«Coursera» ءبىلىم بەرۋ پلاتفورماسىنىڭ 654 كۋرسى قازاق تىلىنە اۋدارىلىپ جاتىر.
بۇل جوبانىڭ العاشقى ناتيجەلەرى جەمىسىن بەرە باستادى. ءدال قازىرگى ۋاقىتتا 50 كۋرس قازاق تىلىنە اۋدارىلىپ، ستۋدەنتتەرگە ۇسىنىلدى. جوبا سەرتيفيكاتىن العاشقىلاردىڭ ءبىرى بولىپ پاۆلودارلىق كاميلا اقان قىزى الدى، دەپ حابارلايدى Almaty-akshamy.kz Egemen.kz-كە سىلتەمە جاساپ.
تورايعىروۆ ۋنيۆەرسيتەتىنىڭ 4-كۋرس ستۋدەنتى كاميلا اقان قىزى «قورشاعان ورتانى قورعاۋ جانە ادام تىرشىلىگىنىڭ قاۋىپسىزدىگى» ماماندىعى بويىنشا ءبىلىم الادى. پلاتفورما كاتالوگىنداعى كۋرستار ونى قاتتى قىزىقتىرعان. بۇل تۋرالى ول: «سان ءتۇرلى كۋرستاردى كورىپ، وتكەنشە اسىق بولدىم. ءبارى دە قىزىق. ءبارى دە پايدالى. ىشىنەن سوڭعى ۋاقىتتا ءوزىمدى الاڭداتىپ جۇرگەن ماسەلەگە قاتىستى كۋرس كورگەندە قۋانىپ كەتتىم. سوسىن ويلانباستان «XXI عاسىر جۇمىس ورنىنداعى قارىم-قاتىناس» كۋرسىن ءوتتىم. ءسويتىپ العاشقى سەرتيفيكاتىمدى دا الدىم»، - دەدى.
«Coursera» كاتالوگىندا الەمنىڭ 170 ۇزدىك ۋنيۆەرسيتەتى مەن 75 جەتەكشى كومپانيا ۇسىنعان 10 مىڭ كۋرس بار. بۇل كۋرستاردىڭ بارلىعى «Coursera – قازاق تىلىندە» جوباسىنىڭ ارقاسىندا قازاق ستۋدەنتتەرىنە قولجەتىمدى. جوبانىڭ قازاق قوعامىنا جەتكەنى تەك ستۋدەنتتەردى عانا ەمەس، وقىتۋشىلاردى دا قۋانتتى.
قازاق قوعامىن تەرەڭ بىلىمگە جەتەلەيتىن جوباعا كاميلا وقيتىن تورايعىروۆ ۋنيۆەرسيتەتىنىڭ بيولوگيا جانە ەكولوگيا كافەدراسىنىڭ مەڭگەرۋشىسى قالييەۆا ايناگۇل دە ءوز پىكىرىن ءبىلدىردى.
«بۇل – ستۋدەنتتەرگە جاڭا ءبىلىم مەن داعدىلاردى يگەرۋگە مۇمكىندىك بەرەتىن اۋقىمدى ءبىلىم بەرۋ پلاتفورماسى. ستۋدەنتتەرگە الەمنىڭ جەتەكشى ۋنيۆەرسيتەتتەرىنىڭ تاجىريبەسىن تەگىن مەڭگەرۋگە مۇمكىندىك بەرگەنى ءۇشىن مينيسترلىكپەن جوبانى اۋدارعان ادامدارعا العىسىمىزدى بىلدىرەمىز. ءبىزدىڭ ستۋدەنتتەر وزدەرى ءۇشىن كوپتەگەن پايدالى اقپاراتتاردى الادى دەپ ويلايمىن»، - دەدى ول.
قازىرگى ۋاقىتتا جوبانىڭ سەنىمدى سەرىكتەسى «BMG UpSkill» كومپانياسى قالعان 604 كۋرستى كەزەڭ-كەزەڭىمەن اۋدارىپ، دايىنداپ جاتىر. كاميلا جوباعا دەگەن لەبىزىن ءبىلدىردى.
«قۇرداستارىم دا Coursera-نىڭ بەرىپ جاتقان مۇمكىندىگىنە وتە ريزا. سەبەبى كۋرستار وتە قىزىقتى ءارى پايدالى. پلاتفورما ءبىلىم الۋشىلارعا ءوز بىلىمدەرىن جەتىلدىرۋگە، تۇلعا رەتىندە دامۋعا كومەكتەسەدى. سوندىقتان دا كۋرسقا قاتىسىپ، ۋاقىتتى ءتيىمدى پايدالانۋعا شاقىرامىن. 4-كۋرس بولعاندىقتان، جۇمىسقا قاتىستى ۋايىمىم باسىم. وسى كۋرستان جۇمىس ورنىڭدا قيىندىققا تاپ بولعان جاعدايدا ءوزىڭدى ۇستاۋ، كوللەكتيۆتە جۇمىس ىستەۋ، دۇرىس ءتىل تابىسۋ، ءوزىڭدى، وزگەنى زەرتتەۋ سياقتى اقپاراتتار الىپ، مەڭگەردىم. بۇرىن بۇل كۋرس تۋرالى مۇلدەم ەستىمەپپىن. دۇنيە جۇزىنە قۇندى ءىلىم تاراتىپ جۇرگەن بۇل پلاتفورمانى ءبىزدىڭ ەلگە اكەلگەن باستاماشى توپتارعا رازىلىعىمدى بىلدىرگىم كەلەدى»، - دەدى ستۋدەنت.