نەگىزى تاۋارلاردى تاڭبالاۋ – قيىن ەمەس پروسەسس. ءبىراق ءوندىرىس اۋماعىندا ونى تاسىمالداۋ كەزىندە كودتاردىڭ زاقىمدالماۋىن نەمەسە ۋاقىت وتە كەلە ءوشىپ كەتپەۋى ءۇشىن ءبىرقاتار تالاپتاردى ساقتاۋ قاجەت، دەپ حابارلايدى aqshamnews.kz.
بۇگىن ءبىز دارى-دارمەكتەردى تاڭبالاۋ كەزىندە جىبەرىلەتىن ەڭ ءجيى كەزدەسەتىن بەس قاتەلىككە توقتالىپ، بولاشاقتا وسىنداي ولقىلىقتارعا جول بەرمەۋ ماقساتىندا نازارلارىڭىزعا ۇسىنامىز.
تاۋاردىڭ سەرياسى مەن جارامدىلىق مەرزىمى
كەيدە دارىلىك زاتتاردى اينالىمعا شىعارۋشىلار (ۋولس) تاڭبالاۋ جانە قاداعالاۋ جۇيەسىندە ەسەپ بەرۋ قۇجاتىن تولتىرۋ كەزىندە سەريا، پارتيا نەمەسە جارامدىلىق مەرزىمى تۋرالى مالىمەتتەردى قاتە كورسەتەدى. جارامدىلىق مەرزىمى ءورىسىن تولتىرعاندا، ايدىڭ سوڭعى كۇنىن كورسەتۋ قاجەت، سونداي-اق دارىلىك زاتتىڭ سەريا ءنومىرىن مۇقيات جانە دۇرىس كورسەتۋ كەرەك. قۇجاتتارعا ەنگىزىلگەن دەرەكتەر قاداعالاۋ جۇيەسىندە كورسەتىلەدى جانە وزگەرتىلمەيدى.
تاڭبالاۋ ستيكەرلەرىنىڭ باسىلۋ ساپاسى
تاڭبالاۋ ستيكەرلەرىن دۇرىس باسىپ شىعارۋ ءۇشىن تەحنيكالىق شارتتاردى ساقتاۋ قاجەت. باسىپ شىعارۋ كەزىندە قاتەلەردى تۇزەتۋ ءادىسى – ەسس-200 قولدانىلۋى كەرەك. بۇل ءادىس DataMatrix كودىنان اقپاراتتىڭ 30%-ى زاقىمدالسا دا، ونى قالپىنا كەلتىرۋگە مۇمكىندىك بەرەدى. DataMatrix باسىپ شىعارۋ ساپاسى ارنايى وقىلاتىن جۇيەگە بايلانىستى، ول ا (جوعارى) مەن F (اقاۋلى) ارالىعىنداعى بەس دەڭگەيگە بولىنەدى. مىندەتتى تالاپ – باسىپ شىعارۋ ساپاسى كەم دەگەندە س دەڭگەيىنەن تومەن بولماۋى كەرەك. باسىپ شىعارۋ دەڭگەيى تومەن بولعان جاعدايدا، تاڭبالاۋ كودىن وقۋ كەزىندە قيىندىقتارعا تاپ بولۋىڭىز مۇمكىن.
«بارلىق دارى-دارمەكتەر زاۋىتتا تاڭبالانادى، ول ءۇشىن قاجەتتى بارلىق رەسۋرستار – باسىپ شىعارۋ، تاڭبالاۋ بار. سونىمەن قاتار، بىزدە كەدەن قويماسى بار، وندا ءبىز تامىز ايىنان باستاپ جاڭا تاۋارلاردى الا باستادىق. تاڭبالاۋ جۇيەسى جۇمىس ىستەپ تۇر، ونى ءتۇسىنۋ وڭاي»، - دەيدى «الپەن فارما» ج ش س ماركەتينگ-مەنەدجەرى ستانيسلاۆ كيم.
ستيكەرلەردى ورنالاستىرۋ
تاڭبالاۋ قاتىسۋشىلارى ستيكەرلەردى تاۋار قاپتاماسىنا دۇرىس ورنالاستىرۋعا ءمان بەرۋى كەرەك. كود بار ستيكەردى ورنالاستىرعان كەزدە، دارىلىك زاتتىڭ اتاۋى نەمەسە دوزاسى سياقتى ماڭىزدى اقپاراتتاردى جاۋىپ تاستاماۋ قاجەت.
تاسىمالداۋ قوراپتارىن تاڭبالاۋ
تاۋارلاردى تاسىمالداۋعا ارنالعان قاپتاماعا سايكەستەندىرۋ كودتارىن قويۋ كەزىندە، ۋولس كودتى قوراپتىڭ الدىڭعى نەمەسە ءبۇيىر جاعىنا ورنالاستىرۋدى وزدەرى شەشەدى. مۇنداعى باستى شارت – وپەراتوردىڭ كودتاردى جىلدام جانە ىڭعايلى سكانەرلەۋىن قامتاماسىز ەتۋ.
ستاندارتتى ەمەس قاپتامالاردى تاڭبالاۋ
ءبىرتۇتاس تاڭبالاۋ جانە تاۋارلاردى قاداعالاۋ وپەراتورى دارىلىك پرەپاراتتار بانكالارىنىڭ قاقپاعىنا كودتى سالماۋدى ۇسىنادى، ويتكەنى تاسىمالداۋ كەزىندە كودتار ءوشىپ قالۋى مۇمكىن. جۇكتەۋ كەزىندە بانكالار بىر-بىرىنە ءۇيىلىپ قويىلادى، سونىڭ سالدارىنان ولاردىڭ اراسىنداعى ۇيكەلىس كەيبىر كودتاردى سكانەرلەۋ مۇمكىن ەمەستىگىنە اكەلۋى مۇمكىن.
ەستەرىڭىزگە سالا كەتەيىك، 2024 جىلدىڭ 1 شىلدەسىنەن باستاپ قازاقستاندا دارى-دارمەكتەردى مىندەتتى تۇردە تاڭبالاۋ ەنگىزىلدى. قولدانىستاعى ەرەجەلەرگە سايكەس دارى-دارمەكتەردى DataMatrix كودىمەن وندىرۋشىلەر مەن يمپورتتاۋشىلار تاڭبالايدى.