قازاقستان پرەزيدەنتى قاسىم-جومارت توقايەۆ 2022 جىلدىڭ 1 قىركۇيەگىندە «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى كەزەكتى جولداۋىندا ەلىمىزدىڭ ەكونوميكالىق ساياساتىنىڭ ساپالى دامۋىنا، مەملەكەتتىك باسقارۋ ءىسىنىڭ قايتا جاڭعىرۋىنا، سونىمەن قاتار ونەركاسىپ، ءبىلىم مەن عىلىم، وتاندىق بيزنەس سالالارىنىڭ دا وزەكتى دە ماڭىزدى ماسەلەلەرىنە توقتالدى.
مەملەكەت باسشىسى قازاقستان حالقىنا ارنالعان جولداۋىنىڭ نەگىزگى بولىگىندە ەلىمىزدىڭ الەۋمەتتىك-ەكونوميكالىق دامۋ جولىنا باسىمدىق بەرە وتىرىپ، «جاڭا ەكونوميكالىق ساياسات»، «ناقتى سەكتوردى دامىتۋ»، «ەل بولاشاعىنا ارنالعان ستراتەگيالىق ينۆەستيسيا»، «مەملەكەتتىك باسقارۋ ءىسىن قايتا جاڭعىرتۋ»، «زاڭ جانە ءتارتىپ» سەكىلدى بەس ناقتى باعدارعا بولگەن.
پرەزيدەنت ءوز جولداۋىندا حالىقتىڭ ءال-اۋقاتىن ارتتىرۋدى العا تارتا وتىرىپ، جاڭا ەكونوميكالىق باعداردىڭ باستى باعىتى رەتىندە جەكە كاسىپكەرلىك باستامالاردى ىنتالاندىرۋدى، بارلىق ادامدارعا بىردەي مۇمكىندىك بەرۋ ارقىلى باسەكەلەستىكتى دامىتۋدى، سونىمەن قاتار، ۇلتتىق تابىستى ءادىل ءبولۋ سەكىلدى كەزەك كۇتتىرمەيتىن باستى مىندەتتەردى اتاپ ءوتتى. سونىمەن قاتار، مەملەكەت باسشىسى كوكەيكەستى ماسەلە رەتىندە ۇلتتىق قوردىڭ قارجىسىن ءتيىمسىز جۇمساۋ توقتاتىلاتىنى جايىندا: «ۇلتتىق قوردىڭ قارجىسىن ءتيىمسىز جۇمساۋ توقتاتىلادى. بۇل – وتە وزەكتى ماسەلە. قوردىڭ قاراجاتىن اسا قاجەت ينفراقۇرىلىمدى دامىتۋعا جانە ەلىمىز ءۇشىن ماڭىزى زور جوبالاردى قارجىلاندىرۋعا جۇمسايمىز»، – دەپ، ۇلتتىق قوردىڭ باستى قىزمەتى مەن ونى ۇتىمدى پايدالانۋ جولىن قاداپ ايتتى.
جولداۋدىڭ «ەل بولاشاعىنا ارنالعان ستراتەگيالىق ينۆەستيسيا» اتتى ءۇشىنشى باعدارىندا ەلىمىزدىڭ باستى قۇندىلىعى رەتىندە ادام كاپيتالىنا ەرەكشە باعا بەرىلگەن. بۇل باعداردا قوعامنىڭ ورنىقتى دامۋ جولىنداعى ۇلت ساۋلىعىنا، ياعني دەنساۋلىق ساقتاۋ سالاسىنا باسا ءمان بەرۋ كەرەكتىگى سارالانادى. بۇگىنگى تاڭداعى ساقتاندىرۋ جۇيەسىنىڭ تيىمدىلىگى تومەندەپ، كوپشىلىك حالىقتىڭ مەديسينالىق قىزمەتتى تولىق كولەمدە الا الماي وتىرعان كەمشىلىكتەردىڭ كەلەلى تۇستارىن سىنعا الدى. اتالعان ولقىلىقتاردىڭ الدىن الۋ نەگىزىندە ەرىكتى مەديسينالىق ساقتاندىرۋ جۇيەسىن ەنگىزۋ ماسەلەسىن كوتەردى. پرەزيدەنت ۇكىمەتكە دەنساۋلىق ساقتاۋ سالاسىن جانە جالپى الەۋمەتتىك سالانى قارجىلاندىرۋ جۇيەسىن قايتا قاراۋدى ناقتى تاپسىردى.
