بۇگىن ۇلىتاۋ تورىندە ۇلتتىق قۇرىلتايدىڭ العاشقى وتىرىسى وتەدى

قاتىسۋشىلار اۋىستىرىلىپ وتىرۋى مۇمكىن

بۇگىن ۇلىتاۋ وبلىسى ۇلىتاۋ اۋدانىندا پرەزيدەنت جانىنان قۇرىلعان ۇلتتىق قۇرىلتايدىڭ العاشقى وتىرىسى وتەدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
اراعا شيرەك عاسىر سالىپ وبلىس مارتەبەسىن قايتا العان ۇلىتاۋ وڭىرىندە ق ر پرەزيدەنتى جانىنان قۇرىلعان ۇلتتىق قۇرىلتايدىڭ العاشقى وتىرىسى وتەدى. كەشە مەملەكەت باسشىسىنىڭ جارلىعىمەن ق ر پرەزيدەنتىنىڭ جانىنداعى ۇلتتىق قۇرىلتاي قۇرىلدى . ۇلتتىق قوعامدىق سەنىم كەڭەسىنىڭ ورنىنا قۇرامى جاعىنان ودان دا اۋقىمدى ۇلتتىق قۇرىلتاي ينستيتۋتى قۇرىلاتىنى ەڭ العاش رەسمي تۇردە پرەزيدەنت قاسىم-جومارت توقايەۆتىڭ 16 ناۋرىزداعى حالىققا جولداۋىندا ايتىلعان بولاتىن . كەيىن مەملەكەت باسشىسى قازاقستان حالقى اسسامبلەياسىنىڭ ءحححى سەسسياسىندا بۇل ينستيتۋت جالپىۇلتتىق ديالوگتىڭ امبەباپ مودەلىنە اينالاتىنىن ايتىپ، قۇرامىنا كىمدەر كىرەتىنىن اتاعان ەدى. ۇلتتىق قۇرىلتايدىڭ قايتادان قۇرىلىمدالعان ۇلىتاۋ وڭىرىندە وتەتىنى 6 ماۋسىمدا بەلگىلى بولعان. ۇلتتىق قۇرىلتايدىڭ قازىرگى قۇرامىندا ءماجىلىس دەپۋتاتتارى مەن قحا مۇشەلەرىنەن، ازاماتتىق قوعام مەن ساياسي پارتيا وكىلدەرىنەن، ساراپشىلار مەن وڭىرلەردەگى قوعامدىق كەڭەس مۇشەلەرىنەن، كاسىپكەرلەردەن جاساقتالعان 117 ادام بار. سولاردىڭ ءبىر پاراسىن اتاساق، اقىن مۇحتار شاحانوۆ، قازاقتىڭ تۇڭعىش عارىشكەرى توقتار اۋباكىروۆ، اكادەميك اسقار جۇمادىلدايەۆ، ەكونوميست جاقسىبەك كۇلەكەيەۆ، ساياساتكەر ءاليحان بايمەنوۆ، جۋرناليست، مەديا-مەنەدجەر، قوعام قايراتكەرى ەرمۇرات ءباپي، پارلامەنتتىڭ بىرنەشە شاقىرىلىمىنىڭ دەپۋتاتى نۇرتاي سابيليانوۆ، بالۋان داۋلەت تۇرلىحانوۆ، عالىم-بيوتەحنولوگ كۇنسۇلۋ زاكاريا، ءدىنتانۋشى قايرات جولدىباي، عالىم انار فازىلجانوۆا سياقتى ەسىمدەر بار. مەملەكەتتىك كەڭەسشى ەرلان ءقاريننىڭ جازباسىنا سۇيەنسەك، قۇرىلتاي جۇمىسىنا قاتىسۋشىلار اۋىستىرىلىپ وتىرۋى مۇمكىن . ونىڭ ايتۋىنشا، ۇلتتىق قۇرىلتايدىڭ جۇمىسى ونىڭ قۇرامىنا كىرگەن 117 ادامنىڭ ۇسىنىس-پىكىرىمەن شەكتەلىپ قلامايدى. ول ءۇشىن ارناۋلى ونلاين-پلاتفورما ازىرلەنگەن كورىنەدى. ياعني، ازاماتتار وسى پلاتفورما ارقىلى ۇلتتىق قۇرىلتاي حاتشىلىعىنا ۇسىنىس جىبەرۋگە مۇمكىندىك الماق.