مەدينا ميرزويەۆا، «باربانگ» قازاقستان كۇردتەر قاۋىمداستىعى جانىنداعى انالار كەڭەسىنىڭ ءتوراعاسى:
– مەن سوڭعى توعىز جىلدان بەرى جەتىسۋ اۋدانىنداعى №496 سايلاۋ ۋچاسكەسىندە كوميسسيا مۇشەسى بولىپ جۇمىس ىستەيمىن. ەلىمىزدەگى تالاي ماڭىزدى وقيعالاردىڭ كۋاسى بولدىم. ءوزىم مەدەۋ اۋدانىنىڭ تۇرعىنى بولسام دا، جۇمىس ورنىما بايلانىستى جەتىسۋ اۋدانىنداعى سايلاۋ ۋچاسكەسىنە اۋىستىم. وسى جەردە ءوز داۋىسىمدى بەردىم. ءبىزدىڭ ەلدە سايلاۋ ادىلەتتى وتەدى دەپ ناقتى ايتا الامىن. قازاقستان رەسپۋبليكاسىنىڭ پاتريوت ازاماتى، قوعام بەلسەندىسى رەتىندە بارشا وتانداسىمدى سايلاۋعا اتسالىسۋعا شاقىرامىن.
قازاقستان تاۋەلسىزدىگىن العالى بەرى 8ء-ىنشى رەت پارلامەنت سايلاۋى وتكىزىلىپ وتىر. 2023 جىلدىڭ 19 قاڭتارىندا پرەزيدەنت قاسىم-جومارت توقايەۆ پارلامەنتتىڭ تومەنگى پالاتاسى جانە بارلىق دەڭگەيدەگى ءماسليحاتتى تاراتتى. كەزەكتەن تىس سايلاۋ داۋىس بەرۋ جۇيەسىنىڭ رەفورماسى اياسىندا بۇگىنگە، ياعني 19 ناۋرىزعا بەلگىلەندى. 2022 جىلدىڭ 19 ماۋسىمىندا وتكەن رەفەرەندۋمدا قابىلدانعان ءبىرقاتار كونستيتۋسيالىق تۇزەتۋلەرگە سايكەس قازاقستان اراعا 19 جىل سالىپ، ارالاس سايلاۋ جۇيەسىنە ورالدى.
كوپتەگەن بەدەلدى حالىقارالىق ۇيىمداردىڭ بەلسەندى مۇشەسى بولا وتىرىپ، قازاقستان ەركىن جانە ادىلەتتى سايلاۋ وتكىزۋ بويىنشا وزىنە العان بارلىق مىندەتتەمەلەردى بەرىك ۇستانادى.
مەملەكەت باسشىسى قاسىم-جومارت توقايەۆ بيلىك ينستيتۋتتارىن جاڭارتۋدىڭ سوڭعى كەزەڭى ءماجىلىس پەن ءماسليحات سايلاۋى ەكەنىن ايتقان بولاتىن. مۇنداعى باستى مىندەت – ەلدىڭ دامۋ جولىندا جاڭا باستامالاردى ۇسىنۋ جانە ولاردى ءتيىمدى ىسكە اسىرۋ. پرەزيدەنت ايتقانداي، سايلاۋدان كەيىن ەلىمىزدى جان-جاقتى جاڭعىرتۋ باعىتىنداعى جۇمىستار قارقىن الا تۇسەدى.
بولاشاقتا قازاقستان شىن مانىندە ۇلكەن ساياسي ليبەراليزاسياعا ۇمتىلاتىنىنا، اناعۇرلىم كۇشتى پارلامەنت قۇراتىنىنا سەنەمىن. پرەزيدەنت توقايەۆ ۇسىنعان رەفورمالاردىڭ بولاشاعى زور. بۇل شىن مانىندە كوپپارتيالىق جۇيەنى قۇرۋ ءۇشىن بەرىك نەگىز بولا الادى، قاداعالاۋدىڭ ءتيىمدى تەتىكتەرىن ەنگىزۋگە جانە قازاقستان ۇكىمەتىنىڭ ءارتۇرلى دەڭگەيلەرىندە ەسەپتىلىكتى ارتتىرۋعا كومەكتەسە الادى دەپ ويلايمىن.