اسكەري-تەڭىز كۇشتەرى كاسپيي تەڭىزىنىڭ قازاقستاندىق سەكتورىندا اسكەري قاۋىپسىزدىكتى، ەلدىڭ تۇتاستىعىن قامتاماسىز ەتۋگە باعىتتالعان.
بۇگىن قازاقستاننىڭ اسكەري-تەڭىز كۇشتەرى ءوزىنىڭ 30 جىلدىعىن اتاپ وتۋدە. قازاقستان رەسپۋبليكاسىنىڭ قورعانىس ءمينيسترى رۋسلان جاقسىلىقوۆ ارداگەرلەر مەن ازاماتتىق قىزمەتكەرلەردى تاۋەلسىز قازاقستاننىڭ اسكەري-تەڭىز كۇشتەرىنىڭ قۇرىلعان كۇنىمەن قۇتتىقتادى، دەپ حابارلايدى اlmaty-akshamy.kz ۆەدومستۆونىڭ باسپا ءسوز قىزمەتىنە سىلتەمە جاساپ.
قورعانىس ءمينيسترى رۋسلان جاقسىلىقوۆتىڭ قۇتتىقتاۋ ءماتىنى
قۇرمەتتى اسكەري تەڭىزشىلەر!
«ق ر قورعانىس مينيسترلىگىنىڭ جانە قارۋلى كۇشتەردىڭ باسشىلىعىنىڭ، سونداي-اق ءوز اتىمنان سىزدەردى، بارشا ارداگەرلەردى اسكەري-تەڭىز كۇشتەرىنىڭ 30 جىلدىعىمەن شىن جۇرەكتەن قۇتتىقتايمىن!
تاۋەلسىزدىك تىرەگىنە اينالعان قارۋلى كۇشتەردىڭ اسكەري-تەڭىز كۇشتەرى قازاقستاننىڭ كاسپيي تەڭىزى سەكتورىندا ەگەمەندى ەلىمىزدىڭ تىنىشتىعى مەن قاۋىپسىزدىگىن، تاۋەلسىزدىگى مەن ەل تۇتاستىعىن ساقتاۋ جولىندا قالتقىسىز قىزمەت ەتىپ كەلەدى.
اسكەري تەڭىزشىلەر وزدەرىنە ارتىلعان سەنىمدى ابىرويمەن ورىنداپ، وقۋ-جاۋىنگەرلىك مىندەتتەردى اتقارۋدا كاسىبي شەبەرلىك تانىتىپ كەلەدى. قۇرىلعان ۋاقىتتان باستاپ وتىز جىل ىشىندە قارت كاسپييدىڭ اتىرابىندا ۇيىمداستىرىلعان بارلىق كەشەندى جاتتىعۋلاردا سىزدەر بىلىكتى مامان ەكەندەرىڭىزدى بايقاتىپ، سەنىمگە سەلكەۋ تۇسىرگەن ەمەسسىزدەر.
مەرەيلى كاسىبي مەيرامدا بارشاڭىزعا مىقتى دەنساۋلىق، قاجىماس قايرات، قىزمەتتە قىراعىلىق، ومىردە ۇلكەن بەلەستەردى باعىندىرۋدا ساتتىلىك تىلەيمىن!»
ايتا كەتەلىك، قازاقستان اسكەري-تەڭىز كۇشتەرى 1993 جىلى 2 ساۋىردە پرەزيدەنت جارلىعىمەن قۇرىلعان بولاتىن. اسكەري-تەڭىز كۇشتەرى كاسپيي تەڭىزىنىڭ قازاقستاندىق سەكتورىندا اسكەري قاۋىپسىزدىكتى، ەلدىڭ تۇتاستىعىن قامتاماسىز ەتۋگە باعىتتالعان. بۇگىندە اسكەري-تەڭىز كۇشتەرى زاماناۋي كەمەمەن، قارۋمەن جانە تەحنيكامەن جاراقتاندىرىلعان. ۇزدىك اسكەري تەڭىزشىلەر ەۋروپا مەن امەريكا ەلدەرىندە ءبىلىم الادى.
