«ءبىتىم» (La Tregua) دەپ اتالاتىن كارلاگ تاريحىنا نەگىزدەلگەن تۋىندى كينوتەاترلار مەن ستريمينگ پلاتفورمالارىندا كورسەتىلەدى
Comic Con Astana 2025 فەستيۆالىندە قازاقستان مەن يسپانيا اراسىنداعى العاشقى حالىقارالىق بىرلەسكەن جوبا – «ءبىتىم» (La Tregua) ءفيلمىنىڭ تۇساۋكەسەرى وتەدى. بۇل تۋىندى جاھاندىق پروكات پەن Netflix ستريمينگ پلاتفورماسىنا ارنالىپ تۇسىرىلگەن، دەپ حابارلايدى aqshamnews.kz.
كارلاگتىڭ قايعىلى تۇستارىن قوزعايتىن «ءبىتىم» (La Tregua) ءفيلمىن رەجيسسەر ميگەل انحەل ۆيۆاس تۇسىرۋدە. ونىڭ شىعارماشىلىق قورىندا اتى اڭىزعا اينالعان «بۋماجنىي دوم» (La Casa de Papel) سەريالىنداعى ەپيزودتار، مەتتيۋ فوكس تۇسكەن پوستاپوكاليپتيكالىق تريللەر «Extinction» («ۆىميرانيە») جانە حوررور Inside («ۆنۋتري») ءفيلمى بار.
ءفيلمنىڭ وقيعاسى 1937-1945 جىلدارى قازاقستانداعى كارلاگتا ءوربيدى. بۇل لاگەردە الەمنىڭ تۇكپىر-تۇكپىرىنەن اكەلىنگەن تۇتقىندار بولعان. تۋىندىنىڭ باستى جەلىسىندە – ازاماتتىق سوعىستىڭ الاپات جەلى ەكى جاققا ايىرعان قوس يسپان ازاماتى مەن ادام توزگىسىز جاعدايدا ادامگەرشىلىگى مەن قايسارلىعىنان اينىماعان قازاق زيالىسى تۇر. فيلم تاريحي جادى، جەكە تاڭداۋ مەن رۋحتىڭ مىزعىماستىعىن باستى تاقىرىپ ەتەدى. «ءبىتىم» ءفيلمى كەيىپكەرلەرىنىڭ تاعدىرى ارقىلى قازاقستاننىڭ ميلليونداعان ادام ءۇشىن ەكىنشى وتانعا قالاي اينالعانى ايقىندالادى. سونداي-اق، قيىن-قىستاۋ زاماندا ىنتىماق، جاناشىرلىق پەن مادەنيەتتىڭ ادامزات ءۇمىتىنىڭ تىرەگى بولعانى كورسەتىلەدى.
فيلم پوستپروداكشننىڭ سوڭعى ساتىسىندا تۇر. ءقازىر ورىس جانە قازاق تىلدەرىندە دۋبلياج جاساۋعا دايىندىق جۇمىستارى ءجۇرىپ جاتىر. پرەمەرا 2025 جىلعى كءۇءزدىڭ سوڭى – قىس مەزگىلىنە قاراي جوسپارلانعان. ال قىركۇيەكتە فيلم سان-سەباستيان حالىقارالىق كينوفەستيۆالىندە (Festival Internacional de Cine de San Sebastián) كونكۋرستان تىس ۇسىنىلاتىن بولادى.
فيلمگە Netflixء-تىڭ تانىمال جوبالارى ارقىلى الەمگە ايگىلى بولعان اكتەرلەر ميگەل ەرران («بۋماجنىي دوم») جانە ارون پيپەر («Élite») تۇسكەن. قازاقستاندىق اكتەرلەردەن فيلمدە دينا تاسبولاتوۆا، سەرگەي ۋفيمسيەۆ، التىناي نوگەربەك پەن فارابي اقكوزوۆ وينادى.
رەجيسسەرمەن بىرگە «ءبىتىم» جوباسىنىڭ اتقارۋشى پروديۋسەرى ەميليو ا. پينا دا كونۆەنتكە قاتىسادى. ونىڭ قورجىنىندا «پروپاۆشيە بەز ۆەستي»، «ينسيدەنت» سەكىلدى 20-دان استام جوبا بار. سونداي-اق، ەميليو پينا يسپانيانىڭ ۇلتتىق كينوپرەمياسى – «گوييا» سىيلىعىن بەس مارتە ۇيىمداستىرعان.
