اقپان ايىندا «Enbek» ەلەكتروندىق ەڭبەك بيرجاسىندا 121،8 مىڭ بوس جۇمىس ورنى تۋرالى مالىمەت جانە 132،3 مىڭ تۇيىندەمە ورنالاستىرىلدى.
وتكەن ايمەن سالىستىرعاندا بوس ورىندار سانى 23،2% - عا، ال تۇيىندەمە سانى 31% - عا (-59،6 مىڭ) ازايدى، دەپ حابارلايدى aqshamnews.kz.
وسىلايشا، ەڭ كوپ بوس جۇمىس ورىندارىن اقپارات جانە بايلانىس (40،9 مىڭ)، ءبىلىم بەرۋ (26،6 مىڭ) جانە دەنساۋلىق ساقتاۋ (9،3 مىڭ بوس جۇمىس ورنى) سالالارىنداعى كاسىپورىندار ورنالاستىردى. بۇل رەتتە دەنساۋلىق ساقتاۋ سالاسىندا سانيتارلار (1،5 مىڭ) جانە مەدبيكەلەر (1،3 مىڭ بوس جۇمىس ورنى) بارىنشا سۇرانىسقا يە بولدى.
سۇرانىستىڭ بىلىكتىلىك قۇرىلىمىندا جوعارى بىلىكتى ىزدەنۋشىلەر كوش باستاپ تۇر (بارلىق بوس جۇمىس ورىندارىنىڭ 59%)، ودان كەيىن ورتاشا بىلىكتى (29%) جانە بىلىكتىلىگى جوق (12%).
وڭىرلىك بولىنىستە بوس جۇمىس ورىندار سانىنىڭ ەڭ كوپ ءوسۋى باتىس قازاقستان (+301%)، شىعىس قازاقستان (+156%) جانە قاراعاندى (+76%) وبلىستارىندا بايقالادى. سونىمەن بىرگە بوس جۇمىس ورىندار سانىنىڭ ەڭ كوپ تومەندەۋى جەتىسۋ (-33%)، شىمكەنت قالاسى (-26%) جانە ماڭعىستاۋ وبلىسىندا (-25%) تىركەلدى.
ۇسىنىس تاراپىنان تۇيىندەمە سانىنىڭ ەداۋىر تومەندەۋى ماڭعىستاۋ وبلىسىندا (-46% نەمەسە 5،8 مىڭ بىرلىك)، جەتىسۋ وبلىسىندا (-45% نەمەسە 4،3 مىڭ بىرلىك) جانە جامبىل وبلىسىندا (-44% نەمەسە 6،3 مىڭ بىرلىك) بايقالدى.
گەندەرلىك قۇرىلىم بويىنشا وزگەرىستەر تىركەلمەگەن: ماسەلەن، ايەلدەر (53%) ءالى دە ەرلەرگە (47%) قاراعاندا ءجيى جۇمىس ىزدەيدى. 26-35 جاس ساناتى ەڭ بەلسەندى بولىپ قالادى (26،6%)، ودان كەيىن 36-45 جاس توبى (26،1%). 25 جاسقا دەيىنگى جاستاردىڭ ۇلەسى 14،9%، ال 55 جاستان اسقان ۇمىتكەرلەردىڭ ۇلەسى 12% قۇرايدى.
جالاقىعا كەلەتىن بولساق، ەڭ جوعارى جالاقى باس قۇرىلىسشىلارعا (ورتا ەسەپپەن 663 مىڭ تەڭگەدەن باستاپ)، تەلەكوممۋنيكاسياداعى جوبا جەتەكشىلەرىنە (~653 مىڭ تەڭگە) جانە ءونىمدى ازىرلەۋ جونىندەگى باسشىلارعا (~625 مىڭ تەڭگە) ۇسىنىلدى. سونىمەن قاتار IT-بولىمشەلەر باسشىلارىنىڭ (ورتا ەسەپپەن 1،3 ملن تەڭگەدەن باستاپ)، ەنەرگوجۇيە ينسپەكتورلارىنىڭ (~1،3 ملن تەڭگە) جانە گەوفيزيكتەردىڭ (~1،2 ملن تەڭگە) پوزيسيالارىنا ۇمىتكەر ىزدەنۋشىلەر ەڭ جوعارى جالاقىنى سۇرادى.
وسىلايشا 2025 جىلدىڭ اقپانىندا ەەب-دا تۇيىندەمەلەر سانى ازايعان كەزدە بوس جۇمىس ورىندار سانىنىڭ ايتارلىقتاي ءوسۋى بايقالدى. جوعارى بىلىكتى ماماندار، اسىرەسە IT، ءبىلىم بەرۋ جانە مەديسينا سالالارىندا ءالى دە سۇرانىسقا يە. بۇل رەتتە سالالىق جانە كاسىپتىك بولىنىستە جالاقى بويىنشا ۇسىنىستار مەن كۇتۋلەر اراسىنداعى الشاقتىق ساقتالادى.