بۇگىن قازاقستاندا «8 ناۋرىز – حالىقارالىق ايەلدەر كۇنى» مەرەكەسى اتالىپ وتەدى، دەپ حابارلايدى Almaty-akshamy.kz.
بۇل كۇننىڭ تاريحى ايەلدەر قۇقىعى ءۇشىن كۇرەسپەن تىكەلەي بايلانىستى. 1857 جىلى 8 ناۋرىزدا نيۋ-يوركتە جۇمىسشى ايەلدەر مانيفەستكە جينالدى. ولار 10 ساعاتتىق جۇمىس كۇنىن، جارىق ءارى قۇرعاق جۇمىس ورىندارىن، ەر ادامدارمەن بىردەي جالاقى مولشەرىن تالاپ ەتكەن ەدى. ايەلدەر سول كەزدەرى 16 ساعات تەر توككەن ەڭبەكتەرىنە وتە از جالاقى الاتىن. ال 1910 جىلى كوپەنگاگەندەگى سوسياليست ايەلدەردىڭ حالىقارالىق كونفەرەنسياسىندا گەرمان جانە حالىقارالىق جۇمىسشى قوزعالىسىنىڭ قايراتكەرى كلارا سەتكيننىڭ ۇسىنىسىمەن ناۋرىزدىڭ 8ء-ىن حالىقارالىق ايەلدەر كۇنى رەتىندە اتاپ ءوتۋ شەشىمى قابىلداندى.
1914 جىلدان كەيىن بىرنەشە ەلدە 8 ناۋرىز ايەلدەر مەرەكەسى رەتىندە اتالاتىن بولدى. بۇل كۇن – ايەلدەر قۇقىن قورعاۋ جانە حالىقارالىق بەيبىتشىلىك كۇنى. بىرىككەن ۇلتتار ۇيىمى 1975 جىلدى حالىقارالىق ايەلدەر جىلى دەپ جاريالاپ، سول جىلعى ناۋرىزدىڭ 8-ىنەن باستاپ ايەلدەر قۇقىن قورعاۋ جانە حالىقارالىق بەيبىتشىلىك كۇنىن وتكىزە باستادى. قازاقستان رەسپۋبليكاسىندا دا بۇل مەرەكەگە اسا ءمان بەرىلىپ، وسى كۇنى ەلوردا مەن بارلىق وبلىستاردا مەرەكەلىك شارالار ۇيىمداستىرىلادى.
بيىل 8 ناۋرىز سەيسەنبىگە تۋرا كەلىپ تۇر. وسىعان وراي ۇكىمەت قاۋلىسىمەن 7 ناۋرىز كۇنگى جۇمىس كۇنى 5 ناۋرىز سەنبىگە اۋىستىرىلدى. وسىلايشا، قازاقستاندىقتار حالىقارالىق ايەلدەر كۇنىنە وراي 6،7، 8 ناۋرىز دەمالادى.