ەكى كۇننەن سوڭ باتىرىمىز جۇدىرىقتاسادى
18 جەلتوقسان كۇنى 16:30-دا ەلوردادا جاقسىلىق ۇشكەمپىروۆ اتىنداعى Jekpe Jek سارايىندا وليمپيادا چەمپيونى دانيار ەلەۋسىنوۆ پەن ارگەنتينالىق حۋان ەرنان لەال جارتىلاي ورتا سالماقتاعى IBO چەمپيوندىق بەلبەۋىنە تالاسقا تۇسەدى، دەپ حابارلايدى Almaty-akshamy.kz
حالىقارالىق بوكس كەشىندەگى ەكىنشى باستى كەزدەسۋدە اسا اۋىر سالماق وكىلى، قوس وليمپيادا قولاسىنىڭ يەگەرى يۆان دىچكو (10-0، 10 كو)، تاجىريبەلى رەسەيلىك بوكسشى الەكساندر ۋستينوۆپەن (36-5-1، 27 كو) قولعاپ تۇيىستىرەدى. ال تانىمال بوكسشى جانقوش تۇراروۆ (24-0، 17 كو) مىسىرلىق ابدۋمونەم سايدپەن (22-1-1، 11 كو) جەكپە-جەك وتكىزبەك. ودان بولەك، بوكس كەشىندە ەلىمىزگە تانىمال داۋرەن ەلەۋسىنوۆ، داۋلەت داۋكەنوۆ، ايدار شارىبايەۆ جانە انگەلينا لۋكاس سەكىلدى بوكسشىلار كۇش سىناسادى.
سونىمەن قاتار ەل كاسىپقوي بوكسىنىڭ تاريحىندا اراعا 20 جىل سالىپ العاش رەت 55،3 كەلى سالماق دارەجەسى بويىنشا، ەرجان زاليلوۆ پەن ەسكەندىر حارسان، قازاقستان چەمپيونى اتاعىنا KFPB تيتۋلى ءۇشىن تالاسقا تۇسەدى. بوكس كەشى اياسىندا جانكۇيەرلەر 13 قازاقستاندىق بوكسشىنىڭ ونەرىن تاماشالاي الادى.
«قازاقستاننىڭ تاۋەلسىزدىگى قۇتتى بولسىن! وسىنداي ماڭىزدى كۇن ءۇشىن، قوناقجايلىلىقتارىڭىز ءۇشىن وتە قۋانىشتىمىن! جاڭا تيتۋل ءۇشىن جەكپە-جەككە وسىلاي جاعداي ۇيىمداستىرعاندارىڭىز ءۇشىن كوپ راحمەت!» - دەدى ارگەنتينالىق حۋان ەرنان لەال ەلوردادا وتكەن باسپا ءسوز ءماسليحاتىندا.
ءوز كەزەگىندە دانيار ەلەۋسىنوۆ بارشا قازاقستاندىقتاردى تاۋەلسىزدىگىمىزدىڭ 30 جىلدىق مەرەيتويىمەن قۇتتىقتادى.
«وتىز جىلدىق قارساڭىندا كەرەمەت شوۋ وتكەلى جاتىر. بارشا ۇيىمداستىرۋشىلارعا العىس بىلدىرگىم كەلەدى. ءبارى جوعارى دەڭگەيدە وتەدى دەگەن سەنىمدەمىن. بوكسشىلارىمىزعا تەك ساتتىلىك تىلەيمىن. جانكۇيەرلەرگە دە قىزىقتى بولادى دەپ ويلايمىن. تيتۋلدىق كەزدەسۋدىڭ ءوز ەلىمدە ءوتىپ جاتقانى مەن ءۇشىن ۇلكەن مارتەبە. 2013 جىلى الماتى قالاسىندا الەم چەمپيونى اتانعان ەدىم، ەندى استانادا دا چەمپيون بولۋدى بۇيىرسىن»، - دەدى د. ەەلەۋسىنوۆ.
سونداي-اق، 17 جەلتوقسان كۇنى ساعات 13:30-دا بوكس كەشىنىڭ جۇلدىزدارى رەسمي سالماق ولشەۋ ءراسىمىن وتكىزەدى.
سپورت جانكۇيەرلەرى 18 جەلتوقساندا دانيار ەلۋەسىنوۆتىڭ چەمپيوندىق جەكپە-جەگىن «حابار» تەلەارناسىنىڭ تىكەلەي ەفيرىنەن تاماشالاي الادى.