ۋنيۆەرسيتەت باسشىلىعىنىڭ قاتىسۋىمەن اشىق ساباقتار جالعاسا بەرمەك.
الماتى قالاسى مەدەۋ اۋدانىنداعى №19 ورتا مەكتەپتە اباي اتىنداعى قازۇپۋ-دىڭ ماتەماتيكا، فيزيكا جانە ينفورماتيكا ينستيتۋتىنىڭ 4ء-شى كۋرس ستۋدەنتى اسەم ساعىمبەك ماتەماتيكا پانىنەن اشىق ساباق ءوتتى، دەپ حابارلايدى Almaty-akshamy.kz
اشىق ساباققا اباي اتىنداعى قازۇپۋ رەكتورى دارحان ءبىلالوۆ، مەدەۋ اۋداندىق ءبىلىم بەرۋ ءبولىمىنىڭ باسشىسى اعايشا ساپاروۆا، №19 جالپى ءبىلىم بەرەتىن مەكتەپتىڭ ديرەكتورى ايىمگۇل يمانعالييەۆا، ديرەكتوردىڭ وقۋ ءىسى جونىندەگى ورىنباسارى شىڭعىس ءابدىماناپ، سونداي-اق پەداگوگيكالىق پراكتيكا جەتەكشىسى لاريسا جادىرايەۆا قاتىستى.
رەكتور دارحان ءبىلالوۆ بولاشاق پەداگوگپەن كەرى بايلانىس بارىسىندا پراكتيكانتتىڭ پەداگوگيكالىق ادىس-تاسىلدەردى قولدانۋى تۋرالى ءوز پىكىرىن ايتىپ، تاجىريبەسىمەن ءبولىستى. ول №19 مەكتەپ وقۋشىلارىمەن جانە ءبىر جىلدىق تاجىريبەدەن ءوتىپ جاتقان ستۋدەنتتەرمەن كەزدەسىپ، ءتۇرلى ماسەلەلەر بويىنشا پىكىر الماستى. رەكتور ۋنيۆەرسيتەت باسشىلىعىنىڭ قاتىسۋىمەن وتەتىن اشىق ساباقتار توپتاماسى جالعاساتىنىن اتاپ ءوتتى. بارلىق پرورەكتورلار مەن ينستيتۋت ديرەكتورلارى ەكى اپتا بويى 2021 جىلدىڭ 10 جەلتوقسانىنا دەيىن جالعاساتىن اشىق ساباقتارعا قاتىسادى.
اباي ۋنيۆەرسيتەتىنىڭ باسشىسى دارحان ءبىلالوۆ ستۋدەنتتەردىڭ ۇزدىكسىز تاجىريبەدەن ءوتۋىن قامتاماسىز ەتۋ ءۇشىن ۋنيۆەرسيتەت پەن ورتا ءبىلىم بەرۋ ورىندارى اراسىنداعى بىرلەسكەن جۇمىستىڭ ماڭىزدىلىعىن اتاپ ءوتتى. بۇل ءىس-شارالار اباي اتىنداعى قازۇپۋ مەن الماتى قالاسى ءبىلىم باسقارماسى اراسىنداعى ىنتىماقتاستىق تۋرالى مەموراندۋم اياسىندا جۇزەگە اسىرىلۋدا.
مەموراندۋم اياسىندا ۋنيۆەرسيتەت ستۋدەنتتەرىنە كاسىبي داعدىلارىن دامىتۋعا، تاعىلىمدامادان وتۋگە جانە تۇلەكتەردىڭ جۇمىسقا ورنالاسۋىنا كومەك كورسەتەدى، جاستار ساياساتى سالاسىنداعى ءتيىمدى ىنتىماقتاستىق ەسەبىنەن زياتكەرلىك ەليتانى قالىپتاستىرۋعا باعىتتالعان باسىمدىقتاردى، بىرلەسكەن مادەني-بىلىم بەرۋ باعدارلامالارى مەن جوبالارىن جۇزەگە اسىرۋ، جوعارى وقۋ ورىندارى مەن جالپى ءبىلىم بەرەتىن مەكتەپ وقىتۋشىلارىنىڭ بىلىكتىلىگىن ارتتىرۋ جۇمىستارى جۇرگىزىلەدى.