داريعا نازاربايەۆا: قازاق ءتىلى جاس بۋىننىڭ ءتىلى بولىپ قالىپتاسۋى ءۇشىن ورتا كەرەك.
بۇل تۋرالى ول ق ر تۇڭعىش پرەزيدەنت – ەلباسى نۇرسۇلتان نازاربايەۆ مۋزەيىندە وتكەن «ۇلى دالا اڭىزى» اتتى قازاق كوميكستەرىنىڭ تۇساۋكەسەرىندە ايتتى. نۇرسۇلتان نازاربايەۆ قورىنىڭ ديرەكتورى داريعا نازاربايەۆا ەلدىڭ شىعارماشىل قاۋىمىن قازاق كوميكسىن دامىتۋ ىسىنە اتسالىسۋعا شاقىردى، حابارلايدى Almaty-akshamy.kz.
«بۇگىن ءبىز مەملەكەتتىك ءتىلدى ودان ءارى دامىتاتىن جۇمىستى قولعا الىپ وتىرمىز. نۇرسۇلتان نازاربايەۆ قورىنىڭ جۇمىسىنداعى نەگىزگى باعىتتاردىڭ ءبىرى – مەملەكەتتىك ءتىلدى دامىتۋ. ۇلكەن تالداۋ جۇرگىزدىك. مەكتەپكە دەيىنگى، مەكتەپ جاسىنداعى بالالارعا، جاسوسپىرىمدەرگە ارناپ جاسالعان قازاق تىلىندەگى ساپالى كونتەنت وتە از. زاماناۋي ەرتەگىلەر، مۋلتفيلمدەر جوق دەسە دە بولادى. جاس بۋىنعا ارنالعان كىتاپتار، تاريحي دۇنيەلەر، فيلمدەر دە جوق. جالعىز "Balapan" ارناسى جوق نارسەنىڭ ورنىن تولتىرۋعا تىرىسىپ جاتىر. ءبىراق ونىڭ دا دامۋىنا ۇلكەن قولداۋ كەرەك. ونىڭ ىشىندە الەۋەتى زور جەكە ارىپتەستەردىڭ ينۆەستيسياسى قاجەت. سوندىقتان ءبىز وسىنداي سالماقتى شارۋانى قولعا الىپ وتىرمىز»، - دەدى داريعا نازاربايەۆا
ونىڭ ايتۋىنشا، قالالى ورتادا ءوسىپ جاتقان، ۋربانيزاسياعا ۇشىراعان بالالارعا مەملەكەتتىك ءتىلدى ۇيرەتۋ وڭاي ەمەس.
«ۇيىمىزدە قازاقشا سويلەسىپ، بالالارىمىزدى قازاقشا بالاباقشالارعا، قازاق سىنىپتارى مەن مەكتەپتەرىنە بەرىپ جاتامىز. ءبىراق ءبىلىم وشاعى مەن ۇيدەن تىس جەردە ورىس ءتىلىنىڭ ۇلەسى ءالى دە باسىم. ءتىلى قازاقشا شىققان بالالار ورىس ءتىلىن وتە تەز مەڭگەرىپ كەتىپ جاتىر. ۋاقىتتىڭ شىندىعى وسى بولىپ تۇر. قازاق ءتىلى جاس بۋىننىڭ ءتىلى بولىپ قالىپتاسۋى ءۇشىن ورتا كەرەك. ول ورتا بالالاردىڭ انا تىلىنە دەگەن قىزىعۋشىلىعىن تەرەڭنەن قوزعاپ، سۇيىسپەنشىلىك قالىپتاستىرۋ كەرەك. بالالار ءۇشىن تىلدىك ورتا دەگەن ءبىرىنشى كەزەكتە كىتاپتار بولۋى ءتيىس. ءقازىر بالالار كىتاپ وقىمايدى دەپ ءجيى ايتىلادى. مەن ونىمەن كەلىسپەيمىن»، - دەدى قور ديرەكتورى.
«بىزگە بالالارعا ارنالعان مۋلتيپليكاسيالار، باعدارلامالار، فەستيۆالدەر، قازاق انيماسياسىن دامىتۋعا ينۆەستيسيا كەرەك. ءبىز بۇل ءىستى كوميكستەردەن باستاۋدى ءجون كوردىك. ول كوميكستەردىڭ باستاۋىندا ۇلتتىق كونە اڭىزدار مەن تاريحي شىعارمالار تۇر. ەندى وسىلاردى تولىقتىرىپ، جالعاستىرۋ ءۇشىن تالانتتى ادامداردى ورتاق ىسكە اتسالىسۋعا شاقىرامىز. ول ادامداردىڭ بىزگە جاڭا، زاماناۋي، سوڭى جاقسىلىقپەن تۇيىندەلەتىن، بالانىڭ ساناسىنا ادىلدىك پەن ىزگىلىك، مەيىرىم مەن سۇلۋلىق، شىنايى ماحاببات ءاردايىم جەڭەتىنىنە سەندىرە الاتىن ەرتەگىلەر اكەلۋى كەرەك. بۇگىنگى كورمە وسى ۇلكەن ءىستىڭ باستاۋى عانا»، - دەپ قوستى داريعا نازاربايەۆا.