ينفەكسيانىڭ سالدارىنان 5،2 مىڭ ادام قايتىس بولدى.
دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس ادحانوم گەبرەيەسۋس سارسەنبىدە قىتايداعى ىندەتتىڭ جاڭا تولقىنىنا الاڭداۋشىلىق ءبىلدىردى جانە ەل بيلىگىن حالىقتىڭ وسال توپتارىن ۆاكسيناسيالاۋدى جەدەلدەتۋگە شاقىردى، دەپ حابارلايدى Almaty-akshamy.kz Inbusiness.kz cىلتەمە جاساپ.
"ددۇ-دا قىتايداعى جاعدايدىڭ ءورشۋى، اۋرۋدىڭ اۋىر جاعدايلارى تۋرالى دەرەكتەردىڭ كوبەيۋى ۇلكەن الاڭداۋشىلىق تۋدىرىپ، تالقىعا سالىنعان ماسەلە بولدى"، - دەدى گەبرەيەسۋس.
2020 جىلدان باستاپ جۇڭگو بيلىگى Covid-19-عا قارسى "نولدىك توزىمدىلىك" ساياساتىن ۇستاندى: ۆيرۋستىڭ تارالۋىن شەكتەۋ ءۇشىن لوكداۋندار مەن جۇقتىرعان ادامدارمەن بايلانىستا بولعاندار ءۇشىن مىندەتتى كارانتين قولدانىلدى.
وسى جىلدىڭ كوكتەمىندە گەبرەيەسۋس بۇل ساياساتتى سىنعا الىپ، جۇڭگو ساراپشىلارىمەن "ۆيرۋس تۋرالى جاڭا اقپاراتتى ەسكەرە وتىرىپ، باسقاشا كوزقاراس" قاجەتتىلىگىن تالقىلاعانىن ايتتى. اسپان استى ەلى بيلىگى "قىتايدىڭ الدىن الۋ جانە كۇرەسۋ شارالارى عىلىمي دالەلدەنگەن ءارى ءتيىمدى" دەپ ددۇ باسشىسىنىڭ مالىمدەمەسىن جاۋاپسىز قالدىردى.
الايدا، جەلتوقسان ايىنىڭ باسىندا جۇڭگو بيلىگى ىندەتتىڭ تارالۋىن بولدىرماۋ ءۇشىن قابىلدانعان ءبىرقاتار شەكتەۋلەردى الىپ تاستادى.