بۇل - ديرەكتورلار كەڭەسىنىڭ شەشىمى.
باقىت سۇلتانوۆ 2022 جىلدىڭ 11 قاڭتارىنان باستاپ «دامۋ» كاسىپكەرلىكتى دامىتۋ قورى» اق ديرەكتورلار كەڭەسىنىڭ ءتوراعاسى بولىپ سايلاندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل شەشىمدى قوردىڭ ديرەكتورلار كەڭەسى 2022 جىلى 4 اقپاندا قابىلدادى.
بۇل قىزمەتتى بۇعان دەيىن قازاقستان رەسپۋبليكاسىنىڭ پرەمەر-مينيسترى ءاليحان سمايىلوۆ اتقارعان.
باقىت تۇرلىحان ۇلى سۇلتانوۆ 1971 جىلى 29 قاراشادا دۇنيەگە كەلگەن. 1994 جىلى قازاق ۇلتتىق تەحنيكالىق ۋنيۆەرسيتەتىن «ينجەنەر-ەلەكتريك» ماماندىعى بويىنشا، 1995 جىلى قازاق مەملەكەتتىك باسقارۋ اكادەمياسىن «ەكونوميست» ماماندىعى بويىنشا بىتىرگەن.
ەڭبەك جولىن 1994 جىلى قازاقستان رەسپۋبليكاسى قارجى مينيسترلىگىندە قارجى نارىعىنىڭ باعالى قاعازدارى باسقارماسىنىڭ اكسيونەرلەۋ جانە ليسەنزيالاۋ ءبولىمىنىڭ جەتەكشى ەكونوميسى بولىپ باستاعان.
1995 جىلدان باستاپ قازاقستان رەسپۋبليكاسى قارجى مينيسترلىگىندە ءبولىم باستىعى، سودان كەيىن باسقارما باستىعىنىڭ ورىنباسارى (1996)، بيۋدجەتتىك دەپارتامەنت ديرەكتورىنىڭ ورىنباسارى (1997)، مەملەكەتتىك ساتىپ الۋ دەپارتامەنتىنىڭ ديرەكتورى (1998)، قازىناشىلىق دەپارتامەنتى ديرەكتورىنىڭ ورىنباسارى (1999)، بيۋدجەتتىك دەپارتامەنت ديرەكتورىنىڭ ورىنباسارى (2001)، مەملەكەتتىك بيۋدجەت دەپارتامەنتىنىڭ ديرەكتورى (2002) بولىپ تاعايىندالدى.
2002 جىلعى قىركۇيەكتەن 2003 جىلعى ماۋسىمعا دەيىن - قازاقستان رەسپۋبليكاسى ەكونوميكا جانە بيۋدجەتتىك جوسپارلاۋ مينيسترلىگىنىڭ بيۋدجەتتىك ساياسات جانە جوسپارلاۋ دەپارتامەنتىنىڭ ديرەكتورى.
2003 جىلعى ماۋسىمنان 2006 جىلعى اقپانعا دەيىن - قازاقستان رەسپۋبليكاسىنىڭ ەكونوميكا جانە بيۋدجەتتىك جوسپارلاۋ ۆيسە-مينيسترى.
2006 جىلعى اقپاننان 2007 جىلعى قاڭتارعا دەيىن - قازاقستان رەسپۋبليكاسى ستاتيستيكا اگەنتتىگىنىڭ ءتوراعاسى.
2007 جىلعى قاڭتاردان 2007 جىلعى 10 تامىزعا دەيىن - قازاقستان رەسپۋبليكاسىنىڭ قارجى ۆيسە-مينيسترى.
2007 جىلعى 10 تامىزدان باستاپ - قازاقستان رەسپۋبليكاسىنىڭ ەكونوميكا جانە بيۋدجەتتىك جوسپارلاۋ ءمينيسترى.
2010 جىلعى 13 ناۋرىزدا پرەزيدەنتتىڭ جارلىعىمەن قازاقستان رەسپۋبليكاسى پرەزيدەنتىنىڭ كومەكشىسى بولىپ تاعايىندالدى.
2012 جىلعى 21 قاڭتاردان 2013 جىلعى 6 قاراشاعا دەيىن - قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى.
2013 جىلعى 6 قاراشادان 2018 جىلعى 11 قىركۇيەككە دەيىن - قازاقستان رەسپۋبليكاسى پرەمەر-مينيسترىنىڭ ورىنباسارى جانە قازاقستان رەسپۋبليكاسىنىڭ قارجى ءمينيسترى.
2018 جىلعى 11 قىركۇيەكتەن 2019 جىلعى 13 ماۋسىمعا دەيىن - استانا (قازىرگى نۇر-سۇلتان) قالاسىنىڭ اكىمى.
2019 جىلعى 17 ماۋسىمنان باستاپ - قازاقستان رەسپۋبليكاسىنىڭ ساۋدا جانە ينتەگراسيا ءمينيسترى.
2022 جىلدىڭ 11 قاڭتارىنان باستاپ قازاقستان رەسپۋبليكاسىنىڭ پرەمەر-مينيسترىنىڭ ورىنباسارى - ساۋدا جانە ينتەگراسيا ءمينيسترى بولىپ تاعايىندالدى.