بۇگىننەن باستاپ قازاقستاننىڭ بەس قالاسى – نۇر-سۇلتان، الماتى، شىمكەنت، اتىراۋ جانە قاراعاندىدا Ashyq جوباسىنا قاتىسپايتىن بارلىق كاسىپورىندار مەن ۇيىمداردىڭ قىزمەتى توقتاتىلادى.
سونىمەن قاتار، بۇل قالالاردا ويىن-ساۋىق، سپورتتىق جانە باسقا دا بۇقارالىق ءىس-شارالاردى، سونداي-اق وتباسىلىق، ەستەلىك ءىس-شارالاردى وتكىزۋگە تىيىم سالىنادى، دەپ حابارلايدى Almaty-akshamy.kz.
بۇل - ەلىمىزدەگى ەپيدەميولوگيالىق احۋالدىڭ تىم ناشارلاپ كەتكەندىگىنە بايلانىستى قابىلدانعان قاۋلىنىڭ ناتيجەسىندە ەنگىزىلگەن شەكتەۋ.
COVID-19 تارالۋىنا جول بەرمەۋ جونىندەگى ۆاك دۇنيە ءجۇزىنىڭ مەملەكەتتەرىندەگى كوۆيدتىك جاعدايدىڭ قانداي ەكەنىنە شولۋ جاسادى.
ءۇندىستاندا كوروناۆيرۋستىق ينفەكسياعا شالدىققاندار 32 ميلليونعا جۋىقتادى. ەلدەگى COVID-19 ينفەكسياسىن جۇقتىرعان تۇرعىندار سانى 31 655 824-كە جەتتى. ءبىر تاۋلىكتە كوروناۆيرۋستىڭ جاڭا ءتۇرىنىڭ 41 831 جاعدايى راستالدى. 541 ناۋقاس ينفەكسيادان قايتىس بولدى. وسى ۋاقىتقا دەيىن COVID-19 ەپيدەمياسى 424 351 ادامنىڭ ءومىرىن قيدى.
رەسەيدە پاندەميا باستالعاننان بەرى ينفەكسيانىڭ 6 288 677 جاعدايى تىركەلدى. سوڭعى تاۋلىكتە 22 804 جاعداي انىقتالىپ، 789 ادام قايتىس بولدى. ساراپشىلار انىقتالعان ينفەكسيا جۇقتىرۋ جاعدايلارىنىڭ سانى تومەندەپ كەلە جاتقانىن، ءبىراق ءولىم-جىتىم كورسەتكىشى ءالى دە جوعارى دەڭگەيدە ەكەنىن ايتادى. رەسەيدىڭ تۋريستىك ايماقتارى كۆي-گە قارسى قاتاڭ ەرەجەلەر ەنگىزۋدە. كۋبانداعى قوناق ۇيلەر تەك ۆاكسينالانعان نەمەسە جۋىق ارادا COVID-19 ۆيرۋسىمەن اۋىرىپ، جازىلعان تۋريستەردى عانا قابىلدايدى. سونداي-اق قوناق ۇيگە الداعى ءۇش كۇندە ۆاكسينادان وتۋگە ەرىكتى تۇردە كەلىسىم بەرگەن ساياحاتشىلاردىڭ قونىستانۋىنا دا رۇقسات بەرىلەدى.
بۇگىنگى تاڭدا فيليپپيندە COVID-19 ينفەكسياسىن جۇقتىرۋدىڭ 8 735 جاعدايى انىقتالدى. ەلدە تىركەلگەن ناۋقاستاردىڭ جالپى سانى 1 597 689-عا جەتتى، ال ەپيدەميا قۇرباندارى بويىنشا كورسەتكىش 28 016-نى قۇراپ وتىر. ءۇش كۇن قاتارىنان ارحيپەلاگتا اۋرۋدىڭ كۇندەلىكتى ءوسۋى 8000-نان اسادى. كۆي-دىڭ تارالۋىنا قارسى تۇرۋ ءۇشىن ءفيليپپيننىڭ ۇلتتىق پوليسياسى ادامداردىڭ ەل استاناسىنا كىرۋگە جانە ودان شىعۋىنا شەكتەۋ قويۋ ءۇشىن پروۆينسيالارمەن شەكارالاردا قاتاڭ باقىلاۋدى جۇزەگە اسىرا باستادى.
ۇلىبريتانيادا SARS-COV-2 جۇقتىرعان جاعدايلاردىڭ سانى 5،4 ميلليون ادامنان استى. سوڭعى تاۋلىكتە 24 مىڭنان استام SARS-CoV-2 تاسىمالداۋشىسى انىقتالدى. بۇل بىرنەشە كۇن بۇرىنعى كورسەتكىشتەردەن ءسال تومەن، دەگەنمەن كوروناۆيرۋستىق ينفەكسيانىڭ تارالۋ جىلدامدىعى باسەڭدەگەن جوق. 01.08.2021 ج. جاعداي بويىنشا COVID-19 بويىنشا راستالعان جاعدايلاردىڭ سانى 5 856 197-گە جەتتى. سونىمەن قاتار ۆيرۋس سالدارىنان كوز جۇمۋ جاعدايلارىنىڭ سانى 129 654 ادامدى قۇرادى.
