«بۋراباي» مەملەكەتتىك ۇلتتىق تابيعي پاركى جانە مارقاكول مەملەكەتتىك تابيعي قورىعى يۋنەسكو-نىڭ بيوسفەرالىق رەزەرۆاتتارىنىڭ جاھاندىق جەلىسىنە قوسىلدى.
مۇنداي شەشىم «ادام جانە بيوسفەرا» باعدارلاماسىنىڭ حالىقارالىق ۇيلەستىرۋ كەڭەسىنىڭ 34ء-شى سەسسياسىندا قابىلداندى، دەپ حابارلايدى Almaty-akshamy.kz
ايتا كەتەيىك، بۇگىنگى تاڭدا يۋنەسكو بيوسفەرالىق رەزەرۆاتتارىنىڭ قازاقستانداعى ۇلتتىق جەلىسىنە 15 وبەكت ەنگىزىلگەن. بۇل ورتالىق ازيا ەلدەرىندەگى ەڭ جوعارى كورسەتكىش جانە دە الەم قاۋىمداستىعىنىڭ قازاقستانداعى بيوالۋاندىلىقتى ساقتاۋ ماسەلەلەرىنە دەگەن ايرىقشا نازارىن بىلدىرەدى.
"قازاقستان بۇل ىسكە وتە جاقسى دايىندالىپتى. ءوتىنىمدى قۋانا-قۋانا قولدادىق. وسى ناتيجەمەن قازاق ەلىن قۇتتىقتايمىن. قازاقستان دەلەگاسياسى ۇلكەن جۇمىس اتقاردى جانە پاريجدە قاجەتتى بارلىق اقپارات پەن قۇجاتتى دەر كەزىندە جانە ءتيىستى كولەمدە ۇسىنا ءبىلدى"، - دەيدى يۋنەسكو حالىقارالىق بيولوگيالىق باعدارلاما جەتەكشىسى ادەشولا ادەپودجۋ.