالىق ۇنىنە قۇلاق اساتىن مەملەكەت» تۇجىرىمداماسىنىڭ زاڭدى ىرگەتاسىن قالانىپ جاتقانىن اتاپ ءوتتى.
«تاريحقا ۇڭىلسەك، بابالارىمىز «جەتى جارعىنى» قابىلداعاندا دا، كۇلتوبەنىڭ باسىندا كۇندە كەڭەس قۇرعاندا دا، باستى ماقسات – ەلدىڭ تۇتاستىعى مەن ادىلدىگى بولعان. بۇگىنگى ءبىزدىڭ ساياسي رەفورماداعى نەگىزگى مىندەتىمىز – حالىقتىڭ مۇددەسىن قورعايتىن، ۋاقىت سىنىنا توتەپ بەرەتىن ءمىنسىز زاڭنامالىق جۇيە قۇرۋ. بۇل − جاي عانا قۇجاتتاردى رەتتەۋ ەمەس، بۇل − ەل تاعدىرىن شەشەتىن جاۋاپتى قادام»، - دەدى سەرىك ەگىزبايەۆ.
ونىڭ پىكىرىنشە، قابىلدانىپ جاتقان ءاربىر نورما بولاشاق ۇرپاقتىڭ ەركىن دە ادىلەتتى قوعامدا ءومىر سۇرۋىنە تىكەلەي اسەر ەتەدى. وسى جولداعى ەڭ باستى ستراتەگيالىق قادام − ءبىرپالاتالى پارلامەنت مودەلىنە بەت بۇرۋ جانە سايلاۋ جۇيەسىن تولىق پروپورسيونالدى نەگىزگە، ياعني پارتيالىق تىزىمدەرگە كوشىرۋ بولماق.
«بۇرىن دەپۋتات جەكە تۇلعا رەتىندە عانا جاۋاپتى بولسا، ەندى ول ۇلكەن ساياسي ۇيىمنىڭ، ناقتى يدەولوگيا مەن پارتيالىق باعدارلامانىڭ اتىنان سويلەيدى. مەملەكەت باسشىسىنىڭ ءوز كۆوتالارىنان باس تارتىپ، وكىلەتتىلىكتەردى پارلامەنتكە بەرۋى − ساياسي پارتيالارعا ارتىلعان ۇلكەن سەنىم ءارى زور جاۋاپكەرشىلىك»، - دەپ تولىقتىردى دەپۋتات.
قاڭتار ايىندا «اۋىل» پارتياسىنىڭ دەپۋتاتتىق توبى بارلىق 20 ءوڭىردى ارالاپ، شارۋالارمەن كەزدەسكەن.
«ءتىپتى ەڭ شالعاي اۋىلداردىڭ وزىندە تۇرعىندار پارلامەنت پەن ۇكىمەتتىڭ جۇمىسىنا مۇقيات نازار اۋدارىپ وتىر. ال كونستيتۋسيالىق رەفورما بويىنشا تۇسكەن ەكى مىڭنان استام ۇسىنىس — جاي عانا ستاتيستيكا ەمەس. بۇل — قوعامنىڭ جاڭارۋعا، دەموكراتيالىق باستامالاردى كۇشەيتۋگە جانە ادىلدىككە دەگەن تىكەلەي سۇرانىسى. حالىق كۇتىپ وتىر، حالىق سەنىپ وتىر جانە بۇل ۇمىتتەردى اقتاماۋعا قۇقىمىز جوق. حالىقتىڭ اماناتى بىزدەن قۇقىقتىق جۇيەنى جاڭارتىپ قانا قويماي، وعان تۇبەگەيلى جاڭا، زاماناۋي مازمۇن بەرۋدى تالاپ ەتەدى»، - دەيدى كوميسسيا مۇشەسى.
سونىمەن بىرگە، ءماجىلىس دەپۋتاتى ەكولوگيالىق قۇندىلىقتاردى اتا زاڭ دەڭگەيىندە ۇلتتىق باسىمدىق رەتىندە بەكىتۋدى، كونستيتۋسيا پرەامبۋلاسىن جاڭا رەداكسيادا قابىلداۋدى، 31-باپقا ازاماتتاردىڭ تابيعاتتى ساقتاۋ مىندەتىن ەنگىزۋدى جانە 61-باپ بويىنشا ەكولوگيانى قورعاۋ زاڭدارىن رەتتەۋ قۇزىرەتىن نىعايتۋدى ۇسىنىپ وتىر.