فەيك اقپاراتتى تاراتۋدىڭ تۇپكى ماقساتى بەلگىلى
اقپارات جانە قوعامدىق دامۋ ءمينيسترى دارحان ءقىدىرالى جەلىدەگى پاراقشاسىندا سوڭعى كەزدەرى اشىق ارانداتۋشىلىق باعىتتاعى، مانيپۋلياسيا اقپاراتتار كوبەيىپ كەتكەنى تۋرالى جازدى، دەپ حابارلايدى Almaty-akshamy.kz.
«قازاقستاندا بولماعان وقيعانى وسى جەردە بولدى دەپ كورسەتۋ، فەيك اقپاراتتى تاراتۋدىڭ تۇپكى ماقساتى بەلگىلى. ءقازىر ەلىمىزدە ءوتىپ جاتقان حالىقارالىق ءىس-شارالار مەن كوپتەگەن ەلدىڭ ليدەرلەرىنىڭ كەلۋى، حالىقارالىق دەڭگەيدەگى ءتۇرلى تاريحي ماڭىزدى شەشىمدەردىڭ قابىلدانۋى قازاقستان يميدجىنە وڭ اسەر ەتەرى بەلگىلى. ال الگىندەي جالعان، ادەيى جاسالعان اقپاراتتىق شابۋىلدار ۋىزداي ۇيىپ وتىرعان ۇلتتىڭ بەرەكەسىن كەتىرۋ ءۇشىن ادەيى جاسالاتىنى انىق. سوندىقتان اسىرەسە، ارىپتەستەرىمە الەۋمەتتىك جەلىدەگى تەكسەرىلمەگەن اقپاراتتارعا سەرگەك قاراپ، تەك قانا دايەكتى مالىمەتتەرگە سۇيەنۋىن سۇرايمىز»، - دەپ جازدى مينيستر پاراقشاسىندا.