الماتى اكىمى دارحان ساتىبالدى جۇمىس ساپارى بارىسىندا الماتى يندۋستريالىق ايماعىندا ورنالاسقان كاسىپورىنداردىڭ قىزمەتىمەن تانىسىپ، ونىڭ ءارى قاراي دامۋىنىڭ نەگىزگى باسىمدىقتارىن ايقىندادى. اسىرەسە، وندىرىستىك تيىمدىلىككە، ەكسپورتتىق الەۋەتتى ارتتىرۋعا، ينۆەستيسيا تارتۋ مەن جەردى ءتيىمدى پايدالانۋعا ەرەكشە نازار اۋداردى.
ساپار بارىسىندا اكىم ەڭ اۋەلى اۋىل شارۋاشىلىعى مەن كوممۋنالدىق قىزمەتتەرگە ارنالعان پوليەتيلەن قۇبىرلارى مەن تامشىلاتىپ سۋارۋ جەلىلەرىن وندىرەتىن «يرريگاتور كازاحستان» ج ش س زاۋىتىنا ايالدادى. 2024 جىلدان باستاپ كاسىپورىن جوعارى جانە تومەن قىسىمدى پوليەتيلەننەن ءونىم شىعارىپ، قازاقستانمەن قاتار رەسەي مەن قىرعىزستانعا دا جەتكىزىپ وتىر. جوبانىڭ قۇنى 2،7 ملرد تەڭگە، وندىرىستىك قۋاتى جىلىنا 270 ملن مەتر قۇبىر، بۇل شامامەن 3،9 ملرد تەڭگەنىڭ ءونىمى.
كومپانيا باسشىلىعى ءوندىرىس كولەمىن ۇلعايتىپ، كاۆكاز ەلدەرى مەن وزبەكستان نارىعىنا شىعۋدى جوسپارلاپ وتىرعانىن ايتتى. اكىم ءونىم تۇرلەرىن كەڭەيتىپ، قۇبىرلاردى سۋارۋ جانە اباتتاندىرۋ جۇيەسىندە قولدانۋ مۇمكىندىگىن قاراستىرۋدى ۇسىندى. بۇل الماتىنىڭ يندۋستريالىق ايماعىنىڭ ىشىندە دە، جالپى قالا اۋماعىندا دا ماڭىزدى.
«جەر تەلىمىن ءبولۋ كەزىندە ءونىم ءتۇرى، ينۆەستيسيا كولەمى جانە ىسكە قوسۋ مەرزىمى بويىنشا كەپىلدىكتەر قاجەت. بۇل تالاپتار ناقتى ەسەپكە الىنادى»، – دەدى دارحان ساتىبالدى.
شاھار باسشىسى ولان كەيىن ساۋلەتتىك قاسبەتتەر، تەرەزەلەر، ۆيتراجدار مەن اينەك پاكەتتەر شىعاراتىن «جارىق ءمولدىر كونسترۋكسيالار كومبيناتى» ج ش س زاۋىتىنا باردى. جوبانىڭ قۇنى 3،3 ملرد تەڭگە، جىلدىق قۋاتى 475 مىڭ شارشى مەتر ءونىم، 275 جۇمىس ورنى اشىلعان. ءونىم ەلىمىزدىڭ ىشكى نارىعىندا، اسىرەسە الماتى مەن وزگە دە وڭىرلەردە جوعارى سۇرانىسقا يە.
تۇراقتى تاپسىرىستارعا قاراماستان، اكىم ءوندىرىستى كەڭەيتىپ، ينۆەستيسيا كولەمىن ارتتىرۋدى جانە زاۋىت ماڭىن كورىكتەندىرۋدى تاپسىردى. سونىمەن قاتار، كاسىپورىنعا قوسىمشا الاڭ ءبولۋ مۇمكىندىگىن قاراستىرۋ جۇكتەلدى.
