كەشە ءابىلحان قاستەيەۆ اتىنداعى ق ر مەملەكەتتىك ونەر مۋزەيىندە قىلقالام شەبەرى، ق ر سۋرەتشىلەر وداعىنىڭ مۇشەسى سادىعۇلوۆ راقىمجان سەيتكەندىر ۇلىنىڭ «بۇل – مەنىڭ الەمىم» اتتى جەكە كورمەسى اشىلدى.
كورمەگە سۋرەتشىنىڭ ءار جىلدارى جازىلعان كەسكىندەمە، گرافيكا جانە گوبەلەننەن قۇرالعان 70-كە جۋىق تۋىندىسى قويىلعان. راقىمجان سادىعۇلوۆ – 150-دەن استام ءىرى جۇمىستىڭ، ونىڭ ىشىندە كەسكىندەمەلىك سەريالىق «ابىلاي حان»، «مۇحامەد-حايدار دۋلاتي» مەن «جەر الەمىنە بەيبىتشىلىك»، «جاڭا قالا»، «مەنىڭ باعىم»، «توميريس»، «شاماندار»، «ماڭگىلىك»، «اڭىراقاي شايقاسى» اتتى گوبەلەندەردىڭ اۆتورى.
سونداي-اق، تەوريا مەن پراكتيكانى، ارنايى پاندەردى وقىتۋ ادىستەمەسىن جەتىك مەڭگەرگەن دەڭگەيى جوعارى كاسىبي مامان، «ساندىك-قولدانبالى ونەر» ماماندىعى بويىنشا بىرنەشە وقۋ-ادىستەمەلىك قۇرالدىنىڭ، عىلىمي ماقالالاردىڭ جانە «بەينەلەۋ ونەرى مامانداندىرىلعان تەرميندەرىنىڭ قازاقشا-ورىسشا-اعىلشىنشا تۇسىندىرمە سوزدىگىنىڭ»، و.تاڭسىقبايەۆ شىعارماشىلىعىنا ارنالعان كىتاپتىڭ اۆتورى.
وسىنداي ونەر يەسىنىڭ قاستەيەۆ مۋزەيىنىڭ تورىنەن ورىن العان بىرەگەي تۋىندىلارى كورمەدە 16 اقپانعا دەيىن تۇرادى. كورمە جەتەكشىسى – لاۋرا ابىلدايەۆا.