«بۇل مەنىڭ ارمانىم ەدى» – الماتى اكىمى مەكتەپتەردى ءبىر اۋىسىمعا كوشىرۋ تۋرالى

الماتى اكىمى ەربولات دوسايەۆ ورتالىق كوممۋنيكاسيالار قىزمەتىندە وتكەن بريفينگتە مەكتەپتەردى ءبىر اۋىسىمدى وقىتۋعا كوشىرۋ مەرزىمى مەن وقۋشى ورىندارىنىڭ تاپشىلىعىن ازايتۋ ءۇشىن قابىلدانىپ جاتقان شارالار تۋرالى جۋرناليستەردىڭ سۇراعىنا جاۋاپ بەردى. دەپ حابارلايدى aqshamnews.kz

«بيىل ءبىز 43 مەكتەپتى ءبىر اۋىسىمدى وقىتۋعا كوشىرۋ ۇدەرىسىن باستادىق – بۇل مەنىڭ ارمانىم ەدى، بالالار ءبىر اۋىسىمدا وقىسا دەگەن. ءبىز بۇل باستامانىڭ وڭ اسەرىن كورىپ وتىرمىز. ۇزاق مەرزىمدى پەرسپەكتيۆادا 2027 جىلدىڭ سوڭىنا دەيىن مەكتەپتەردىڭ كەم دەگەندە 40%-ىن، شامامەن 95 مەكتەپتى ءبىر اۋىسىمدا وقىتۋعا كوشىرۋ جوسپارلانىپ وتىر. بۇل وقۋشىلاردىڭ جۇكتەمەسىن ازايتىپ، قوسىمشا ساباقتاردى ۇيىمداستىرۋعا مۇمكىندىك بەرەدى، سەبەبى ءبىر اۋىسىمعا كوشۋ ەكى اۋىسىمدى رەجيمنەن تۋىندايتىن جۇكتەمەنى جەڭىلدەتەدى»، – دەدى ەربولات دوسايەۆ. 

اكىمنىڭ ايتۋىنشا، وقۋ جىلىنىڭ باسىندا قالا مەكتەپتەرىندە وقۋشى ورىندارىنىڭ تاپشىلىعى شامامەن 30 مىڭ بولعان. مەملەكەت باسشىسىنىڭ باستاماسىمەن قولعا الىنعان «جايلى مەكتەپ» جوباسى بۇل ماسەلەنى شەشۋگە مۇمكىندىك بەرەدى.

«جايلى مەكتەپ» جوباسى اياسىندا ءبىز 22 مىڭ وقۋشى ورنىن اشامىز. وسى شارالاردىڭ ارقاسىندا كەلەسى وقۋ جىلىنا قاراي ورىن تاپشىلىعى «باسقارىلاتىن» دەڭگەيگە – 3-4 مىڭ ورىنعا دەيىن تومەندەيدى. ودان ءارى اكىمدىك ءبىلىم بەرۋ نىساندارىن ءوز قاراجاتى ەسەبىنەن سالۋ جانە جاڭعىرتۋ جۇمىستارىن جالعاستىرادى. بۇل الداعى ۋاقىتتا ورىن تاپشىلىعىنىڭ كوبەيىپ كەتۋىنە جول بەرمەيدى»، – دەدى قالا اكىمى.