سوت بۇرىنعى ادىلەت ءمينيسترى مارات بەكەتايەۆتىڭ قاماۋدا ۇستاۋ مەرزىمىن ۇزارتتى.
بۇل تۋرالى استانا قالالىق سوت اكىمشىلىگىنىڭ باسپا ءسوز قىزمەتى مالىمدەگەن، دەپ حابارلايدى Almaty-akshamy.kz.
ەكس-مينيستردىڭ قاماۋعا الۋ مەرزىمىن ۇزارتۋ تۋرالى شەشىم 15 مامىردا قابىلدانعان.
«استانا قالاسىنىڭ مامانداندىرىلعان اۋدانارالىق تەرگەۋ سوتى 2024 جىلعى 15 مامىردا كۇدىكتى بەكەتايەۆ م.-عا قاتىستى قاماۋدا ۇستاۋ تۇرىندەگى بۇلتارتپاۋ شاراسىن 2024 جىلعى 21 ماۋسىمعا دەيىن ۇزارتۋعا سانكسيا بەرگەنىن حابارلايمىز»، دەلىنگەن ەلوردالىق سوتتىڭ حابارلاماسىندا.
وسىلايشا بەكەتايەۆ كەمىندە تاعى ءبىر اي قاماۋدا بولادى. ەسكە سالايىق، بۇرىنعى مينيستر 2023 جىلدىڭ قازان ايىندا ۇستالعان ەدى.
سىبايلاس جەمقورلىققا قارسى قىزمەتتىڭ حابارلاۋىنشا، مارات بەكەتايەۆ تالاپ ەتىلمەيتىن قىزمەتتەردى كورسەتۋگە جىل سايىنعى كەلىسىمشارت جاساۋ ارقىلى ۇلەستەس كومپانيانىڭ مۇددەسىن قولداپ، مەملەكەتكە ۇلكەن زيان كەلتىرگەن.
مارات بەكەتايەۆ 2016-2022 جىلدار ارالىعىندا ادىلەت ءمينيسترى قىزمەتىن اتقارعان. 2022 جىلدىڭ قاڭتارىنان باستاپ پرەمەر-مينيستردىڭ كەڭەسشىسى قىزمەتىن اتقاردى. ول بۇل قىزمەتتەن 2022 جىلدىڭ جەلتوقسانىندا بوساتىلدى، ءبىراق بۇل تۋرالى تەك 2023 جىلدىڭ اقپانىندا بەلگىلى بولدى.