سيرەك كەزدەسەتىن جاعداي: الماتىلىق دارىگەرلەر جاڭا تەحنولوگيالاردىڭ كومەگىمەن اۋىر ناۋقاستى اياققا تۇرعىزدى
پاسيەنت الماتىداعى №7 قالالىق كلينيكالىق اۋرۋحاناعا اسا اۋىر حالدە جەتكىزىلگەن. وسىدان 10 جىلداي ۋاقىت بۇرىن ونىڭ جامباس بۋىنى الماستىرىلعان. جاراقات سالدارىنان سەمەنتسىز ادىسپەن بەكىتىلگەن پروتەز جامباس قۋىسىنا كىرىپ كەتكەن، دەپ حابارلايدى almaty-akshamy.kz اۋرۋحانانىڭ باسپا ءسوز قىزمەتىنە سىلتەمە جاساپ.
اۋرۋحانانىڭ پوليجاراقات بولىمشەسى مەڭگەرۋشىسى رامازان اسكەروۆتىڭ ايتۋىنشا، پروتەز ۇرشىق ويىعىنا كىرىپ كەتكەن. سالدارىنان جامباس قۋىسى قاتتى زاقىمدانعان. ناۋقاس بىردەن جان ساقتاۋ بولىمىنە جەتكىزىلدى.
جاعدايى تۇراقتانعاننان كەيىن بولىمشەگە اۋىستىرىلىپ، كلينيكا باسشىلارىنىڭ قاتىسۋىمەن كونسيليۋم وتكىزىلدى.
«مۇنداي جاعدايلار وتە سيرەك كەزدەسەدى. ءبىز ەكى كەزەڭنەن تۇراتىن وتا جاساۋ تۋرالى شەشىم قابىلدادىق. بىرىنشىسىندە ءىش قۋىسى ارقىلى سىنعان پروتەز بولشەكتەرىن الىپ شىقتىق. جاعدايى جاقسارعاننان كەيىن ريەۆيزيالىق ەندوپروتەز ورناتتىق. بۇل ورتوپەديالىق وپەراسيا ىشىندەگى ەڭ اۋىر وتالاردىڭ ءبىرى بولىپ سانالادى. ياعني، ءبىر رەت وتا جاسالعان جەردى تاعى قوزعاپ، وپەراسيا جاسادىق. تراۆماتولوگ-ورتوپەدتەر مەن انەستيزيولوگتار كومانداسىنىڭ بىلىكتىلىگىنىڭ ارقاسىندا كۇردەلى وتا ءساتتى ءوتتى»، - دەيدى رامازان اسكەروۆ.
پاسيەنت وتادان كەيىن ەكىنشى كۇنى توسەكتە وتىراتىن بولدى. ءۇشىنشى كۇننەن باستاپ ارنايى قۇرىلعىنىڭ كومەگىمەن جۇرە باستاعان.
«بۇل جوعارى تەحنولوگيالى وپەراسيا. پاسيەنتتىڭ بۇرىنعى بۋىنىنىڭ ورنىنا جاساندى پروتەز سالامىز. مۇنداي وپەراسيالاردى بارلىق كلينيكالار جاساي بەرمەيدى. ول ءۇشىن ارنايى دايىندىقتان وتكەن ماماندار مەن قۇرال-جابدىقتار قاجەت. ونىڭ ۇستىنە، قازاقستاندا ەندوپروتەزدەۋ وپەراسيالارىن مىندەتتى الەۋمەتتىك مەديسينالىق ساقتاندىرۋ ارقىلى تەگىن جاساتۋعا بولادى»، – دەپ قورىتتى دارىگەر.