قازاقستاننىڭ ءىرى مەگاپوليستەرى مەن ءتورت وبلىسى «قىزىل» ايماقتا تۇر. ەكپە سالدىرعاندار سانى ەل تۇرعىندارىنىڭ جارتىسىنا دا جەتكەن جوق.
ىندەتپەن ەكى جىلعا جۋىق كۇرەسىپ كەلە جاتقان دۇنيە ءجۇزىنىڭ ەپيدەميولوگيالىق احۋالى قانداي ەكەنىنە شولۋ جاسايىق.
ۇلىبريتانيادا كوروناۆيرۋستىق ينفەكسيانىڭ كەزەكتى تولقىنى ءورشىپ، ازايماي تۇر. بۇل ەلدە كوروناۆيرۋستىڭ جاڭا شتامى انىقتالدى. «AY.4.2» دەپ اتالاتىن ۆيرۋس كوروناۆيرۋس جۇقتىرعان بريتاندىقتاردىڭ 10 پايىزىنان انىقتالىپ، الەمگە تاراپ كەتۋ ءقاۋپى تۋىنداپ وتىر. ءبىر تاۋلىك ىشىندە ەلدە 43 738 جاڭا ينفەكسيا جاعدايى انىقتالدى، COVID-19 دياگنوزىمەن 223 ناۋقاس قايتىس بولدى. بۇل 2021 جىلدىڭ ناۋرىز ايىنىڭ باسىنان بەرگى ءولىم-جىتىمنىڭ ەڭ جوعارى دەڭگەيى. كەشەگى مالىمەتتەردى ەسكەرسەك، بريتانياداعى كوروناۆيرۋس جاعدايلارىنىڭ جالپى سانى 8،4 ميلليوننان اسىپ كەتكەن. قىركۇيەك ايىندا ەل ۇكىمەتى ەرەسەك تۇرعىنداردىڭ 70%-ىن تولىق ۆاكسيناسيالادى، ءبىراق بۇل ىندەتتىڭ تومەندەۋىنە اكەلمەدى.
يران يسلام رەسپۋبليكاسى حالىقتى يممۋنداۋ ءۇشىن كوروناۆيرۋستىق ۆاكسينالار قورىنىڭ قارقىنىن ارتتىرۋدا. يراننىڭ قىزىل جارتى اي قوعامى ەلگە COVID-19-عا قارسى يمپورتتىق ۆاكسينالاردىڭ 28-پارتياسىن – 6 ميلليون قوس دوزانى جەتكىزدى. سوڭعى اپتادا بەس پارتيا يمپورتتالدى، بۇل شامامەن 30 ميلليون ۆاكسينا جيىنتىعىن قۇرايدى. جالپى العاندا، ەلگە COVID-19-عا قارسى پرەپاراتتاردىڭ 82 390 000 دوزاسى جەتكىزىلدى. وسى ۋاقىتتا يراننىڭ دەنساۋلىق ساقتاۋ مينيسترلىگى 48 956 693 يراندىق العاشقى دوزانى العانىن، 25 156 987 ادام تولىق يممۋنداۋ كۋرسىنان وتكەنىن مالىمدەدى.
رەسەي فەدەراسياسىنداعى جاعداي تىپتەن قورقىنىشتى. وندا ۆيرۋستى وقۋشىلار مەن جاستار كوپ جۇقتىرعان. وعان قوسا، سىرقاتتانعان قاريالار سانى دا ارتىپ بارادى. سوڭعى تاۋلىكتە 34 مىڭعا جۋىق ادام ۆيرۋسقا شالدىعىپ، 1015 ادام كوز جۇمدى. ەپيداحۋالدىڭ كۇرت ۋشىعۋىنا بايلانىستى جەرگىلىكتى بيلىكتى شۇعىل شارا قابىلداۋعا ءماجبۇر بولدى. وسى رەتتە، بۇگىن ۇكىمەت وتىرىسىندا ۆلاديمير پۋتين جاڭا شەشىم شىعاردى. ەندى رەسەيدە 30 قازاننان باستاپ، 7 قاراشاعا دەيىن جۇمىس كۇندەرى تولىق توقتاتىلادى. ءبىراق قىزمەتكەرلەردىڭ ايلىعى ساقتالادى. ساراپشىلاردىڭ پىكىرىنشە، ەلدىڭ بىردە-بىر ايماعى ۆاكسيناسيانىڭ ءتيىستى مولشەرىن سالدىرماعان، سونىڭ كەسىرىنەن ۇجىمدىق يممۋنيتەتكە قول جەتكىزە المادى. رەسەيدە نەبارى 47 558 639 ادام تولىق ەكپە العان، بۇل ەل تۇرعىندارىنىڭ ۇشتەن ءبىر بولىگىن عانا قۇرايدى.
چەحيادا تاۋلىگىنە 3،2 مىڭنان استام كوروناۆيرۋس تاسىمالداۋشىسى انىقتالدى. بۇل ساۋىردەن بەرگى انىقتالعان ەڭ جوعارى كورسەتكىش بولدى. دەنساۋلىق ساقتاۋ مينيسترلىگىنىڭ مالىمەتىنشە، ەلدە SARS-CoV-2 جۇقتىرعانداردىڭ جالپى سانى 1 715 515-كە جەتكەن. چەحيادا COVID-19-دان قايتىس بولعاندار سانى بۇگىنگى كۇنى 30 574 ادام بولدى. 102 ناۋقاس قارقىندى تەراپيا بولىمشەلەرىندە ەم الۋدا. ەگەر ستاتيستيكانى سالىستىراتىن بولساق، ءبىر كۇن بۇرىن چەحيادا تاۋلىگىنە 2،5 مىڭنان استام جاڭا كوروناۆيرۋس ينفەكسياسى انىقتالدى.
دجاكارتادا ۆاكسيناسيالانعان ازاماتتاردىڭ كوروناۆيرۋسقا قارسى ۆاكسينانىڭ كەم دەگەندە 1 دوزاسىن العاندار كورسەتكىشى جاقىندا 100%-عا جەتەدى. ناتيجەسىندە يندونەزيا استاناسى ەڭ كوپ قامتىلعان ايماققا اينالدى. ەگدە جاستاعى ادامداردىڭ 81،9% - ى، مۇمكىندىگى شەكتەۋلى ادامداردىڭ 96،3% - ى، 12 جاستان 17 جاسقا دەيىنگى بالالاردىڭ 72% - ى كوروناۆيرۋسقا قارسى تولىق ۆاكسيناسيادان ءوتتى. ءبىراق ۇكىمەت اتاپ وتكەندەي، يندونەزيانىڭ باسقا اۋداندارىندا ۆاكسيناسيامەن قامتۋ ءالى دە تومەن جانە بيلىك ونىڭ قارقىنىن ارتتىرۋعا نيەتتى.