كەيبىر ازاماتتار قانداي مەديسينالىق قىزمەتتەردى تەگىن مەديسينالىق كومەكتىڭ كەپىلدەندىرىلگەن كولەمى (تمككك) جانە مىندەتتى الەۋمەتتىك مەديسينالىق ساقتاندىرۋ (ءمامس) اياسىندا الۋعا بولاتىنىن بىلمەيدى. ال ەمحاناعا تىركەلۋ ارقىلى كوپتەگەن مەديسينالىق قىزمەتتى الىپ، قاراجاتتى ۇنەمدەۋگە بولادى.
وسى جايلى تولىعىراق بىزگە الەۋمەتتىك مەديسينالىق ساقتاندىرۋ قورى الماتى قالاسى فيليالىنىڭ باسپا ءسوز قىزمەتى ايتىپ بەردى.
الەۋمەتتىك مەديسينالىق ساقتاندىرۋ قورىندا ەمحاناڭىزدى ءبىلۋدىڭ قانشالىقتى ماڭىزدى ءارى ءتيىمدى ەكەنىن تاعى ءبىر مارتە ەسكە سالادى.
«ازاماتتاردان كەلىپ تۇسەتىن وتىنىشتەردىڭ باسىم بولىگىنە زەر سالساق، ولاردىڭ كوپشىلىگى قاي قىزمەتتەردىڭ ساقتاندىرۋسىز كورسەتىلەتىنىن، قايسىسى ءمامس پاكەتىنە كىرەتىنىن بىلمەيدى. شىن مانىندە ەمحانادا پروفيلاكتيكالىق تەكسەرۋدەن باستاپ كۇردەلى وپەراسيالارعا دەيىن كوپتەگەن قىزمەت ءتۇرىن الۋعا بولادى. ەگەر ءوز قۇقىعىڭىزدى ءبىلىپ، تىركەلگەن ەمحاناڭىزعا جۇگىنسەڭىز، مۇنىڭ ءبارى تەگىن كورسەتىلەدى»، – دەدى ءامسق باسپا ءسوز قىزمەتى.
قايدا بارۋ كەرەك؟
مەديسينالىق قىزمەتتەردى پايدالانۋ ءۇشىن ەڭ الدىمەن ءوز ەمحاناڭىزدى جانە ۋچاسكەلىك دارىگەرىڭىزدى ءبىلۋ ماڭىزدى.
ەگەر ءسىز بۇرىن-سوڭدى ەمحاناعا بارماعان بولساڭىز، تىركەلگەن مەديسينالىق ۇيىمدى eGov.kz پورتالىنداعى جەكە كابينەتتەن نەمەسە eGov Mobile ءموبيلدى قوسىمشاسىنان بىلە الاسىز.
كەيبىر وڭىرلەردە (مىسالى، iKomek) انىقتاما قىزمەتتەرى بار، ولار ءسىزدىڭ تۇراتىن مەكەنجايىڭىزعا سايكەس كەلەتىن مەديسينالىق ۇيىمدى انىقتاۋعا كومەكتەسەدى. سونىمەن قاتار، بۇل تۋرالى وڭىرلىك دەنساۋلىق ساقتاۋ باسقارمالارىنان دا كەڭەس الۋعا بولادى.
ايتا كەتەيىك، قاجەت بولعان جاعدايدا – جىلىنا ەكى رەت ءوز قالاۋىڭىز بويىنشا، سونداي-اق تۇرعىلىقتى جەردى اۋىستىرۋعا بايلانىستى نەمەسە تىركەۋ كامپانياسى كەزىندە ەمحانانى اۋىستىرۋعا بولادى(تولىعىراق http://zan.gov.kz/client/#!/doc/148575/rus). بۇل قىزمەت eGov.kz پورتالى ارقىلى كورسەتىلەدى.
بۇل – نەگىزگى مينيمۋم
قاي ەمحاناعا تىركەلگەنىڭىزدى بىلگەن سوڭ، سول جەرگە جۇگىنىپ، قاجەتتى مەديسينالىق كومەكتى الا الاسىز. ءار تىركەلگەن ازامات جىل سايىن ءوز ەمحاناسىندا پروفيلاكتيكالىق تەكسەرۋدەن وتۋگە قۇقىلى. بۇل اۋرۋلاردى ەرتە كەزەڭدە انىقتاۋعا جانە دەنساۋلىقتى ساقتاۋعا مۇمكىندىك بەرەدى.
ەڭ الدىمەن – فليۋوروگرافيا. ول وكپە اۋرۋلارىن ەرتە انىقتاۋ ءۇشىن جىلىنا ءبىر رەت جاسالادى.
سونىمەن قاتار، جىل سايىن دارىگەرگە دەيىنگى تەكسەرۋ كابينەتىنە بارۋ قاراستىرىلعان. وندا ارتەريالىق قىسىم، قانداعى قانت مولشەرى، بوي، سالماق جانە كورۋ وتكىرلىگى ولشەنەدى. ەگەر ءسىز مەديسينالىق اقپاراتتىق جۇيەنىڭ ءموبيلدى قوسىمشاسىن پايدالانساڭىز، ۋچاسكەلىك دارىگەرگە جازىلماس بۇرىن وسىنداي كابينەتكە بارۋ قاجەتتىلىگى تۋرالى حابارلامالار الىپ جۇرگەن بولارسىز. بۇل كابينەتكە جولداما دا، الدىن الا جازىلۋ دا قاجەت ەمەس، قىزمەت كورسەتۋ ادەتتە كەزەكپەن جۇزەگە اسىرىلادى.
ايەلدەر مىندەتتى تۇردە الدىن الا قارالۋ كابينەتىنە بارۋى كەرەك. وندا پروفيلاكتيكالىق تەكسەرۋ جۇرگىزىلىپ، شاعىمدار تۋرالى سۇرالادى، ونكوسيتولوگياعا جاعىندى الىنادى جانە جالپى ايەلدەردىڭ دەنساۋلىق جاعدايى باعالانادى.
سونىمەن بىرگە جاسىنا بايلانىستى ەرلەر مەن ايەلدەرگە، شاعىمنىڭ بار-جوعىنا قاراماي كورسەتىلەتىن ماڭىزدى مەديسينالىق قىزمەتتەردىڭ ءبىرى – سكرينينگتىك تەكسەرۋلەر. ولار جۇرەك-قان تامىرلارى، ونكولوگيالىق جانە باسقا دا اۋرۋلاردى ەرتە كەزەڭدە انىقتاۋعا باعىتتالعان.
ايتا كەتەرلىگى، وسىنداي تەكسەرۋلەردەن تۇراقتى تۇردە ءوتۋ ماسەلەلەردى ۋاقىتىلى انىقتاپ، اسقىنۋلاردىڭ الدىن الۋعا مۇمكىندىك بەرەدى.