بۋراباي اۋدانىنىڭ پروكۋراتۋراسى ورتا مەكتەپتەردىڭ بىرىندەگى اسحانانىڭ جۇمىسىن تەكسەرۋ بارىسىندا بالالاردىڭ قاۋىپسىزدىگىنە قاتەر توندىرەتىن ءبىرقاتار ورەسكەل زاڭبۇزۋشىلىقتاردى انىقتادى، دەپ حابارلايدى Aqshamnews.kz ءتىلشىسى.
پروكۋراتۋرا مالىمەتىنشە، وقۋشىلاردى تاماقتاندىرۋ بويىنشا كونكۋرس جەڭىپ العان كاسىپكەر بايقاۋعا جالعان قۇجاتتار ارقىلى قاتىسقان. كەيىن ول ءوز مىندەتىن بۇل سالادا ءتيىستى بىلىكتىلىگى دە، رۇقسات قۇجاتتارى دا جوق باسقا ازاماتقا بەرگەنى بەلگىلى بولدى.
تەكسەرۋ بارىسىندا اتالعان ازاماتتىڭ اسحانادا الكوگولدى شامادان تىس تۇتىناتىن، سونداي-اق وسى نەگىزدە بۇرىن اتا-انا قۇقىعىنان ايىرىلعان ادامداردى جۇمىسقا تارتقانى انىقتالعان. قاداعالاۋ ورگانىنىڭ دەرەگىنشە، بۇل جاعداي بالالاردىڭ ءومىرى مەن دەنساۋلىعىنا تىكەلەي ءقاۋىپ توندىرگەن.
پروكۋراتۋرانىڭ ۇسىنۋىمەن شارت بۇزىلىپ، كاسىپكەردى مەملەكەتتىك ساتىپ الۋدىڭ جوسىقسىز قاتىسۋشىسى دەپ تانۋ تۋرالى سوتقا تالاپ ارىز بەرىلدى. سونىمەن قاتار مەكتەپ ديرەكتورى قىزمەتىنەن بوساتىلىپ، كونكۋرس كوميسسياسىنىڭ مۇشەلەرى مەن اۋداندىق ءبىلىم ءبولىمىنىڭ قىزمەتكەرى تارتىپتىك جاۋاپكەرشىلىككە تارتىلدى.