الماتى قالاسى ءبىلىم باسقارماسىنىڭ باسشىسى ءلاززات جىلقىبايەۆا وڭىرلىك كوممۋنيكاسيالار قىزمەتى الاڭىندا ءسوز سويلەپ، پاندەميا كەزىندە جاڭا جىلدىق دەمالىستى قالاي وتكىزۋ كەرەكتىگى جونىندە ۇسىنىستار بەردى، دەپ حابارلايدى اlmaty-akshamy.kz
جاڭاجىلدىق مەرەكەلەر مەن دەمالىستار كوروناۆيرۋس اۋرۋىنىڭ ورشۋىنە اكەلمەۋى ءتيىس، دەپ مالىمدەدى ل. جىلقىبايەۆا. ول الماتىلىقتاردى ۆاكسينالاۋ قارقىنىن ارتتىرۋعا شاقىردى.
ايتا كەتسەك، الماتى مەكتەپتەرىندە قىسقى دەمالىس 2021 جىلدىڭ 30 جەلتوقسانىنان باستالىپ، 2022 جىلدىڭ 9 قاڭتارىنا دەيىن جالعاسادى. مەكتەپالدى دايارلىق سىنىپ وقۋشىلارى مەن ءبىرىنشى سىنىپ وقۋشىلارىندا قىستا قوسىمشا 7 كۇن كانيكۋل بولادى – 2022 جىلعى 7-13 اقپان ارالىعىندا.
كوللەدج ستۋدەنتتەرى ءۇشىن 10 قاڭتاردان باستاپ ءار ءتۇرلى ۋاقىتتا ەكى اپتالىق قىسقى دەمالىس قاراستىرىلعان.
«ءبىلىم بەرۋ ۇيىمدارىندا سانيتارلىق-ەپيدەميولوگيالىق قاۋىپسىزدىكتى قامتاماسىز ەتۋ ماسەلەسى ەرەكشە باقىلاۋدا. بارلىق بالاباقشالار، مەكتەپتەر مەن كوللەدجدەر Ashyq جوباسىنا قوسىلعان جانە قاجەتتى مولشەردە دەزينفەكسيالىق جانە انتيسەپتيكالىق قۇرالدارمەن قامتاماسىز ەتىلگەن»، - دەدى ۆەدومستۆو باسشىسى.
ءلاززات جىلقىبايەۆانىڭ ايتۋىنشا، مەرەكەلەر مەن دەمالىستار سىرقاتتانۋشىلىقتىڭ جاڭا كەزەڭىنە اكەلمەۋى ەرەكشە ماڭىزدى.
باسپا ءسوز ءماسليحاتىندا ءسوز سويلەگەن الماتى قالاسى ءبىلىم باسقارماسىنىڭ باسشىسى قازىرگى ۋاقىتتا بارلىق مەكتەپكە دەيىنگى ۇيىمدار 20-25 بالادان تۇراتىن توپتاردىڭ 100% تولۋ رەجيمىندە جۇمىس ىستەيتىنىن، بارلىق سانيتارلىق تالاپتار قاتاڭ ساقتالاتىنىن حابارلادى. بالاباقشالاردىڭ بارلىق قىزمەتكەرلەرى مەديسينالىق قارسى كورسەتىلىمدەرى بار قىزمەتكەرلەردەن باسقا ەگىلدى (6225 ادام ۆاكسينا الدى).
«بالاباقشالار جىل بويى جۇمىس ىستەيتىنىن ەسكەرە وتىرىپ، قىسقى مەرەكەلەر قارساڭىندا ءبىز اتا-انالار اراسىندا بالالاردى باقىلاۋ قاجەتتىلىگى جانە ولاردىڭ دەنساۋلىق جاعدايى تۋرالى ءتۇسىندىرۋ جۇمىستارىن كۇشەيتەمىز. بارلىق بالاباقشالاردا تاڭەرتەڭگى سۇزگى جۇمىس ىستەيدى، اۋرۋ جانە جرۆي بەلگىلەرى بار بالالار توپتارعا جىبەرىلمەيدى»، - دەپ تولىقتىردى ءلاززات جىلقىبايەۆا.
جىل باسىنان بەرى بالاباقشالاردا 122 بالا COVID-19-بەن اۋىردى. اۋرۋ بالالار انىقتالعان توپتاردا ەكى اپتالىق كارانتين جاريالاندى.
ءلاززات جىلقىبايەۆا مەكتەپتەردەگى جاعداي تۋرالى دا ايتىپ بەردى. ول اتاپ وتكەندەي، بۇگىندە وقۋشىلاردىڭ 95%-ى وفلاين (287 955 ادام) جانە 5%-ى ونلاين وقيدى. كۇن سايىن قاشىقتىقتان وقىتۋ فورماتىندا 15 155 وقۋشى ءبىلىم الادى.
وقۋ جىلى باستالعاننان بەرى 3869 وقۋشى كوروناۆيرۋسپەن اۋىردى، ولاردىڭ 2376-ى وفلاين وقىدى. ناۋقاستار قاشىقتان وقىتۋعا كوشىرىلدى.
سپيكەر قالانىڭ بارلىق مەكتەپتەرىندە تەمپەراتۋرانى ولشەۋ، ۆيزۋالدى تەكسەرۋ، جەلدەتۋ، كۆارستاۋ، ىلعالدى جيناۋ رەجيمدەرىن ساقتاۋدى قوسا العاندا، سانيتارلىق تالاپتاردىڭ ساقتالۋىنا تۇراقتى باقىلاۋ جۇزەگە اسىرىلاتىنىن حابارلادى. مەكتەپ قىزمەتكەرلەرى دە 100% ۆاكسينالاندى (19 837 ادام ەكپە الدى).