دۇنيەجۇزىلىك دەنساۋلىق ساقتاۋ ۇيىمىنىڭ (ددسۇ) ماماندارى A(H3N2) تۇماۋ ۆيرۋسىنىڭ، ياعني گونكونگ تۇماۋىنىڭ الەمدە جىلدام تارالىپ جاتقانىن مالىمدەدى، - دەپ حابارلايدى Aqshamnews.kz.
قازىرگى تاڭدا ۆيرۋس 30-دان استام ەلدە تىركەلگەن. بۇل تۋرالى ۇيىمنىڭ ەپيدەميالىق جانە پاندەميالىق قاتەرلەردى باسقارۋ دەپارتامەنتىندەگى جاھاندىق رەسپيراتورلىق قاۋىپتەر ءبولىمىنىڭ باسشىسى ۆەنسين چجان حابارلادى.
سولتۇستىك جارتىشاردا قىس مەزگىلىنىڭ باستالۋىمەن تۇماۋ جانە باسقا دا تىنىس جولدارى ۆيرۋستارىنا شالدىعۋ دەرەكتەرى كوبەيىپ وتىر. الايدا مامانداردىڭ ايتۋىنشا، الەمدىك دەڭگەيدەگى تۇماۋ جۇقتىرۋ كورسەتكىشى ازىرگە بولجامنان اسا قويعان جوق.
سونىمەن بىرگە ددسۇ A(H3N2) ۆيرۋسىنىڭ J.2.4.1 دەپ اتالاتىن جاڭا قوسالقى ءتۇرىنىڭ پايدا بولىپ، تەز تارالۋىنا ەرەكشە نازار اۋدارىپ وتىر.
ۆەنسين چجاننىڭ ايتۋىنشا، بۇل ۆيرۋس العاش رەت تامىز ايىندا اۋستراليا مەن جاڭا زەلانديادا انىقتالعان. كەيىننەن ول وڭتۇستىك امەريكادان باسقا الەمنىڭ بارلىق وڭىرلەرىندەگى 30-دان استام ەلدە تىركەلگەن.
ددسۇ وكىلىنىڭ مالىمەتىنشە، قازىرگى ەپيدەميولوگيالىق دەرەكتەر اۋرۋدىڭ اۋىر ءوتۋ جاعدايلارىنىڭ ارتقانىن كورسەتپەيدى. العاشقى زەرتتەۋلەر قولدانىستاعى ماۋسىمدىق تۇماۋعا قارسى ۆاكسينالاردىڭ جاڭا ۆيرۋسقا قارسى تيىمدىلىگىن ساقتاپ وتىرعانىن، ياعني اۋىر اسقىنۋلاردىڭ الدىن الىپ، اۋرۋحاناعا جاتقىزۋ ءقاۋپىن ازايتاتىنىن كورسەتكەن.
سونىمەن قاتار تۇماۋمەن بىرگە رەسپيراتورلىق-سينسيتيالدىق ۆيرۋس، كوروناۆيرۋس جانە رينوۆيرۋستار سياقتى باسقا دا تىنىس جولى ينفەكسيالارى اينالىمدا ءجۇر.
وسى جاعدايعا بايلانىستى ءبىرقاتار ەلدەردە دەنساۋلىق ساقتاۋ جۇيەسىنە قوسىمشا سالماق ءتۇسىپ وتىر. بۇل تەك تىنىس جولى اۋرۋلارىمەن اۋرۋحاناعا جاتقىزىلعاندار سانىنىڭ ارتۋىمەن عانا ەمەس، سونىمەن قاتار باسقا ماۋسىمدىق ۆيرۋستىق ينفەكسيالاردىڭ كوبەيۋىمەن دە بايلانىستى.