تيراميسۋ، نۋتەللا، چيزكەيك، پۋدينگ، بالمۇزداق. بۇل ءتىزىمدى جالعاستىرا بەرۋگە بولادى. ەگەر بۇل اتاۋلار سىزگە جاقسى تانىس بولسا، دەمەك ءتاتتىنى جاقسى كورەتىندەر قاتارىنانسىز نەمەسە كونديتەر ونىمدەرىنە قاتىسى بار مامان بولعانىڭىز.
1 اقپان – حالىقارالىق دەسەرت كۇنى. ءتاتتىنى جاقسى كورمەيتىن ادام كەمدە-كەم بولار. ال ەگەر جوعارىدا اتالعان تىزىمنەن بىردە-بىرەۋىن تانىماسا، وندا تاتتىگە ەش اۋەس ەمەس جاندار قاتارىنان بولعانى. دەسەرت بۇگىندە الەمنىڭ كەز كەلگەن ەلىندە دامىپ، نەشە ءتۇرى شىعىپ كەتكەن. ءاربىر كونديتەرلىك ءونىمنىڭ ءوزىنىڭ شىعۋ تاريحى، سەبەبى، ءتىپتى ارنايى كۇندەرى بار بولار. دەگەنمەن ءتاتتى ونىمدەردى بىرىكتىرەتىن ءبىر كۇن بار. ول – اقپاننىڭ ءبىرىنشى جۇلدىزى، ياعني بۇگىن.
بۇل بەيرەسمي داتا جانە ول ينتەرنەت جەلىسىن پايدالانۋشىلار ارقاسىندا تانىلىپ كەلەدى. ءتاتتىقۇمارلار اراسىندا بۇل كۇندى قالاي اتاپ ءوتۋ كەرەكتىگى جونىندە ورتاق پىكىر ءالى دە قالىپتاسپاعان بولار. كەيبىرى بۇل كۇندى 12 قاراشا كۇنى، ال ەندى بىرەۋلەرى 1 اقپان كۇنى اتاپ وتەدى. Calend.ru سايىنىڭ مالىمەتىنشە، ەكىنشى داتانىڭ پايدا بولۋى اقش- تا بلوگەر ءارى كونديتەر ەندجي ءدادليدىڭ جاساعان كەيك-پوپ دەسەرتىنىڭ كەڭ تانىلا باستاۋىمەن بايلانىستى. كەيك-پوپ 2008 جىلى كەڭىنەن تانىلىپ، مويىندالدى.
ۋاقىت وتە كەلە دەسەرت كۇنىنىڭ ناقتى داتاسى بەلگىلەنەتىن بولار.
بۇنداي كۇندى اتاپ ءوتۋ، اسىرەسە، بالالار ءۇشىن زور قۋانىش شىعار. اينالاڭىزعا جاقسى كوڭىل-كۇي سىيلاۋعا جومارت ادام بولساڭىز، مۇنداي كۇندەرى ولاردى دا ۇمىتپاعان ءجون.
ءتاتتىنى تىم كوپ جەۋ زيان دەسەڭىز، قۇرامىن بارىنشا پايدالى ەتىپ ازىرلەپ نەمەسە تاپسىرىس بەرىپ، كىشكەنتايلاردى نەمەسە جاقىندارىمىزدى قۋانتۋعا سەبەپ تاۋىپ، وسى كۇنى قۇتتىقتاسا بولادى. دوفامين گورمونى ءتۇسىپ، كۇيزەلىستەن شارشاعان ادامدارعا دا وزدەرىن جاقسى سەزىنۋ ءۇشىن بۇگىن – جاقسى سەبەپ. دەگەنمەن، ءتاتتىنىڭ زياندى جاعى دا بار ەكەنىن ەسكەرىپ، شەكتەن شىقپاي، دەنساۋلىعىنا زيان كەلمەيتىندەي مولشەردە ازداپ ءتاتتى تورتتان جەسە، ايىبى بولماس.
كوڭىلدى ءجۇرۋ ءۇشىن كۇندە ءتاتتى جەپ، ول ءۇشىن مەرەكە جاساۋ دا مىندەت ەمەس. دەگەنمەن، وزگەنىڭ كوڭىلىن كوتەرىپ، جانىن جادىراتار جان ءۇشىن بۇل تاپتىرمايتىن سەبەپ. تاتتىگە قاراماي جادىراپ جۇرەتىن ادامداردىڭ داستارحانىندا كۇندە مەرەكە.