بۇگىن - 12 قاڭتار مەملەكەت جانە قوعام قايراتكەرى دىنمۇحامەد قونايەۆتىڭ تۋعانىنا 113 جىل تولدى. ءوز ءداۋىرىنىڭ ۇلى ساياساتكەرى بولا بىلگەن ءبىرتۋار تۇلعا كۇردەلى، قاراما-قايشىلىققا تولى كەزەڭگە قاراماستان، ەلدىڭ ەكونوميكاسىن، الەۋمەتتىك سالاسىن، عىلىمىن، ءتول مادەنيەتىن دامىتۋ ىسىنە ايتۋلى ەڭبەك ءسىڭىردى، دەپ حابارلايدى aqshamnews.kz
دىنمۇحامەد احمەت ۇلىنىڭ تۋىسى، حالىقارالىق «قونايەۆ قورىنىڭ» پرەزيدەنتى ەلدار قونايەۆ سوڭعى 2-3 جىل اۋلەتى ءۇشىن قۋانىشتى جاڭالىقتارعا تولى بولعانىن ايتادى. ونىڭ سوزىنشە، بىرنەشە وڭىردە «قونايەۆتانۋ» ءپانى فاكۋلتاتيۆ رەتىندە ەنگىزىلگەن.
ەلدار قونايەۆ، حالىقارالىق «قونايەۆ قورىنىڭ» پرەزيدەنتى:
ديماش احمەت ۇلىنىڭ بار ارمانى – ەلىمىزدىڭ تاۋەلسىزدىك الىپ، ءوز الدىنا دەربەس بولۋى ەدى. بۇگىندە مەملەكەتتىڭ، حالىقتىڭ قايراتكەرگە دەگەن ىقىلاسى زور. ماسەلەن، الماتى جانە جامبىل وبلىستارىندا ەڭسەلى ەسكەرتكىشتەر بوي كوتەردى. شىمكەنت، اتىراۋ جانە اقتوبە قالالارىندا اشىلعان زاماناۋي مەكتەپتەرگە ديماش احمەت ۇلىنىڭ ەسىمى بەرىلدى. ءقازىر قونايەۆ قالاسى بار. بۇل ۇلى تۇلعاعا دەگەن قۇرمەتتىڭ بەلگىسى ەكەنى انىق.
قۋان نۇراقىن، ءتىلشى:
دىنمۇحامەد احمەت ۇلىنىڭ مۇزەي ءۇيى مەن مۋزەيىندە 8 مىڭنان اسا ەكسپونات ساقتاۋلى. سونىڭ ىشىندە ديماش احمەت ۇلى مىنا جادىگەردى ەرەكشە جاقسى كورگەن ەكەن. بۇل قوبديشانى 70 جىلدىق مەرەيتويىندا وقۋشىلار سارايىنىڭ وقۋشىلارى سىيعا تارتقان ەكەن.
بۇل جۇمىس ديماش احمەتۇلىنا قاراپايىمدىلىعىمەن ۇناپتى. مۋزەيگە كەلۋشىلەردى ءبىرتۋار تۇلعانىڭ ەڭبەكقورلىعى تاڭقالدىرعان.
اڭىز تۇلعانىڭ الماتىداعى تۇرعان ءۇيى مەن مۋزەيىنە كەلۋشىلەر سانى جىل سايىن ارتىپ كەلەدى. 2023 جىلى 20 مىڭ ادام اياق باسسا، 2024 جىلى 40 مىڭنان اسقان.
ەلەنا كۋباشيەۆا، د.قونايەۆ مۋزەيىنىڭ جەتەكشىسى:
دىنمۇحامەد اتامىز باسشىلىقتا 45 جىلداي بولعان. سونىڭ 25 جىلى قازاقستاندى باسقارعان ەكەن. قازاقستاندى دا ەكونوميكامىز كوتەرىلگەن ەكەن. 8،9%. كارتاعا قاراساق 55 جىلدارى قانداي بولدى ەكونوميكامىز 86 جىلدارى قانداي بولدى. مىسالى، 2 مىڭنان اسا كولحوز، سوۆحوز كوبەيگەن ەكەن. 43 قالا قالانعان ەكەن سول ۋاقىتتا.
قورىتا ايتقاندا، حح عاسىردىڭ ەكىنشى جارتىسىندا قازاقتىڭ ۇلتتىق ساناسىنىڭ وسۋىنە، ەڭسەسى كوتەرىلىپ، ۇلت رەتىندە ۇيىسۋىنا دىنمۇحامەد قونايەۆتىڭ ەڭبەگى ەرەن. ول ءاردايىم ەل مۇددەسىن، بولاشاق قامىن ءبىر ءسات ەستەن شىعارعان جوق. سودان بولار، تۇتاس جۇرت قايراتكەردى ناعىز ۇلت جاناشىرى، كەمەڭگەر باسشى رەتىندە تانىدى، دەيدى مۋزەي قىزمەتكەرلەرى.