قوشتاسۋعا قازاقتىڭ بارلىق يگى جاقسىسى، بارلىق سالانىڭ وكىلدەرى جانە مۇرات مۇحتارۇلىنا تىلەۋلەس بولعان قاراپايىم تۇرعىندار دا كوپ جينالدى.
بۇگىن قۇربان ايتتا قازاق ەلى اسىلدىڭ سىنىعى، تۇلپاردىڭ تۇياعى، ۇلتقا ءومىرىنىڭ سوڭىنا دەيىن ادال قىزمەت ەتكەن تۇلعا، كورنەكتى مەملەكەت جانە قوعام قايراتكەرى، مادەنيەتتانۋشى، شىعىستانۋشى عالىم، I دارەجەلى "بارىس" وردەنىنىڭ يەگەرى، ديپلومات مۇرات مۇحتار ۇلى اۋەزوۆتى سوڭعى ساپارىنا شىعارىپ سالدى، دەپ حابارلايدى Almaty-akshamy.kz
مارقۇممەن قوشتاسۋ ءراسىمى الماتىداعى مۇحتار اۋەزوۆ اتىنداعى قازاق ۇلتتىق دراما تەاترىندا ءوتتى. جانازاسى دا سول جەردە شىعارىلدى.
قارالى جيىندا مەملەكەت باسشىسى قاسىم-جومارت كەمەل ۇلى توقايەۆتىڭ كوڭىل ايتۋ حاتى وقىلدى.
"ۇلت رۋحانياتىنىڭ العا باسۋىنا، قازاق عىلىمىنىڭ كوكجيەگىن كەڭەيتۋگە بار سانالى عۇمىرىن ارناعان زيالى، پاراساتتى تۇلعا ەدى. قازاق ادەبيەتى مەن مادەنيەتىن، تاريحىن تەرەڭ زەردەلەپ، سوڭىنا ولشەۋسىز مول مۇرا قالدىردى. قازاقستاننىڭ حالىقارالىق دارەجەدەگى بەدەلىنىڭ ارتۋىنا ءوزىنىڭ ساياسي-قوعامدىق ىستەرىمەن زور ۇلەس قوستى. عيبراتتى عۇمىر كەشىپ، كەمەل دە كەمەڭگەر اكە جولىن لايىقتى جالعاعان مۇرات مۇحتار ۇلىنىڭ جارقىن بەينەسى مەن ءقادىرلى ەسىمى حالقىمىزدىڭ جۇرەگىندە ماڭگى ساقتالادى. مارقۇمنىڭ يمانى سالامات، جانى ءجانناتتا بولسىن،" – دەپ جازىلعان كوڭىل ايتۋ حاتىندا.
قوشتاسۋ راسىمىندە، سونداي-اق ق ر پرەمەر-ءمينيسترى ولجاس بەكتەنوۆتىڭ، سەنات سپيكەرى ماۋلەن اشىمبايەۆتىڭ كوڭىل ايتۋ حاتتارى وقىلدى. ءسوز سويلەگەندەردىڭ ىشىندە بەلگىلى مەملەكەت جانە قوعام قايراتكەرى مۇحتار قۇل-مۇحاممەد، قازاقستان جازۋشىلار وداعىنىڭ ءتوراعاسى مەرەكە قۇلكەنوۆ جانە ت.ب. زيالى قاۋىم وكىلدەرى بولدى. مۇحتار اۋەزوۆتەي كەمەڭگەر اكەنىڭ جولىن لايىقتى جالعاي بىلگەن مۇرات مۇحتار ۇلىنىڭ اتىنا جاقسى سوزدەر ايتىلدى.
مارقۇم الماتىنىڭ ورتالىعىنداعى رايىمبەك داڭعىلى بويىنداعى زيراتتا جاتقان اكەسى مۇحتار اۋەزوۆتىڭ قاسىنا جەرلەندى.