ساپار اياسىندا قالا باسشىسى بوياۋ-جابىن ماتەريالدارىن شىعاراتىن «بسف» ج ش س زاۋىتىنىڭ جۇمىسىمەن دە تانىستى. 2020 جىلدان بەرى جۇزەگە اسىپ جاتقان جوبانىڭ قۇنى 1،8 ملرد تەڭگە، 120 جۇمىس ورنى اشىلعان. جىلدىق ءوندىرىس كولەمى 10 795 توننا، بۇل وتاندىق نارىقتىڭ شامامەن 15%-ى. اكىم بۇل ءوندىرىستىڭ قۇرىلىس سالاسىنا قاجەتتى وتاندىق ونىممەن قامتاماسىز ەتۋدە جانە يمپورتتىق تاۋەلدىلىكتى ازايتۋدا ماڭىزدى ەكەنىن اتاپ ءوتتى.
ساپار سوڭىندا اكىم ۇلكەن ديامەترلى بولات قۇبىرلار شىعاراتىن «Asia Steel Pipe Corporation» ج ش س زاۋىتىنا باردى. 33 ملرد تەڭگەگە باعالانعان جوبا اياسىندا 304 ادام جۇمىسپەن قامتىلعان. زاۋىت جىلىنا 100 مىڭ توننا ءونىم شىعارۋعا قاۋقارلى. دەگەنمەن، قازىرگى ۋاقىتتا سۇرانىستىڭ ازدىعىنا بايلانىستى كاسىپورىن ۋاقىتشا توقتاپ تۇر.
اكىم كاسىپورىن ءونىمىن قالانىڭ ينفراقۇرىلىمدىق جوبالارىنا ەنگىزۋ جولدارىن قاراستىرۋدى جانە رەسپۋبليكالىق دەڭگەيدەگى ءىرى تاپسىرىس بەرۋشىلەرمەن ارىپتەستىك ورناتۋدى تاپسىردى.
سونداي-اق، يندۋستريالىق ايماقتا جاڭا جوبالاردى ىرىكتەۋ بارىسىندا قوسىلعان قۇنى جوعارى، زاماناۋي تەحنولوگيالاردى قولداناتىن جانە ەكسپورتقا باعىتتالعان وندىرىستەرگە باسىمدىق بەرىلەتىنى ايتىلدى.
قازىرگى تاڭدا الماتى يندۋستريالىق ايماعىندا جالپى قۇنى 557،6 ملرد تەڭگە بولاتىن 118 جوبا جۇزەگە اسىرىلىپ جاتىر. 2016 جىلدان بەرى 41 كاسىپورىن ىسكە قوسىلىپ، 15 مىڭنان استام جۇمىس ورنى اشىلدى. 2025 جىلى تاعى 224،9 ملرد تەڭگە كولەمىندەگى 14 ءوندىرىستى ىسكە قوسۋ كوزدەلگەن.
جۇمىس ساپارىنىڭ قورىتىندىسى بويىنشا دارحان ساتىبالدى مىناداي تاپسىرما بەردى:
• جۇمىس ىستەپ تۇرعان كاسىپورىنداردىڭ ءونىم تۇرلەرى مەن وتكىزۋ نارىقتارىن كەڭەيتۋگە كۇش سالۋ؛
• جەر تەلىمدەرىن ءتيىمدى پايدالانۋ مەن ينۆەستيسيالىق مىندەتتەمەلەردى ورىنداۋعا قاتىستى تالاپتاردى كۇشەيتۋ؛
• تيىمدىلىگى دالەلدەنگەن وندىرىستەرگە قوسىمشا الاڭ بەرۋ مۇمكىندىكتەرىن قاراستىرۋ؛
• شاعىن ونەركاسىپ پاركتەرىن دامىتۋ، يندۋستريالىق ايماقتىڭ ينفراقۇرىلىمىن جاقسارتىپ، كوگالداندىرۋ جۇمىستارىن ارتتىرۋ.
«الماتىنىڭ مۇمكىندىگى مول، ينفراقۇرىلىم، مامان دا، نارىق جانە ينۆەستيسيالىق الەۋەت تە بار. يندۋستريالىق ايماق تەك اتاۋ ءۇشىن ەمەس، ناقتى وندىرىستىك سەرپىن بەرەتىن اۋماققا اينالۋعا ءتيىس. ءبىز ءارى ەكونوميكادا، ءارى قالانىڭ دامۋىندا ناقتى ناتيجە كۇتەمىز»، – دەدى دارحان ساتىبالدى.