وقۋ-اعارتۋ مينيسترلىگى سالتاناتتى ءىس-شارانى قىمبات شارلارمەن بەزەندىرۋگە تىيىم سالدى
بيىل ەلىمىز بويىنشا 400 مىڭعا جۋىق وقۋشى مەكتەپ تابالدىرىعىن اتتاعالى تۇر، دەپ حابارلايدى Almaty-akshamy.kz Almaty.tv-گە سىلتەمە جاساپ.
بارلىق ءبىلىم وردالارى بۇگىن جاڭا وقۋ جىلىنا سوڭعى دايىندىقتارىن جۇرگىزدى. العاشقى قوڭىراۋ سالتاناتتى جيىنى دا جاڭا تارتىپپەن وتكىزىلمەك. وقۋ-اعارتۋ مينيسترلىگى سالتاناتتى ءىس-شارانى قىمبات شارلارمەن بەزەندىرۋگە جانە جەكە ستۋديالاردان انيماتورلار جالداۋعا تىيىم سالدى.
الا جازداي دوپ قۋىپ، ءۇش اي اسىر سالىپ ويناعان بالالار ەرتەڭنەن باستاپ مەكتەپكە ورالادى. ەلىمىزدەگى بارلىق ءبىلىم مەكەمەلەرىندە بۇگىن تاڭنان بەرى قاربالاس. قابىرعاعا باننەر ءىلىپ، مەكتەپ اۋلاسىنا قوڭىراۋدىڭ سۋرەتىن بورمەن سىزىپ، تىنىم تاپپاي جاتىر. باستىسى مۇعالىمدەر بيىلعى سالتاناتتى جيىننىڭ ەشقانداي سانيتارلىق شەكتەۋسىز وتەتەتىنە قۋانىشتى.
«1-سىنىپقا باراتىن بالالار ءۇشىن – مەيرام. سوندىقتان ءىس-شاراعا دايىندىقتى تولىق جۇرگىزدىك. اتا-انالارعا دا سىرتتان كەلەتىن قوناقتارعا دا ەشقانداي شەكتەۋ قويىپ جاتقان جوقپىز. ەركىن فورماتتا وتكىزەمىز. بىلتىرعىمەن سالىستىرعاندا 120 وقۋشىداي ارتىق. بالا سانى بيىل كوبەيدى. بۇل سالىستىرمالى تۇردە جاقسى كورسەتكىش»، – دەدى №81 مەكتەپ-گيمنازيا ديرەكتورى نۇرعالي تۇرىمبەتوۆ.
جىل سايىن وقۋشىلار مەن اتا-انالاردى جاڭا رەفورمالارمەن قۋانتىپ جۇرگەن وقۋ-اعارتۋ مينيسترلىگىنىڭ بيىل دا جاڭالىعى از ەمەس. وقۋ اپتاسى ۇزاردى. ياعني وقۋشىلار ادەتتەگىدەي 25 مامىرعا دەيىن ەمەس، 31-ىنە دەيىن وقيتىن بولادى. ەسەسىنە اپتاسىنا 5 كۇن وقىپ، 2 كۇن دەمالادى. بۇل وقۋ جۇكتەمەسىن ازايتۋعا مۇمكىندىك بەرەدى.
«سەنبى كۇنى بالالارعا قيىن تاقىرىپتاردى مەڭگەرۋگە نەمەسە قايتالاۋ، شىڭداۋ سەكىلدى ءتۇرلى جۇمىسقا ۋاقىت بولۋگە مۇمكىندىك بەرىپ وتىرمىز»، – دەدى ى. التىنسارين اتىنداعى ۇلتتىق ءبىلىم اكادەمياسىنىڭ ۆيسە-پرەزيدەنتى ءاليا چوكۋشيەۆا.
بيىل ەلىمىزدىڭ وقۋ-اعارتۋ ءمينيسترى سالتاناتتى ءىس-شارانى قىمبات شارلارمەن بەزەندىرۋگە جانە جەكە ستۋديالاردان انيماتورلار جالداۋعا تىيىم سالعان بولاتىن. ال مۇعالىمدەرگە گۇل سىيلاۋعا رۇقسات بەردى. سودان بولار، ءقازىر بازارداعى فلوريستەردىڭ ساۋداسى قىزىپ تۇر.
«ءبىر ءتۇبى 800 تەڭگە تۇرادى. شامامەن 2400-2500 تەڭگەگە شىعادى. كليەنتتەردىڭ تالعامىنا قاراي 5-6-10 مىڭعا دەيىن جاساپ بەرە الامىز. كوپ الىپ جاتسا، باعاسىن ءتۇسىرىپ بەرەمىز»، – دەدى ساتۋشى اسەل ءابدىراحمانوۆا.
بيىل ەلىمىزدە 3 ميلليوننان استام بالا مەكتەپكە بارادى. ونىڭ 400 مىڭعا جۋىعى 1-سىنىپ وقۋشىلارى. ەرتەڭنەن باستاپ 7،5 مىڭنان استام ءبىلىم ورداسى بالالار ءۇشىن ەسىگىن ايقارا اشپاق.