تەكسەرۋگە بولاتىن، اۋماعى ساقتالعان بۇلىنگەن بانكنوتتار جاڭا اقشاعا ايىرباستالادى.
ۇلتتىق بانكىنىڭ بانكنوتتار مەن مونەتالاردى ساراپتامادان وتكىزۋ باسقارماسىنىڭ باستىعى اسقات مۇقامادييەۆ ۇلتتىق ۆاليۋتاداعى بۇلىنگەن بانكنوتتاردى قالاي ايىرباستاۋدى ءتۇسىندىردى، دەپ حابارلايدى Almaty-akshamy.kz
اسقات مۇقامادييەۆ ايتۋىنشا، ۇلتتىق بانكىنىڭ فيليالدارىنا ساراپتامادان وتكىزۋ ءۇشىن ءارتۇرلى بانكنوتتار ءتۇسىپ جاتادى، ولار: توزعان، كۇيگەن، جىرتىلعان اقشالار.
«بۇل بانكنوتتاردىڭ ءبارى فراگمەنتتەرى بويىنشا قايتا قۇراستىرىلىپ، قالپىنا كەلتىرىلەدى. جىل باسىنان بەرى قۇب جارامدىلىعى كۇمان تۋدىراتىن بانكنوتتار مەن مونەتالاردىڭ 3 079-ىن قابىلداپ، سولاردىڭ اراسىنان 2 542 بانكنوتتى ايىرباستاپ بەردى. ولاردىڭ كوبى جىرتىلعان، كۇيگەن، ەسكىرىپ، جۋىلىپ كەتكەن»، – دەيدى باسقارماسى باستىعى.
ونىڭ ايتۋىنشا، ەگەر بانكنوتتىڭ 50%-دان كوپ بولىگى جاقسى ساقتالعان بولسا، ونى ۇلتتىق بانك فيليالدارىنا جارامدىلىعى جاعىنان كۇماندى بانكنوت رەتىندە ساراپتاماعا تاپسىرىپ، شىن اقشا ەكەنىن تەكسەرتۋگە بولادى.
«ول ءۇشىن بانكنوتتىڭ قالعان بولىگىن ۇقىپتاپ جيناپ الۋ كەرەك. قانداي جاعدايعا قاراماستان، بانكنوتتى بۇلىنگەن دۇنيەنىڭ ىشىنەن، ءامياننان، باسقا دا ىدىستان الماعان دۇرىس. ايتپەسە بانكنوتتار ودان بەتەر جىرتىلىپ، ونىڭ شىن اقشا ەكەنىن انىقتاۋ قيىنعا تۇسەدى. بۇلىنگەن اقشانى جۇمساق زاتقا وراپ، ۇلكەندەۋ قوراپقا سالىپ الۋ كەرەك. وسىدان كەيىن ونى ساراپتامادان وتكىزۋ ءۇشىن ۇلتتىق بانكتىڭ اۋماقتىق فيليالىنا وتكىزەسىز. تەكسەرۋگە بولاتىن، اۋماعى ساقتالعان بۇلىنگەن بانكنوتتار جاڭا اقشاعا ايىرباستالادى. الايدا، ونى تەكسەرۋ ءبىراز ۋاقىت الۋى مۇمكىن. ەڭ باستىسى، ساراپتاما تەگىن جاسالادى»، – دەدى ول.
ەگەر بانكنوت ءوز كولەمىنىڭ كەمىندە 70% ساقتاعان بولسا جانە ونىڭ نومينالىن كورسەتەتىن (جازباشا جانە سان تۇرىندەگى) ساندار قاتتى بۇلىنبەگەن بولسا (ەگەر بانكنوتتىڭ شىن اقشا ەكەنىن راستاۋعا كەدەرگى بولماسا)، ەسكىرگەنىنە قاراماستان، ول تولەمگە جارامدى اقشاعا ايىرباستالادى.
«ونداي بانكنوتتاردى ەكىنشى دەڭگەيلى بانكتەرگە، قۇب فيليالدارىنا نەمەسە «قازپوشتا» اق-نا بارىپ، ايىرباستاپ الۋعا بولادى. ايتا كەتەيىك، ەدب وزدەرىنىڭ ىشكى نورماتيۆتىك قۇجاتتارىنا ساي، قىزمەت كورسەتكەنى ءۇشىن كوميسسيالىق تولەم الۋعا قۇقىلى. اۋماقتىق فيليالداردىڭ مەكەنجايى مەن بايلانىس نومىرلەرى ۇلتتىق بانك سايتىندا جازىلعان»، – دەدى اسقات مۇقامادييەۆ.