ءبىلىم بەرۋ جۇيەسى قوعامنىڭ الەۋمەتتىك-ەكونوميكالىق ماڭىزدىلىعىن ارتتىرۋدا جەتەكشى ءرول اتقاراتىنى بارشامىزعا ءمالىم. سول سەبەپتى، ق.ك.توقايەۆ ۇلت ساپاسىن جاقسارتۋعا جاڭا قادام رەتىندە ءبىلىم سالاسىنىڭ ەرەكشەلىگىنە باسىمدىق بەرەدى. تابىستى ۇلت بولۋدىڭ تاعى دا ماڭىزدى شارتى رەتىندە – ورتا ءبىلىمنىڭ ساپاسىنا باستى نازارىن اۋدارادى. ءاربىر وقۋشىنىڭ ءبىلىم الىپ، جان-جاقتى دامۋى ءۇشىن قولايلى جاعداي جاسالۋى تيىستىگىن ساراپتاپ، وسى نەگىزدە «جايلى مەكتەپ» ۇلتتىق جوباسى قولعا الىناتىندىعى جايلى ۇتىمدى ويلارىمەن ءبولىستى.
جولداۋدا جاستارعا جان-جاقتى قولداۋ كورسەتۋدى – مەملەكەتىمىزدىڭ باستى مىندەتى رەتىندە قاراستىرۋدى باسا ايتتى. جالپى، جاستاردى قولداۋعا ەرەكشە باسىمدىق بەرىلىپ، وسى باعىتتا كوپتەگەن جوبالاردىڭ ىسكە اسىرىلۋى كوزدەلىپ وتىر. مۇنىڭ باستى ايعاعى رەتىندە ەڭبەكپەن قامتيتىن ءتۇرلى شارالار ارقىلى كەلەسى جىلدان باستاپ 100 مىڭ جاستىڭ جۇمىسپەن ورنالاسۋىنا مۇمكىندىكتەردىڭ تۋىندايتىنى، جاستارعا جەڭىلدەتىلگەن تارتىپپەن جىلدىق ءوسىمى 2،5 پايىز بولاتىن شاعىن نەسيە بەرىلەتىندىگى جايلى ايتىلدى. جاستار ماسەلەسىنە قاتىستى ايتىلعان اۋقىمدى جوبالارىنا جۇيەلى شارالار قابىلدانىپ، ءوز ۋاقىتىندا جۇزەگە اسىرىلادى دەگەن سەنىممەن قارايمىز.
مەملەكەت باسشىسىنىڭ ادىلەتتى قازاقستاندى قۇرۋ جولىنداعى كوتەرگەن نەگىزگى باستامالارى مەن سالماقتى ويلارى مەملەكەتىمىزدىڭ وركەندەپ دامۋىنا تىڭ سەرپىن بەرىپ قانا قويماي، جاڭا مۇمكىندىكتەر مەن قوعامدىق ماڭىزدى ماقساتتارعا جول اشاتىنى انىق. پرەزيدەنت جولداۋىندا كوتەرىلگەن ءتۇيىندى ماسەلەلەر جۇيەلى تۇردە ءارى دەر كەزىندە ورىندالاتىن بولسا، قازاقستاندىقتاردىڭ ءال-اۋقاتى ارتاتىنى راس. ۇلت مۇددەسى مەن جارقىن بولاشاققا نىق قادام باسۋ جولىندا ەلىمىزدىڭ ءاربىر ازاماتى «جۇمىلعان جۇدىرىقتاي» بەرىك ىنتىماقتاستىقتا بيىك بەلەستەردى بىرلەسىپ اتقارۋدى ۇمىتپاعانى ابزال. جاڭا قازاقستاننىڭ جاڭارۋى مەن جاڭعىرۋ جولىندا جاسالىنىپ جاتقان جۇيەلى رەفورمالار ەل وركەندەۋىنىڭ بەرىك نەگىزى بولادى دەپ ءۇمىت ارتامىز.