مايمىل شەشەگى ينفەكسياسىن جۇقتىرعانداردىڭ سانى 3413 ادامعا جەتكەن.
دۇنيەجۇزىلىك دەنساۋلىق ساقتاۋ ۇيىمى (ددسۇ) 2022 جىلدىڭ باسىنان بەرى 50 ەلدە 3413 ادامنىڭ مايمىل شەشەگى ينفەكسياسىن جۇقتىرعانىن جانە ءبىر ادامنىڭ قايتىس بولعانى تۋرالى اقپارات بەردى. بۇل تۋرالى سەيسەنبىدە جەنيەۆادا جاريالانعان ددسۇ اقپاراتتىق بيۋللەتەنىندە جازىلعان، دەپ حابارلايدى Almaty-akshamy.kz Almaty.tv سىلتەمە جاساپ.
«2022 جىلدىڭ 1 قاڭتارى مەن 22 ماۋسىمى ارالىعىندا ددسۇ-عا ۇيىمنىڭ بەس ايماعىندا ورنالاسقان 50 ەل مەن اۋماقتان مايمىل شەشەگىن جۇقتىرۋدىڭ 3 413 جاعدايى جانە وسى دەرتتەن ءبىر ادامنىڭ قايتىس بولعانى حابارلاندى»، - دەپ اتاپ ءوتتى ۇيىمنان.
الدىڭعى اقپاراتتىق بيۋللەتەن 17 ماۋسىمدا جاريالانعاننان بەرى سەگىز ەلدە ينفەكسياعا شالدىعۋدىڭ 1310 جاڭا جاعدايى انىقتالعان. مايمىل شەشەگىمەن اۋىراتىنداردىڭ كوپشىلىگى (86%) ەۋروپالىق ايماقتا تىركەلدى. ودان كەيىن تىزىمدە امەريكا (11%)، افريكا (2%)، شىعىس جەرورتا تەڭىزى (1%-دان از) جانە ازيا-تىنىق مۇحيتى (1%-دان از) تۇر. ەلدەردىڭ ىشىندە اۋرۋعا شالدىعۋدىڭ ەڭ كوپ جاعدايى ۇلىبريتانيادا تىركەلدى، وندا 793 ادام مايمىل شەشەگىنە شالدىققان. سونىمەن قاتار ەڭ كوپ ناۋقاستار سانى جاعىنان گەرمانيا (521)، يسپانيا (520)، پورتۋگاليا (317)، فرانسيا (277)، نيدەرلاندى (167) جانە اقش (142) تىركەلدى. قالعان 43 مەملەكەت پەن اۋماقتا اۋرۋعا شالدىعۋ جاعدايلارىنىڭ سانى 100-دەن اسپايدى.
ازىرگە ۆيرۋستان قايتىس بولۋى جاعدايى نيگەريادا عانا تىركەلدى. ددسۇ ەپيدەميولوگيالىق جاعدايدى ءجىتى باقىلاۋدا. ۇيىم اۋرۋدىڭ جاھاندىق تارالۋ ءقاۋپىن ورتاشا دەپ باعالاپ وتىر. ۇيىمنىڭ مايمىل شەشەگى جونىندەگى كوميتەتى 23 ماۋسىمدا جەنيەۆادا وتكەن وتىرىسىندا ىندەت حالىقارالىق دەڭگەيدە الاڭداۋشىلىق تۋدىراتىن توتەنشە جاعداي ەمەس دەگەن قورىتىندىعا كەلدى.