بۇقارالىق اقپارات قۇرالدارى قىزمەتكەرلەرى كۇنى قارساڭىندا قالا باسشىسى دارحان ساتىبالدى جۋرناليستەردى كاسىبي مەرەكەلەرىمەن قۇتتىقتادى، سونداي-اق Almaty TV تەلەارناسىنىڭ قىزمەتىمەن تانىستى.
الماتى اكىمىنە قولدانىستاعى جانە جاڭا مەديا جوبالار ۇسىنىلدى، ءوندىرىس پروسەسى، سونداي-اق سيفرلىق پلاتفورمالاردى دامىتۋ جوسپارى باياندالدى. زاماناۋي حابار تاراتۋ فورماتتارىن ەنگىزۋگە جانە اۋديتوريانى كەڭەيتۋگە ەرەكشە نازار اۋدارىلدى.
كەزدەسۋ بارىسىندا دارحان ساتىبالدى تىلشىلەرمەن، رەداكتورلارمەن، وپەراتورلارمەن جانە تەحنيكالىق ماماندارمەن جىلى شىرايلى اڭگىمەلەسىپ، بۇقارالىق اقپارات قۇرالدارى جۇمىسىنىڭ قالا ومىرىندەگى ماڭىزدىلىعىن اتاپ ءوتتى، قىزمەتكەرلەرگە ماماندىققا ادالدىعى ءۇشىن العىس ايتتى.
«بۇقارالىق اقپارات قۇرالدارى قىزمەتكەرلەرىنىڭ كاسىبي مەرەكەسى قارساڭىندا سىزدەرمەن جۇزدەسىپ، ەڭبەكتەرىڭىز ءۇشىن العىس ايتىپ، كاسىبي مەرەكەلەرىڭىزبەن قۇتتىقتاعىم كەلدى. «Almaty TV» تەك الماتىنىڭ ەمەس، بۇكىل رەسپۋبليكا كولەمىندەگى جەتەكشى تەلەراديوكومپانياعا اينالۋى قاجەت. بۇگىنگى كەزدەسۋ تۇيتكىلدى ماسەلەلەردى ورتاعا سالىپ، وي ءبولىسىپ، سىزدەردىڭ ۇسىنىس-پىكىرلەرىڭىزدى تىڭداۋعا تاپتىرماس مۇمكىندىك»، – دەدى دارحان ساتىبالدى.
ول Almaty TV الماتىنىڭ عانا ەمەس، رەسپۋبليكالىق دەڭگەيدەگى جەتەكشى تەلەراديوكومپانيا بولۋى ءتيىس ەكەنىن اتادى.
ونىڭ ايتۋىنشا، قازىرگى زاماندا ب ا ق اشىق ءارى اقپاراتتىق قوعام قۇرۋدا شەشۋشى ءرول اتقارىپ وتىر.
«سىزدەردىڭ ەڭبەكتەرىڭىز مەملەكەت پەن حالىق اراسىنداعى سەنىمدى نىعايتۋعا ىقپال ەتەدى. سىزدەرگە شىنايىلىق، شابىت جانە جاڭا كاسىبي بەلەستەردى باعىندىرۋدى تىلەيمىن»، – دەدى قالا اكىمى.
ايتا كەتەيىك، Almaty TV 1999 جىلى قۇرىلعان جانە ەلىمىزدەگى ەڭ كونە تەلەارنالاردىڭ ءبىرى. سوڭعى 3 جىلدا Almaty TV رەسپۋبليكالىق مارتەبەگە يە بولدى، رەبرەندينگ وتكىزدى، باس ستۋديا پاۆيلونىن جاڭارتتى جانە حابار تاراتۋدىڭ بارلىق تۇجىرىمداماسىن تۇبەگەيلى وزگەرتتى.
سونىڭ ناتيجەسىندە تەلەارنا رەيتينگى 2 ەسە ءوستى، جاڭارتىلعان سايتتىڭ قارالىمى 5 ەسەگە ارتتى. مەدياسەللەر جەلىسى بويىنشا كوممەرسيالىق كىرىس 3 ەسە ۇلعايدى. تەلەارنانىڭ مەملەكەتتىك تىلدە شىعارىلعان ءوز ءوندىرىسىنىڭ ۇلەسى 88%-عا جەتتى.