جامبىل اتىنداعى قازاق مەملەكەتتىك فيلورمونياسىندا نۇرعيسا تىلەندييەۆ اتىنداعى اكەدەميالىق فولكلورلى-ەتنوگرافيالىق «وتىرار سازى» وركەستىرىنىڭ «داريعا، دومبىرامدى بەرشى ماعان!» اتتى كونسەرتى بولىپ ءوتتى.
نۇرعيسا تىلەندييەۆ كوزى تىرىسىندە ءداستۇرلى ونەردى ولتىرمەس ءۇشىن «وتىرار سازى» وركەستىرىن ءوز قولىمەن قۇرعانى بەلگىدى. دارا تالانتتىڭ كوزى كەتكەن سوڭ، وركەستىردىڭ تاعدىرىنا سەنىمسىزدىك تانىتقاندار دا بولدى. ءبىراق، حالقى باردا ساف ونەر جالعاسىن تاۋىپ، وركەستر ەسەپتىك كونسەرتىن جىل سايىن بەرىپ وتىرۋدى ۇردىسكە اينالدىردى. بۇل جولى دا عاسىردان-عاسىرعا جەتىپ جاتقان ونەر يەسى نۇرعيسا تىلەندييەۆتىڭ شىعارماشىلىعىنا ارنالعان كەشتى تاماشالاۋعا كەلگەن كورەرمەننىڭ قاراسى قالىڭ بولدى. ساعىنىشقا تولى كەش ن.تىلەندييەۆتىڭ «اتا تولعاۋى» كۇيىمەن اشىلدى.
جالپى، بۇل جولعى كەشتىڭ وزىندىك ەرەكشەلىگى- باعدارلامادا نۇرعيسا تىلەندييەۆ پەن ونىڭ ومىرلىك قوساعى بولعان داريعا تىلەندىكەلىنىنىڭ اقىن مۇقاعالي ماقاتايەۆتىڭ ولەڭدەرىنە جازىلعان اندەرى عانا ورىندالدى. كونسەرتكە اقيىق اقىننىڭ دا ۇرپاقتارى قاتىسىپ وتىردى. وسىلايشا «توندەمنىڭ» اسەرلى اۋەنى، سىرلى سازى كەزەكتەسە ورىندالىپ، تىڭدارمانىن سىرلى الەمگە جەتەلەپ، كەرەمەت كۇيگە بولەدى.
- بىردە ءبىزدىڭ ۇيگە مۇقاعالي ماقاتايەۆ كەلدى. مۇقاعالي نۇراعاڭدى سىرتتاي جاقسى بىلگەنىمەن، ەكەۋى جاقىن تانىس ەمەس ەكەن. ءبىراز اڭگىمەدەن سوڭ، نۇراعاڭ «داح، دومبىرامدى بەرشى. مۇقاعاليعا كۇي ورىنداپ بەرەيىن»،- دەگەنى. ءالى ەسىمدە «اققۋدى»، سوسىن « ءالقيسانى» تارتتى. ەرتەڭىنە مۇقاعالي «داريعا، دومبىرامدى بەرشى ماعان» دەگەن ولەڭىن جازىپ اكەلدى. ءسوزىن وقىپ شىققان نۇراعان دەرەۋ ءان جازدى. ءجاي عانا اۋەن ەمەس، كلاسسيكا!. سودان ەكەۋى ءبىر اي بويى ءان شىعاردى. مۇقاعالي قايتىس بولارىنان ءبىراز كۇن بۇرىن «ەسىڭە مەنى العايسىڭ» دەگەن ولەنىن جازىپ، نۇراعاڭا تاستاپ كەتكەن ەكەن. وعان دا ءان جازدى. جالپى، نۇراعاڭ كەتكەن سوڭ، مەن ءۇشىن ساعىنىشقا تولى كەزەڭ باستالدى. ول كىسى 1998 جىلى قايپاس ساپارعا اتتانسا، مەن 2000 جىلدان باستاپ وز-وزىمنەن مۋزىكا جازىپ كەتتىم. بۇل دا ءبىر اللانىڭ قۇدىرەتى شىعار. مۋزىكا تۋعان سايىن جازا بەردىم. مەنىڭ ويىمشا بۇل تەككە ەمەس، نۇراعاڭ كوكتەن جىبەرىپ جاتىر- اۋ،-دەيدى قازاقستاننىڭ ەڭبەك سىڭىرگەن ءارتىسى داريعا تىلەندىكەلىنى.
ءيا، ەرەكشە دارىن يەسى ن.تىلەندييەۆتىڭ ءبىزدىڭ ارامىزدان كەتكەنىنە دە ءبىراز ۋاقىت وتكەن ەكەن. وسىناۋ ۋاقىت ىشىندە نۇراعاڭنىڭ كوزىندەي بولعان «وتىرار سازى» ءوز بيىگىنەن ءبىر ساتى دا تومەندەگەن ەمەس. قايتا ونىڭ ونەرى حاس تالانتتىڭ ءور مىنەزىندەي تاسىپ، بيىكتەپ بارادى. ءىزىن باسقان ۇرپاعى ءدىنزۋحراسى باردا نۇرعيسا تىلەندييەۆتىڭ وتىنىڭ وشپەسى، ونەرىنىڭ ولمەسى انىق.