دەنساۋلىق ساقتاۋ مينيسترلىگى 2025 جىلعى رەفورمالار مەن جاڭا وزگەرىستەر تۋرالى مالىمدەدى.
بيىلدان باستاپ جەكە مەديسينالىق كىتاپشالار بەرۋ، ەسەپكە الۋ جانە جۇرگىزۋ ەلەكتروندى فورماتقا كوشىرىلەدى، دەپ حابارلايدى aqshamnews.kz.
اتالعان تەتىكتى ەنگىزۋ ازاماتتارعا قۇجاتتى بىردەن بىرنەشە ۇيىمعا ۇسىنۋعا مۇمكىندىك بەرەدى، بۇل ولاردىڭ ۋاقىتى مەن قاراجاتىن ۇنەمدەيدى. بۇگىندە 1،6 ملن-عا جۋىق قازاقستاندىقتىڭ سانيتارلىق كىتاپشاسى بار.
وزگەرىستەر باسقا مەديسينالىق قۇجاتتاردىڭ بەرىلۋىنە دە اسەر ەتتى. سونداي-اق ازاماتتارعا ىڭعايلى بولۋ ءۇشىن قاعاز تۇرىنەن ەلەكتروندى فورماتقا كوشىرۋ جوسپارلانىپ وتىر:
ەڭبەككە جارامسىزدىق پاراعى؛
075/ۋ «مەديسينالىق انىقتاما»؛
026/ۋ «دكك قورىتىندىسى»؛
073/ۋ «تق باسقارۋعا رۇقسات بەرۋ تۋرالى انىقتاما»؛
069/ۋ «ساناتوريي-كۋرورتتىق كارتا»؛
052-2/ۋ «بالا دەنساۋلىعى پاسپورتى»
076/ۋ «قارۋعا رۇقسات الۋ»؛
038/ۋ «ەڭبەككە ۋاقىتشا جارامسىزدىق تۋرالى انىقتاما».
قازىرگى ۋاقىتتا بۇل ماقساتقا جەتۋ ءۇشىن اقپاراتتىق جۇيەلەردى ينتەگراسيالاۋ جۇمىستارى جۇرگىزىلۋدە. قۇجاتتار ءۇشىنشى قولعا ازاماتتاردىڭ كەلىسىمىمەن عانا «ەDensaulyq» بولىمىندە مەديسينالىق دەرەكتەرگە قول جەتكىزۋ مۇمكىندىگى بار «eGov mobile» قوسىمشاسى ارقىلى بەرىلەدى.
سونىمەن قاتار جاڭا جىلدان باستاپ بالاعا ەكپە سالۋعا رۇقسات بەرۋ نەمەسە باس تارتۋ دا ەلەكتروندى تۇردە تىركەلەدى. ەگەر ەكپە سالىنعان پاسيەنت ۆاكسينادان كەيىنگى اسقىنۋلارعا شاعىمدانعان جاعدايدا عانا ارەكەت الگوريتمى وزگەرەدى. مەديسينا تىلىندە مۇنى يممۋنيزاسيادان كەيىنگى جاعىمسىز اسەرلەر دەپ اتايدى. دارىگەر دەرەۋ كومەك كورسەتۋگە، ەلەكتروندى حابارلاما رەسىمدەپ، ونى مەملەكەتتىك ورگاندارعا تاپسىرۋعا مىندەتتى بولادى.