بۇعان قوسا جۇمىس ىستەپ تۇرعان ەكى ەمحانا كۇردەلى جوندەۋدەن وتەدى.
حالىققا مەديسينالىق كومەك كورسەتۋ ساپاسىن جاقسارتۋ ءۇشىن بيىل ناۋرىز ايىندا ەكى وبەكتىنىڭ قۇرىلىسىن اياقتاۋ كوزدەلۋدە، دەپ حابارلايدى Almaty-akshamy.kz
- «بالالار شۇعىل مەديسينالىق كومەك ورتالىعىنىڭ» وپەراسيالىق بلوگى بار قابىلداۋ بولىمشەسىنىڭ كورپۋسى؛
- «كەرۋەن Medicus» جەكەمەنشىك مەديسينالىق ورتالىعىندا 300 ادام قابىلدايتىن ايەلدەر كونسۋلتاسياسى بار پەرزەنتحانا بولىمشەسى.
وسى جىلى مەديسينالىق مەكەمەلەردىڭ جۇكتەمەسىن ازايتۋ ءۇشىن 5 وبەكتىنىڭ قۇرىلىسىن سالۋ، رەكونسترۋكسيالاۋ جانە كۇردەلى جوندەۋ جوبالانۋدا، ونىڭ ىشىندە:
- ءارقايسىسى 500 كەلۋشىنى قابىلدايتىن 2 جاڭا ەمحانا قۇرىلىسى. ءال-فارابي داڭعىلى مەن سىرعابەكوۆ كوشەسىنىڭ قيىلىسىنداعى ءبىرىنشى ەمحانا بويىنشا وسى جىلدىڭ قاڭتار ايىندا جوبالاۋ-سمەتالىق قۇجاتتاما ازىرلەۋ باستالدى. ونى بيىل جىلدىڭ سوڭىنا دەيىن اياقتاپ، مەملەكەتتىك ساراپتامادان وتكىزۋ كوزدەلگەن. قۇرىلىستى باستاۋ 2024 جىلدىڭ 1 توقسانىندا جوسپارلانعان.
«ال ەكىنشى جاڭا قۇرىلىسى - مەن وسىعان دەيىن ايتقان گاگارين داڭعىلى مەن ليەۆيتان كوشەسىنىڭ قيىلىسىنداعى ەمحانا. قۇرىلىستى باستاۋ 2024 جىلدىڭ 2 توقسانىندا جوسپارلانعان»، - دەدى قالا اكىمى بۇگىنگى كەزدەسۋدە.
سونىمەن بىرگە جۇمىس ىستەپ تۇرعان ەكى ەمحانا، ياعني №14 جانە №12 ەمحانالار كۇردەلى جوندەۋدەن وتەدى. بۇگىنگى تاڭدا جوبالاۋ-سمەتالىق قۇجاتتامانى ازىرلەۋ ءۇشىن كونكۋرستار وتكىزىلۋدە. ساراپتاماسى تامىز ايىندا كۇتىلەدى. كۇردەلى جوندەۋ 2024 جىلدىڭ ەكىنشى توقسانىندا جوسپارلانعان.
«500 ورىندىق قالالىق ورتالىق كلينيكالىق ارۋحانانىڭ (№12 بولنيسا) جاڭا كورپۋسىن سالۋ جوسپارلانىپ وتىر. وسى جىلدىڭ قاڭتار ايىندا جوبالاۋ-سمەتالىق قۇجاتتامانى ازىرلەۋگە كونكۋرس جاريالاندى، قۇرىلىس-مونتاجداۋ جۇمىستارى 2024 جىلدىڭ ءىى توقسانىنا جوسپارلانعان»، - دەدى مەگاپوليس باسشىسى تۇرعىندارمەن كەزدەسۋدە.