دەلەگاسياعا سونداي-اق UMAIFILM-نىڭ باس پروديۋسەرى ەرلان حاليجانۇلى بەكحوجين قوسىلادى. ول – «حابار» اگەنتتىگىنىڭ ەكس-باسقارما ءتوراعاسى، ەلىمىزدىڭ ءىرى مەديامەنەدجەرلەرىنىڭ ءبىرى جانە اۋديوۆيزۋالدىق كونتەنت سالاسىندا حالىقارالىق ىنتىماقتاستىقتى نىعايتۋعا ۇلەس قوسۋشى.
فيلم ءوندىرىسى يسپانيانىڭ Plano a Plano كينوكومپانياسى مەن قازاقستاننىڭ Amanat Capital كومپانياسى اراسىنداعى العاشقى حالىقارالىق ىنتىماقتاستىق اياسىندا جۇزەگە اسىرىلۋدا. يسپانيا تاراپىنان جوباعا اۋديوۆيزۋالدىق كونتەنت جاساۋدا مول تاجىريبەسى بار پروديۋسەرلەر سەزار بەنيتەس، ەميليو امارە جانە ەميليو ا. پينا جاۋاپتى. قازاقستان تاراپىنان ءفيلمنىڭ باس پروديۋسەرى – امانات كوناقبايەۆ. پروديۋسەرلەر قۇرامىنا داير قاراكەيەۆ، داۋرەن بايعالييەۆ جانە UMAIFILM كومپانياسىنىڭ پروديۋسەرلەرى جاراسحان قۇلپيەنوۆ پەن ءاليا دالابايەۆا كىرەدى. قازاقستان كومانداسىنىڭ ۇيلەستىرۋىمەن بەلگىلى مەديامەنەدجەر، جۋرناليست جانە پروديۋسەر ەرلان حاليجانۇلى بەكحوجين اينالىسادى.
Comic Con Astana-2025 فەستيۆال تاريحىنداعى ەڭ ءىرى شاراعا اينالىپ، تمد اۋماعىنداعى پوپ-مادەنيەت سالاسىنىڭ ەڭ ءىرى وقيعالارىنىڭ بىرىنە اينالادى. 2025 جىلى فەستيۆال بەس كۇنگە سوزىلىپ (9-نان 13 شىلدەگە دەيىن) العاش رەت ەكى ءىرى الاڭدا وتەدى: «استانا-ارەنا» ستاديونى مەن ملد «بارىس-ارەنا».
2019 جىلى قۇرىلعان ساتىنەن باستاپ كونۆەنت جەرگىلىكتى شارادان حالىقارالىق دەڭگەيدەگى تولىققاندى پلاتفورماعا اينالدى. ول كينويندۋستريا، انيماسيا، كوميكس، ۆيدەوويىندار، كوسپلەي جانە سيفرلىق ونەر سالاسىنىڭ وكىلدەرىن بىرىكتىرەدى.
فەستيۆالدىڭ حەدلاينەرى – بريتاندىق اكتەر، رەجيسسەر جانە سيفرلىق كەيىپكەرلەردى ەكرانعا شىعارۋ سالاسىنداعى جاڭاشىل ادام ەندي سەركيس. ول – قوزعالىستى ءتۇسىرۋ تەحنولوگيالارىن دامىتۋ ارقىلى كينو يندۋسترياسىندا توڭكەرىس جاساعان تۇلعا. ەڭ تانىمال رولدەرى: گوللۋم («ساقينالار ءامىرشىسى»)، سەزار («مايمىلدار پلانەتاسى»)، جوعارعى كوشباسشى سنوۋك («جۇلدىزدار سوعىسى»)، الفرەد پەننيۋورت («بەتمەن»، 2022)، كينگ-كونگ (پيتەر دجەكسون رەمەيكى)، ۋليسس كلو (Marvel الەمى)، كينو لوي («اندور»). سونىمەن قاتار سەركيس «ۆەنوم 2»، «ماۋگلي» جانە جاقىندا جارىق كورەتىن «ساقينالار ءامىرشىسى: گوللۋمعا اڭشىلىق» فيلمدەرىنىڭ رەجيسسەرى.
بۇعان دەيىن Comic Con Astana فەستيۆالىنىڭ حەدلاينەرى رەتىندە الەمدىك يندۋستريانىڭ تانىمال جۇلدىزدارى ونەر كورسەتتى، ولاردىڭ قاتارىندا مادس ميككەلسەن، پيلۋ اسبەك، مايكل رۋكەر، شون گانن، پەرسي حاينس ۋايت جانە باسقالارى بار.