ەلىمىزدىڭ ءبىرقاتار وڭىرىنە جۇمىس ساپارىمەن بارعان كولىك ءمينيسترى مارات قارابايەۆ بۇقتىرما سۋ قويماسى ارقىلى وتەتىن كوپىردىڭ قۇرىلىس بارىسىن تەكسەردى.
شىعىس قازاقستان وبلىسىنداعى بۇقتىرما سۋ قويماسى ارقىلى وتەتىن ەكى جولاقتى اۆتوموبيل كوپىرىنىڭ جالپى ۇزىندىعى 1316 مەتردى قۇرايدى
اتالعان جوبانىڭ ايماق ءۇشىن ستراتەگيالىق ماڭىزى زور. قۇرىلىس نىسانىنىڭ حالىق يگىلىگىنە پايدالانۋعا بەرىلۋى شىعىس قازاقستان وبلىسى مەن اباي وبلىسىنىڭ كولىك ينفراقۇرىلىمىن جاقسارتادى دەپ كۇتىلۋدە، دەپ حابارلايدى Almaty-akshamy.kz كولىك مينيسترلىگىنە سىلتەمە جاساپ.
بۇقتىرما سۋ قويماسى ارقىلى وتەتىن كوپىر شىعىس قازاقستان وبلىسىنىڭ جارما، كاتونقاراعاي، كۇرشىم، كوكپەكتى، زايسان، التاي اۋداندارى اراسىنداعى كولىك قۇرالدارىنىڭ ۇزدىكسىز قوزعالىسى ءۇشىن ماڭىزدى نىسان.
سالىنىپ جاتقان كوپىر وتكەلىنىڭ جالپى ۇزىندىعى 20 شاقىرىمدى قۇرايدى. 21 تىرەكتىڭ 18ء-ى سالىنىپ، قالعان ءۇش تىرەك بويىنشا جۇمىستار جالعاسىپ جاتىر. نىساندا ارنايى ايلاق، جيىنتىقتاۋشى بولشەكتەردى دايىنداۋعا ارنالعان ۋاقىتشا قۇرىلىس الاڭدارى جۇمىس ىستەيدى، سونداي-اق ينجەنەرلىك جەلىلەر تارتىلعان. جۇمىستى جەدەلدەتۋ ماقساتىندا كوپىردىڭ قۇرىلىسى ءبىر مەزگىلدە سول جانە وڭ جاعالاۋدان قاتار جۇرگىزىلۋدە.
قازىرگى ۋاقىتتا ۋاقىتشا تەحنولوگيالىق كوپىردىڭ قۇرىلىسى تولىعىمەن اياقتالعان. بۇل اتالعان قۇرىلىس جۇمىستارىن ورىنداۋ ءۇشىن قاجەتتى الاڭدارمەن قامتاماسىز ەتەتىن اۋماق. كىرمە جولدا جەر توسەمىن ورناتۋ جانە قۇم-قيىرشىق تاس توسەۋ جۇمىستارى اياقتالدى. الداعى ۋاقىتتا جالعاساتىن قۇرىلىس-مونتاجداۋ جۇمىستارىنا ارنالعان بارلىق قاجەتتى ماتەريال دايىن. ۋچاسكەدەگى جۇمىسشىلار ەكى اۋىسىمدا ىستەيدى، جالپى سانى 200-تەن استام ادام جۇمىلدىرىلىلعان.