الماتىدا رەسپۋبليكا سارايى الدىنداعى اباي اتىنداعى الاڭدا قالا كۇنىن مەرەكەلەۋ اياسىندا مەگاپوليستىڭ دامۋىنا ۇلەس قوسقان ەڭ لايىقتى ازاماتتار اتاپ ءوتىلدى. ولارعا «الماتى قالاسىنىڭ قۇرمەتتى ازاماتى» اتاعى بەرىلدى. ارنايى ەرەكشە توسبەلگىلەردى الماتى اكىمى ەربولات دوسايەۆ تابىستادى جانە ولاردىڭ سوزبەن ەمەس ەرەن ەڭبەكتەرىمەن، ۇلگىلى ومىرلەرىمەن الماتىعا دەگەن شىنايى سۇيىسپەنشىلىگىن دالەلدەيتىنىن اتاپ ءوتتى.
بيىلعى جىلى قۇرمەتتى قالا تۇرعىندارىنىڭ ءتىزىمىن پەريناتولوگيا جانە بالالار كارديوحيرۋرگياسى ورتالىعىنىڭ ديرەكتورى گۇلنار نۇرلانوۆا، الماتى قالاسى بويىنشا قازاقستان حالقى اسسامبلەياسىنىڭ قوعامدىق كەلىسىم كەڭەسىنىڭ ءتوراعاسى احمەتجان شاردينوۆ، الماتى پەيزاجدارىمەن جانە قالاعا دەگەن سۇيىسپەنشىلىگىمەن تانىلعان سۋرەتشى الەكسەي ۋتكين، قازاقستان مەملەكەتتىك سىيلىعىنىڭ لاۋرەاتى ەربولات تولەپباي، اقىن، جۋرناليست جانە رەداكتور ۇلىقبەك ەسداۋلەت، كومپوزيتور ەرۇلان قاناپيانوۆ، تەحنيكا عىلىمدارىنىڭ دوكتورى جۇماباي بايناتوۆ، قازاقستان اۆياسياسىنىڭ ارداگەرى دميتريي دۋشيموۆ، سونداي-اق كاسىپكەر جانە مەسەنات نۇرلان سماعۇلوۆ تولىقتىردى.
سونىمەن قاتار، كەلەسى جىلى 90 جاسقا تولاتىن مەملەكەتتىك قۋىرشاق تەاترىنىڭ ۇجىمى ارنايى اتاققا يە بولدى. ايتپاقشى، وسى جىلدىڭ شىلدە ايىندا كاناداداعى العاشقى حالىقارالىق «وتتاۆا» فەستيۆالىندە ەڭ كونە قۋىرشاق تەاترى قۋىرشاقتار مەن ارتىستەر قاتىساتىن «رومەو مەن دجۋلەتتا» سپەكتاكلىن ۇسىنىپ، گران-پري جەڭىپ الدى.
مەملەكەتتىك قۋىرشاق تەاترىنىڭ اكتريساسى سابيلا ابۋيەۆا ۇجىم اتىنان جوعارى باعا بەرگەنى ءۇشىن العىسىن ءبىلدىردى.
«ءبىز ءۇشىن وسىنداي جوعارى اتاققا يە بولۋ ۇلكەن باقىت. مەن كوپ جىلدار بويى قىزمەت ەتىپ كەلە جاتقان مەملەكەتتىك قۋىرشاق تەاترىنا نازار اۋدارعانىڭىز ءۇشىن كوپ راحمەت. بۇل قالاداعى ەڭ كونە ونەر حرامدارىنىڭ ءبىرى. كەلەسى جىلى ءبىز توقسان جىلدىقتى اتاپ وتەمىز. قالالىق اكىمشىلىككە وسى ماڭىزدى كۇنگە دەيىن تەاتردا جوندەۋ جۇمىستارى جۇرگىزىلگەنىنە العىسىمدى بىلدىرەمىن. ەندى ءبىز كورەرمەندەردى جاڭارتىلعان تەاتردا قابىلدايمىز»، - دەپ اتاپ ءوتتى اكتريسا.
سۋرەتشى الەكسەي ۋتكين قالاعا دەگەن ريزاشىلىعى مەن سۇيىسپەنشىلىگىن ءبىلدىردى. ول قالانىڭ وركەن جايىپ كەلە جاتقانىن، كۇن سايىن جاقسى جاققا وزگەرەتىنىن، ىڭعايلى بولاتىنىن جان دۇنيەسىمەن كورەتىنىن اتاپ ءوتتى. «مەن قالانى بويايمىن، مەن ونى كورەمىن»، - دەدى ول.
ماراپاتتاۋ ءراسىمى قازاقستاندىق ەسترادا جۇلدىزدارىنىڭ قاتىسۋىمەن وتكەن كونسەرتپەن اياقتالدى.
- الماتى كۇنىن مەرەكەلەۋ اۋقىمدى وتۋدە-تۇڭعىش پرەزيدەنت ساياباعىندا بىرنەشە ساحنا اشىلدى. باستى ساحنادا ساعات 14:30-دان باستاپ روزا رىمبايەۆا مەن الماتى اكىمىنىڭ ەسترادالىق-سيمفونيالىق وركەسترى ونەر كورسەتەدى. سونداي-اق، Apple Fest فەستيۆالى وتەدى، وندا 1700 ليتر الما كومپوتى قايناتىلادى، بۇل گيننەستىڭ رەكوردتار كىتابىنا ەنگەن رەكورد.
- ارباتتا ساعات 11:00-دەن باستاپ «تۋعان كۇنىڭمەن، الماتى!» قالا تۇرعىندارى مەن قوناقتارى سۋرەتشىلەر كورمەسىنە، قولونەرشىلەر جارمەڭكەسىنە، شەبەرلىك ساباقتارىنا جانە باسقا دا ءىس-شارالارعا قاتىسا الادى. سونىمەن قاتار، مۇندا جىل سايىنعى كىتاپ فەستيۆالى ءوز جۇمىسىن جالعاستىرۋدا.
- ساعات 17:00-دە استانا الاڭىندا قازاقستاندىق ەسترادا جۇلدىزدارىنىڭ قاتىسۋىمەن Almaty Cover Show باستالادى. قالا كۇنىنە وراي ەلىمىزدىڭ ەڭ تانىمال جانە جاس ارتىستەرىنىڭ ءبىرى سادراددين ورتالىق ستاديوندا العاش رەت جەكە كونسەرت قويادى.
- قالا كۇنىن مەرەكەلەۋدىڭ سوڭعى اككوردى «كوكتوبە» تەلەمۇناراسىندا قۇتتىقتاۋ شامدارىن قوسۋ جانە «كوكتوبە» ساياباعىندا ساعات 21:00-دە ىسكە قوسىلاتىن مەرەكەلىك ساليۋت بولادى.