ەندى 3580 call-ورتالىعىنىڭ نومەرىن تەرىپ، ۇلكەن شاھاردىڭ تاجىريبەلى كلينيكالىق پسيحولوگتارىنان كەڭەس الۋعا بولادى.
الماتىدا پسيحولوگتىڭ كومەگىن الۋ ءۇشىن 2015 جىلى العاش رەت 1303 سەنىم تەلەفونى ىسكە قوسىلعان. العاشقى جىلى وعان 236 ادام حابارلاسقان بولسا، وتكەن جىلى 6 مىڭعا جۋىق قالا تۇرعىنى حابارلاسقان. بۇل تۋرالى الماتى قالاسىنىڭ پسيحيكالىق دەنساۋلىق ورتالىعىنىڭ ديرەكتورى ساپار راحمەنشەيەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
- سەنىم تەلەفونىنا ءبىر تاۋلىكتە 20، 30، كەيدە 40-قا جۋىق تۇرعىن قوڭىراۋ شالادى. ولاردىڭ جاس ەرەكشەلىكتەرى ءارتۇرلى. پسيحياتريالىق، ناركولوگيالىق قىزمەتكە مۇقتاج تۇرعىندار پسيحولوگتارعا اعىنان اقتارىلىپ، كوكەيىندەگى ماسەلەسىن تارقاتىپ، قاجەتتى اقپاراتتى الادى. سەنىم تەلەفونىندا كاسىبي، تاجىريبەلى كلينيكالىق پسيحولوگتار ەلىمىزدىڭ تۇكپىر-تۇكپىرىندەگى حالىققا قىزمەت كورسەتىپ جاتىر. ءبىزدىڭ ماقساتىمىز دا وسى. پسيحولوگيالىق كومەك تەگىن جانە ءار ادامنىڭ سىرى قۇپيا ساقتالادى، - دەيدى ورتالىق باسشىسى ساپار راحمەنشەيەۆ.
ونىڭ مالىمەتىنشە، وتكەن جىلى 1303 سەنىم تەلەفونىنا حابارلاسقانداردىڭ باسىم بولىگى - الەۋمەتتىك، تۇرمىستىق تۇيىتكىلدەر، وتباسىلىق كيكىلجىڭ، ەرلى-زايىپتىلار، ەنە مەن كەلىن اراسىنداعى داۋ-دامايدى شەشۋدىڭ امالىن سۇراعان، كۇيزەلىسكە تۇسكەن جاندار. بۇدان بولەك، بالالارى باعۋدان باس تارتقان قارتتار، مۇمكىندىگى شەكتەۋلى جاندار، قۇمار ويىنعا تاۋەلدى جاندار، ونلاين نەسيە الىپ، قارىزعا باتقاندار دا بار. ماسكۇنەمدىك، ەسىرتكىگە تاۋەلدى تۇرعىندار دا ەمدەلۋدىڭ جولىن ىزدەپ، سەنىم تەلەفونىنا حابارلاسقان.
«بيىل قاڭتار ايىنان باستاپ الماتى قالاسىنىڭ پسيحيكالىق دەنساۋلىق ورتالىعىنىڭ سەنىم تەلەفونى 3580 call-ورتالىعىنا قوسىلدى. ەندى 3580 call-ورتالىعىنىڭ نومەرىن تەرىپ، ۇلكەن شاھاردىڭ تاجىريبەلى كلينيكالىق پسيحولوگتارىنان كەڭەس الۋعا بولادى. مۇنداي call-ورتالىقتار الماتى، تاراز جانە سەمەي قالالارىندا جۇمىسىن باستادى»، - دەدى الماتى قالاسىنىڭ پسيحيكالىق دەنساۋلىق ورتالىعىنىڭ ديرەكتورى ساپار راحمەنشەيەۆ.