ەكولوگيا جانە تابيعي رەسۋرستار ءمينيسترى ەرلان نىسانبايەۆ "بۋاز كيىكتەردى اتىپ جاتىر" دەپ ماسەلە كوتەرگەن ازاماتتارعا جاۋاپ بەردى، دەپ حابارلايدى اlmaty-akshamy.kz.
– قازاقستاندا ءقازىر 2،5 ملن كيىك بار. تەك بۋاز كيىكتەر جايلى ايتتىڭىز. قىركۇيەكتىڭ جەلتوقساننىڭ اياعىنا دەيىن اڭشىلىققا رۇقسات ەتەمىز. قاراڭىزدارشى: تامىزدا قابان تولدەيدى. قىركۇيەكتە ەلىك، تاۋەشكى كۇيلەيدى. جالپى اڭداردىڭ كوبى قاراشانىڭ ورتاسىندا كۇيلەيدى. الەمدە اڭشىلىق جاسايتىن مەرزىمدە كوپ اڭ كۇيلەيتىن كەزەڭدە بولادى. سول سەبەپتى ءبىز بيولوگيالىق عىلىمي نەگىزدەمە اياسىندا جۇمىس ىستەپ جاتىرمىز، – دەيدى ەرلان نىسانبايەۆ ۇكىمەتتىڭ باسپا ءسوز ءماسليحاتىندا.
ونىڭ ايتۋىنشا، كيىكتى اتۋ اقپان ايىنان باستاپ توقتاتىلادى.
– تەك كيىكتى بۋاز كۇيىندە اتىپ جاتىر دەۋگە بولمايدى. ەندەشە جالپى اڭشىلىقتى توقتاتايىق. تەك كيىكتى عانا بۋاز كەزىندە اتسا ءبىر ماسەلە. مەن دە وندايعا بارماس ەدىم. 2،5 ملن كيىك بار. ءوسىمتال اڭ بۇل. ۇرعاشى لاق مامىردا تۋسا، سول جىلدىڭ جەلتوقسانىندا، جەتى ايىندا كۇيلەيدى. ءوسىمتال مال. قانشالىقتى تەرىس ىقپالىن ديقانشىلار كورىپ وتىر. بيىل مامىردا 40 پايىز تولدەيدى، – دەيدى ول.
ەكولوگيا جانە تابيعي رەسۋرستار مينيسترلىگىنىڭ بۇيرىعىنا سايكەس، اقبوكەندەردەن باسقا، سانى رەتتەلەتىن جانۋارلار تىزىمىنە قاسقىرلار، شيبورىلەر، قارعالار، ۇلكەن كورمورانتتار، جىلانباس بالىقتار ەندى. تىزىمدەگى جانۋارلاردىڭ سانى حالىقتىڭ دەنساۋلىعىن ساقتاۋ، اۋىل شارۋاشىلىعى جانە باسقا ءۇي جانۋارلارىنىڭ اۋرۋلارىنان قورعاۋ، قورشاعان ورتاعا زيان كەلتىرمەۋ ماقساتىندا رەتتەلمەك.
بۇيرىق 2023 جىلدىڭ 6 قازانىنان باستاپ قولدانىسقا ەنگەن.