كيپر ۆاكسينا الماعان تۇرعىندار مەن تۋريستەرگە جاڭا شەكتەۋلەر ەنگىزدى. 1 تامىزدان باستاپ ارالدا SafePass انتيكوۆيدتىك سەرتيفيكاتتاردىڭ قولدانىلۋ ايماعى كەڭەيەدى. ەندى ولار 10-نان استام ادام جينالاتىن نەمەسە گيپوتەتيكالىق تۇردە جينالۋى ىقتيمال بارلىق ءۇي-جايلاردا ۇسىنىلۋى كەرەك.
سلوۆاكيادا تۇرعىنداردى كوروناۆيرۋسقا قارسى ەكپە قابىلداۋعا ىنتالاندىرۋ ءۇشىن لوتەرەيا وتكىزىلە باستالدى. لوتەرەيا اپتا سايىن قازان ايىنىڭ سوڭىنا دەيىن وتكىزىلەدى. ءار ۇتىس ويىنىنىڭ جۇلدە قورى €2 ملن. ماكسيمالدى ۇتىس سوماسى — €100 مىڭ، مينيمالدى — €1 مىڭ.
مالايزيادا كوروناۆيرۋس جۇقتىرۋدىڭ تاۋلىكتىك ءوسىمى بويىنشا انتيرەكورد ورناتىلدى -17 786 جاعداي انىقتالدى. سونىمەن قاتار جاپونيادا ينفەكسيانىڭ تاۋلىكتىك جوعارى كورسەتكىشى جاڭارتىلدى، 12 343 دەرەك راستالدى.
چيليدە كوروناۆيرۋس تارالۋىنىڭ تومەندەۋى تىركەلدى. سوڭعى تاۋلىكتە COVID-19 جۇقتىرۋدىڭ 1 152 جاعدايى تىركەلدى. دەنساۋلىق ساقتاۋ ءمينيسترى ەنريكە ءپاريستىڭ ايتۋىنشا، بۇل - پاندەميا باستالعالى ەڭ تومەن كورسەتكىش. قابىلدانعان شەكتەۋلەر مەن ۆاكسيناسيانىڭ ارقاسىندا ءقازىر چيلي COVID-19 تارالۋى مەن اۋرۋحاناعا جاتقىزۋدىڭ ەڭ تومەنگى دەڭگەيىنە قول جەتكىزدى. جالپى العاندا، ەلدە 1 615 771 اۋرۋ جاعدايى تىركەلىپ، 35 448 ادام كوز جۇمدى.
فرانسيانىڭ كاريب تەڭىزىندەگى مارتينيكا ارالىندا COVID-19 تارالۋىنىڭ كوبەيۋىنە بايلانىستى لوكۋداۋن جاريالاندى. جەرگىلىكتى اۋرۋحانالار تولىپ، ناۋقاستار پاريجگە جىبەرىلە باستادى. ينفەكسيا سانىنىڭ كۇرت وسۋىنە بايلانىستى ءۇندى مۇحيتىنداعى تاعى ءبىر فرانسۋز ارالى – رەيۋنوندا دا جاعداي ۋشىعىپ، شەكتەۋ شارالارى كۇشەيدى. مۇنىڭ باستى سەبەبى، بۇل وڭىرلەردە ۆاكسيناسيا دەڭگەيى ەل بويىنشا ەڭ تومەنگى دەڭگەيدە.
قىتايدىڭ 10-نان استام ايماعىندا كوروناۆيرۋستىڭ ءورشۋى تىركەلدى. SARS-CoV-2 كوروناۆيرۋسىنىڭ جەرگىلىكتى وشاقتارىنىڭ تەز تارالۋى سوڭعى بىرنەشە كۇندە ەلدىڭ ماتەريكتەگى 14 پروۆينسياسىندا تىركەلدى. ناۋقاستاردىڭ 25% -ى كوروناۆيرۋستى ەل اۋماعىندا جۇقتىرعانى انىقتالدى. ەڭ ۋشىققان ەپيدەميولوگيالىق جاعداي سزيانسۋ پروۆينسياسىندا تىركەلدى، وندا COVID-19 ينفەكسياسىنىڭ 245 جاعدايى انىقتالدى.
ۋگاندا جۇڭگو حالىق رەسپۋبليكاسىنان COVID-19 ۆاكسيناسىنىڭ قايىرىمدىلىق پارتياسىن الدى. ۆاكسينانى بەرۋ كەزىندە ەلشى چجان ليچجۋن جۇڭگو مەن ۋگاندا حالىقتارى كوروناۆيرۋستىق ىندەتكە قارسى كۇرەستە بىر-بىرىنە ءوزارا كومەك جانە مورالدىق قولداۋ كورسەتەتىنىن اتاپ ءوتتى. ەپيدەميا باستالعاننان بەرى قحر ۇكىمەتى ۋگاندا تاراپىنا بىرنەشە رەت ەپيدەمياعا قارسى كومەك كورسەتتى، بۇل ۆيرۋسقا قارسى ءتيىمدى ارەكەت ەتۋگە جول اشتى.